സൂചി കണ്ടപ്പോൾ മുഖംപൊത്തി കെ.ജി.എഫ്​ സംവിധായകൻ; പഞ്ച്​ ഡയലോഗൊക്കെ സിനിമയിലേ ഉള്ളൂ ലേന്ന്​ പരിഹസിച്ച്​ ​ട്രോളൻമാർ

ബംഗളൂരു: സാൻഡൽവുഡിന്​ ഇന്ത്യൻ സിനിമ ലോകത്ത്​ പുതിയ മേൽവിലാസം നേടിക്കൊടുത്ത സംവിധായകനാണ്​ പ്രശാന്ത്​ നീൽ. പ്രശാന്ത്​ നീലിന്‍റെ മാസ്​ എന്‍റർടെയ്​നറായ 'കെ.ജി.എഫ്​' ഇന്ത്യയിൽ ഒട്ടാകെ തരംഗം സൃഷ്​ടിച്ചിരുന്നു. കിടിലൻ ഡയലോഗുകൾ കൊണ്ട്​ ആരാധകരെ കോരിത്തരിപ്പിക്കുന്ന സംവിധായകൻ വാക്​സിനെടുത്ത ചിത്രമാണ്​ ഇപ്പോൾ സോഷ്യൽ മീഡിയയിൽ വൈറലാകുന്നത്​.

കുത്തിവെപ്പെടുക്കവെ തലതാഴ്​ത്തി മുഖം പൊത്തിയിരിക്കുന്ന പ്രശാന്ത്​ നീലിന്‍റെ ചിത്രം ട്രോളൻമാർ ഏറ്റെടുത്തു. വെള്ളിത്തിരയിൽ പഞ്ച് ഡയലോ​ഗുകൾ എഴുതുന്ന സംവിധായകന് സൂചി പേടിയാണെന്ന തരത്തിലുള്ള ട്രോളുകളാണ്​ പ്രത്യക്ഷപ്പെട്ടത്​. പ്രശാന്തിന്‍റെ സിനിമകളില്‍ വയലന്‍സും സംഘട്ടനങ്ങളും ധാരാളം ഉണ്ടെങ്കിലും കൊച്ചുകുട്ടികളെക്കാള്‍ ലോലമായ മനസ്സാണെന്ന് ചിലർ കുറിക്കുന്നു.

കോവിഡ്​ വാക്​സിൻ സ്വീകരിച്ച ശേഷം എല്ലാവരോടും വാക്​സിനെടുക്കാൻ അഭ്യർഥിച്ചായിരുന്നു അദ്ദേഹം ചിത്രം പങ്കുവെച്ചത്​. എന്നാൽ വാക്​സിനേഷനിൽ നിന്ന്​ മാറി ചർച്ച അദ്ദേഹ​ത്തിന്‍റെ ചിത്രത്തിന്‍റെ പുറത്തായി എന്നതാണ്​ വാസ്​തവം.

കെ.ജി.എഫിലെ പ്രശസ്​തമായ പഞ്ച്​ ഡയലോഗുകൾ ചേർത്ത്​ ചിലർ മീമുകളും തയാറാക്കി.

2014ൽ പുറത്തിറങ്ങിയ 'ഉ​ഗ്രം' ആണ്​ പ്രശാന്ത്​ നീൽ ആദ്യമായി സംവിധാനം ചെയ്​തത്​. ചിത്രം കന്നഡയിൽ വലിയ വിജയമായിരുന്നു. നാല്​ വർഷങ്ങൾക്ക്​ ശേഷം യാഷ്​ നായകനായി എത്തിയ ​കെ.ജി.എഫ്​ സംവിധാനം ചെയ്​തതോടെ പ്രശാന്ത്​ നീൽ ഇന്ത്യയിലെ ഏറ്റവും വിപണി മൂല്യമുള്ള സംവിധായകരിൽ ഒരാളായി മാറി.

പാൻ ഇന്ത്യൻ ഹിറ്റായ കെ.ജി.എഫിന്‍റെ രണ്ടാം ഭാഗം ഈ വർഷം പുറത്തിറങ്ങാനിരിക്കുകയാണ്​. ജൂലൈ 16നായിരുന്നു റിലീസ്​ നിശ്ചയിച്ചിരുന്നത്​. യാഷ്​, സഞ്​ജയ്​ ദത്ത്​, രവീണ ടണ്ഡൻ എന്നിവരാണ്​ ചിത്രത്തിൽ കേന്ദ്രകഥാപാത്രങ്ങളായി എത്തുന്നത്​. നീലിന്‍റെ അടുത്ത ചിത്രത്തിൽ തെലുഗു സൂപ്പർ താരം ജൂനിയർ എൻ.ടി.ആറാണ്​ നായകൻ. ​