'പക്ഷികൾക്ക്​ പറയാനുള്ളത്​' യു.എസിലെ വനിത ഫിലിം ഫെസ്​റ്റവലിലേക്ക്​

തൃശൂർ: സുധ രാധിക സംവിധാനം ചെയ്​ത 'പക്ഷികൾക്ക്​ പറയാനുള്ളത്​' സിനിമ​ ഡിസംബറി​ൽ യു.എസിലെ ഡെൽവെയറിൽ നടക്കുന്ന ഡബ്ല്യു.ആർ.പി.എൻ ഇൻറർനാഷനൽ വിമൻ ഫിലിം ഫെസ്​റ്റവലിലേക്ക്​ തെരഞ്ഞെടുക്കപ്പെട്ടു. സിനിമയിലെ നായികയായ നിലാഞ്​ജനയെ ഫീമെയിൽ ലീഡ്​ ഇൻ കോമ്പറ്റീഷൻ മത്സര വിഭാഗത്തിലേക്കാണ്​ തെരഞ്ഞെടുത്തത്​. മസ്​കത്തിൽ അമേരിക്കൻ ഇൻറർനാഷണൽ സ്​കൂളിലെ വിദ്യാർഥിനിയാണ്​ നിലാഞ്​ജന. കുട്ടികൾക്ക്​ നേരെയുള്ള ലൈംഗികാതിക്രമങ്ങളും അതിലേക്ക്​ നയിക്കുന്ന സാഹചര്യങ്ങളുമാണ്​ ഇതിവൃത്തം.

ഗിരീഷ്​ പുത്തഞ്ചേരിയുടെതായി മലയാളികൾക്ക്​ ലഭിക്കുന്ന അവസാന ഗാനങ്ങളാണ്​ സിനിമയുടെ പ്രത്യേകതയെന്ന്​ സംവിധായിക സുധ രാധിക വാർത്താസമ്മേളനത്തിൽ അറിയിച്ചു. ഷഹബാസ്​ അമനാണ്​ ഇൗണം നൽകിയത്​. അദ്ദേഹം ഒരു ഗാനം ആലപിച്ചിട്ടുണ്ട്​. അഞ്ച്​ പാട്ടുകളാണ്​സിനിമയിലുള്ളത്​.

സിനിമയിൽ പാടിയ ഹരിത ഹരീഷ്​, അഞ്​ജലി വാര്യർ എന്നിവർ പുതുമുഖങ്ങളാണ്​. മില്ലേനിയം ഓഡിയോസാണ്​ യൂട്യൂബ്​ റിലീസ്​ ചെയ്​തത്​. 50 ലക്ഷം രൂപക്കാണ്​ സിനിമ പൂർത്തിയാക്കിയതെന്നും സമാന്തര സിനിമ റിലീസിങിനുള്ള​ മാർഗങ്ങളാണ്​ തേടുന്നതെന്നും അവർ അറിയിച്ചു. വാർത്താസമ്മേളനത്തിൽ നായിക നിലാഞ്​ജന, സുധ രാധിക, അഞ്​ജലി വാര്യർ, ഹരിത ഹരീഷ്​ എന്നിവർ പ​ങ്കെടുത്തു.