സന്തോഷകരമായ നാളെയെ പ്രതീക്ഷിച്ചവരാണ് ഇല്ലാതായത്; കരിപ്പൂർ, രാജമല ദുരന്തങ്ങളിൽ ആദരാഞ്ജലിയർപ്പിച്ച് പൃഥ്വിരാജ്

കോഴിക്കോട്: കരിപ്പൂർ, രാജമല ദുരന്തങ്ങളിൽ ജീവൻ നഷ്ടമായവർക്ക് ആദരാഞ്ജലിയർപ്പിച്ച് നടൻ പൃഥ്വിരാജ്. സന്തോഷകരമായ നാളെയെ പ്രതീക്ഷിച്ചവരാണ് ഇല്ലാതായത്. ആ നടുക്കം തനിക്ക് കുടഞ്ഞുമാറ്റാൻ കഴിയുന്നില്ലെന്നും താരം ഫേസ്ബുക് കുറിപ്പിൽ പറഞ്ഞു.

കേരളത്തിന്‌ ഇത് ദുഃഖഭരിതമായ ഒരു ദിവസമാണ്. നമ്മളിൽ ഭാഗ്യമുള്ള പലരും, നമുക്കറിയാമായിരുന്ന ഒരു ലോകത്തിലേക്ക് തിരിച്ചു പോകാൻ കാത്തിരിക്കുമ്പോൾ, സന്തോഷഭരിതമായ ഒരു നാളെയെ പ്രതീക്ഷിച്ച പലർക്കും ആ പ്രത്യാശ ഇല്ലാതായി എന്ന ചിന്ത എനിക്ക് കുടഞ്ഞെറിയാൻ പറ്റുന്നില്ല. ഇതിനെ മറികടന്ന് മുന്നോട്ടുപോകാനുള്ള കരുത്ത് നിങ്ങള്‍ക്ക് ലഭിക്കട്ടെ. രാജമലയിലും കോഴിക്കോട്ടും മരിച്ചവരുടെ കുടുംബാംഗങ്ങളോടും സ്നേഹിതരോടും അഗാധമായ വ്യസനം രേഖപ്പെടുത്തുന്നു -പൃഥ്വിരാജ് പറഞ്ഞു.

കരിപ്പൂരിലെ വിമാന ദുരന്തത്തിൽ മരിച്ച പൈലറ്റ് ക്യാപ്റ്റൻ ഡി.വി. സാത്തെയെ വ്യക്തിപരമായി അറിയാമെന്നതിൽ അഭിമാനിക്കുന്നു. നമ്മുടെ സംഭാഷണങ്ങൾ എന്നുമോർക്കുമെന്നും പൃഥ്വിരാജ് സമൂഹമാധ്യമങ്ങളിൽ എഴുതി.