മലയാള സിനിമ മേഖലയും കേരളം വിടുന്നു; ഏഴ്​ ചിത്രങ്ങളുടെ ഷൂട്ടിങ്​ അയൽ സംസ്​ഥാനങ്ങളിലേക്ക്​

തിരുവനന്തപുരം: കോവിഡ്​ നിയന്ത്രണങ്ങളുടെ പശ്ചാത്തലത്തിൽ ചലച്ചിത്ര മേഖലയും കേരളം വിടുന്നു. ഏഴ്​ സിനിമകളുടെ ഷൂട്ടിങ്ങാണ്​ തമിഴ്​നാട്​, തെലങ്കാന, കർണാടക എന്നീ സംസ്​ഥാനങ്ങളിലേക്ക്​ മാറ്റിയത്​. മോഹൻലാലിനെ നായകനാക്കി പൃഥ്വിരാജ്​ സംവിധാനം ചെയ്യുന്ന 'ബ്രോ ഡാഡി' അടക്കമുള്ള ചിത്രങ്ങളുടെ ഷൂട്ടിങ്ങാണ്​ ഇൻഡോർ ഷൂട്ടിങ്ങിന്​ പോലും അനുമതിയില്ലാത്തതിനെ തുടർന്ന്​ കേരളത്തിന്​ പുറത്തേക്ക്​ പോകുന്നത്​. തെലങ്കാനയിലെ ഹൈദരാബാദിൽ വെച്ചാകും ബ്രോഡാഡി ചിത്രീകരിക്കുക.

ചിത്രീകരണത്തിന്​ അനുമതി നൽകണമെന്നാവശ്യപ്പെട്ട് സിനിമ രംഗത്തുള്ള നിരവധിയാളുകളും​ ഫെഫ്​കയടക്കമുള്ള സംഘടനകളും രംഗത്തു വന്നിരുന്നു. സീരിയൽ ഷൂട്ടിങ്ങിന്​ ആഴ്ചകൾക്ക്​ മു​േമ്പ അനുവാദം നൽകിയിട്ടും സിനിമക്ക് മാത്രമാണ്​ അനുവാദമില്ലാത്തതെന്ന്​ ഫെഫ്ക കുറ്റപ്പെടുത്തി. ഭൂരിപക്ഷം ചലച്ചിത്ര പ്രവർത്തകരും ആദ്യ ഡോസ്​ വാക്​സിൻ സ്വീകരിച്ചിട്ടുണ്ടെന്നും അവർ സൂചിപ്പിച്ചു.

സംസ്​ഥാനത്ത്​ തന്നെ ഷൂട്ടിങ്​ നടത്താൻ പരമാവധി ശ്രമിച്ചെന്നും എന്നാൽ ഒരു വഴിയുമില്ലാതെയാണ് അവസാനം ഹൈദരാബാദിലേക്ക് ഷൂട്ടിങ്​ മാറ്റേണ്ടി വന്നതെന്നും നിർമാതാവ്​ ആൻ്റണി പെരുമ്പാവൂർ പ്രതികരിച്ചു. ചുരുങ്ങിയത്​ 50 അണിയറക്കാരെ ഉപയോഗിച്ച്​ കൊണ്ട്​ ചിത്രീകരണം തുടങ്ങാൻ പറ്റുന്ന തരത്തിൽ സിനിമാ മേഖല തുറക്കുന്ന കാര്യം സർക്കാർ അടിയന്തര പ്രാധാന്യത്തോടെ പരിഗണിക്കണമെന്ന് സംവിധായിക വിധു വിന്‍സെന്‍റ് ആവശ്യപ്പെട്ടു.

സിനിമക്കാര്‍ പട്ടിണിയിലാണെന്നും തിയറ്ററുകള്‍ തുറക്കണമെന്നും ഷൂട്ടിങ്​ പുനരാരംഭിക്കണമെന്നും പ്രൊഡക്ഷന്‍ കണ്‍ട്രോളര്‍ എന്‍.എം ബാദുഷ ആവശ്യപ്പെട്ടു. ജീത്തു ജോസഫ് സംവിധാനം ചെയ്യുന്ന മോഹൻലാൽ ചിത്രവും കേരളത്തിൽ ചിത്രീകരിക്കാനായിരുന്നു പദ്ധതിയിട്ടിരുന്നത്​. ഇടുക്കിയിൽ ഇതിനായി വലിയ സെറ്റും ഇ​ട്ടെങ്കിലും ചി​ത്രത്തിന്‍റെ ഷൂട്ടിങ്ങും അയൽസംസ്​ഥാനങ്ങളിലേക്ക്​ മാറ്റേണ്ട സാഹചര്യമാണെന്നാണ്​ റിപ്പോർട്ടുകൾ.