പത്തൊമ്പതാം നൂറ്റാണ്ട് തീയറ്ററില്‍ തന്നെ കാണിക്കണം, പ്രതീക്ഷയോടെ മുന്നോട്ട് പോകാം -വിനയൻ

ബിഗ് ബജറ്റ് ചിത്രം പത്തൊമ്പതാം നൂറ്റാണ്ട് തിയറ്ററിൽ തന്നെ റിലീസ് ചെയ്യാൻ കഴിയുമെന്നാണ് കരുതുന്നതെന്ന് സംവിധായകൻ വിനയൻ. ചിത്രീകരണം ഒരുമാസം കൂടി ബാക്കിയുണ്ടെന്നും വിനയൻ ഫേസ്ബുക്കിൽ കുറിച്ചു.

സിജു വില്‍സണ്‍ നായകനാകുന്ന ചിത്രത്തിന് ഛായാഗ്രഹണമൊരുക്കുന്നത് ഷാജികുമാറാണ്. വിവേക് ഹര്‍ഷനാണ് എഡിറ്റിംഗ്.

വിനയന്റെ കുറിപ്പ് വായിക്കാം

അതിസാഹസികനും ധീരനുമായിരുന്ന ഒരു പോരാളിയുടെ കഥ എന്നതുപോലെ തന്നെ, അന്ന് തിരുവിതാംകൂറിൽ ജീവിച്ചിരുന്ന സാധാരണക്കാരായ മനുഷ്യരുടെ ജീവിതത്തിന്റെ നേര്‍ക്കാഴ്ച്ചകള്‍ പ്രതിപാദിക്കുന്ന സിനിമ കൂടിയാണ്. ആ കാലഘട്ടം സത്യസന്ധമായി പുനരാവിഷ്കരിക്കുക എന്നത് ഞങ്ങളെ സംബന്ധിച്ച് വളരെ ബുദ്ധിമുട്ടുള്ള ഒരു കാര്യമായിരുന്നു. ഒത്തിരി ഹോം വര്‍ക്ക് അതിനായി ചെയ്തിട്ടുണ്ട്. അതില്‍ എത്രമാത്രം വിജയിക്കാന്‍ കഴിഞ്ഞു എന്ന് തീരുമാനിക്കേണ്ടത് പ്രേക്ഷകരാണ്. ഏതാണ്ട് ഒരു മാസത്തെ ഷൂട്ടിംഗ് കൂടി ഇനി ബാക്കിയുണ്ട്. ഈ ലോക്ഡൗണ്‍ ഒക്കെ കഴിഞ്ഞ് അത് പൂര്‍ത്തീകരിച്ച് ചിത്രം ബിഗ് സ്ക്രീനില്‍ കാണിക്കണമെന്നാണ് ആഗ്രഹിക്കുന്നത്. ആഗ്രഹങ്ങളാണല്ലോ നമ്മളെ എപ്പോഴും മുന്നോട്ട് നയിക്കുന്നത്. പത്തൊമ്പതാം നൂറ്റാണ്ട് തീയറ്ററില്‍ കാണിക്കുവാന്‍ കഴിയും, നിങ്ങള്‍ പ്രേക്ഷകര്‍ വളരെ സംതൃപ്തിയോടെ അതിരുന്ന് കാണും എന്നൊക്കെയുള്ള പ്രതീക്ഷയോടെ നമുക്ക് മുന്നോട്ട് പോകാം...

വിനയൻ