മന്ത്രി വി.എസ്​. സുനിൽ കുമാർ സിനിമയിലേക്ക്

ചെറുതുരുത്തി: മന്ത്രി വി.എസ്​. സുനിൽ കുമാർ സിനിമയിൽ അഭിനയിക്കുന്നു.

ചെറുതുരുത്തി സ്വദേശി സിദ്ദീക്ക് വള്ളത്തോൾ കഥയും തിരക്കഥയും സംവിധാനവും നിർവഹിക്കുന്ന 'ചെമ്പാവ്' ചിത്രത്തിലാണ് മന്ത്രി അഭിനയിക്കുക​. കൃഷിക്കും കർഷകനും പ്രധാന്യം നൽകുന്ന സിനിമ ആയതിനാൽ കൃഷിമന്ത്രി എന്ന നിലയിൽ വിട്ടുനിൽക്കാൻ പറ്റില്ലെന്നും അഭിനയിക്കുന്നതിൽ ഏറെ സന്തോഷമുണ്ടെന്നും സുനിൽ കുമാർ പറഞ്ഞു.

സിനിമയുടെ സ്വിച്ച് ഓൺ കർമവും സിനിമക്കുവേണ്ടി തരിശ് ഭൂമിയിൽ നടത്തിയ നെൽകൃഷിയുടെ കൊയ്​ത്തുത്സവം ഉദ്​ഘാടനവും മന്ത്രി നിർവഹിച്ചു.

യു.ആർ. പ്രദീപ് എം.എൽ.എ അധ്യക്ഷത വഹിച്ചു. കലാമണ്ഡലം വൈസ് ചാൻസലർ ഡോ. ടി.കെ. നാരായണൻ സിനിമയുടെ ബ്രോഷർ പ്രകാശനം ചെയ്തു.

ഗ്രാമപഞ്ചായത്ത് പ്രസിഡൻറ്​ ഷെയ്ക്ക് അബ്​ദുൽ ഖാദർ, ബ്ലോക്ക് അംഗം അരുൺ കാളിയത്ത്, രാഷ്​ട്രീയ കക്ഷി നേതാക്കളായ തമ്പി മണി, ഒ.യു. ബഷീർ, സുലൈമാൻ, കലാനിള ആർട്സ് ആൻഡ്​ കൾച്ചറൽ സൊസൈറ്റി ഭാരവാഹികളായ ജയൻ പേരാമംഗലം, ഗാന രചയിതാവ് സത്യൻ കോട്ടപ്പടി, മെയ്തീൻകുട്ടി, വിപിൻ ബേബി എന്നിവർ സംസാരിച്ചു.