ഗോവ അന്താരാഷ്ട്ര ചലച്ചിത്രോത്സവത്തിന് തുടക്കം

പനാജി: 53-ാമത് അന്താരാഷ്ട്ര ചലച്ചിത്രോത്സവത്തിന് ഗോവയിൽ തുടക്കം. അജയ് ദേവ്ഗൺ, കാർത്തിക് ആര്യൻ, പങ്കജ് ത്രിപാഠി, മനോജ് ബാജ്പെയ്, സുനിൽ ഷെട്ടി, വരുൺ ധവാൻ, സാറാ അലിഖാൻ തുടങ്ങിയ താരങ്ങൾ ഉദ്ഘാടനച്ചടങ്ങിൽ പ​​​​ങ്കെടുത്തു.

ഗോവ അന്താരാഷ്ട്ര ചലച്ചിത്രോത്സവ വേദിയെ സിനിമ രചനയുടെയും നിർമാണത്തിന്റെയും ഷൂട്ടിങ്ങിന്റെയും കേന്ദ്രമാക്കി വികസിപ്പിക്കുമെന്ന് കേന്ദ്ര വാർത്ത വിതരണ പ്രക്ഷേപണ മന്ത്രി അനുരാഗ് ഠാകുർ. ഉദ്ഘാടനച്ചടങ്ങിന് മുന്നോടിയായി സംസാരിക്കുകയായിരുന്നു അദ്ദേഹം. ഏഷ്യയിലെ ഏറ്റവും വലിയ ചലച്ചിത്രോത്സവ വേദി എന്ന നിലയിൽ ഇന്ത്യയെ ആ​ഗോള ചലച്ചിത്ര ഹബ് ആക്കുകയാണ് ലക്ഷ്യം. ഇന്ത്യൻ സിനിമകൾ അന്താരാഷ്ട്ര സിനിമകളായി പ്രശസ്തി നേടിക്കൊണ്ടിരിക്കുകയാണെന്നും അദ്ദേഹം ചൂണ്ടിക്കാട്ടി.

ഡീറ്റർ ബെർണർ സംവിധാനം ചെയ്ത ഓസ്ട്രിയൻ ചിത്രം 'അൽമ ആൻഡ് ഓസ്കർ' ആണ് ഈ വർഷത്തെ ഉദ്ഘാടന ചിത്രം. 79 രാജ്യങ്ങളിൽനിന്നുള്ള 280 സിനിമകൾ ഐ.എഫ്.എഫ്.ഐയിൽ പ്രദർശിപ്പിക്കും.

സത്യജിത് റേ ലൈഫ് ടൈം അച്ചീവ്‌മെന്റ് അവാർഡിന് അർഹരായ ആശാ പരേഖ്, സ്പാനിഷ് ചലച്ചിത്ര നിർമാതാവ് കാർലോസ് സൗറ എന്നിവരെക്കുറിച്ചുള്ള ചിത്രങ്ങൾ റെട്രോസ്​പെക്ടിവ് വിഭാഗത്തിൽ പ്രദർശിപ്പിക്കും. സൗറയുടെ 'ലാ കാസ ഡെൽ കോനെജോ', 'അന വൈ ലോസ് ലോബോസ്' എന്നിവയുൾപ്പെടെ എട്ട് സിനിമകൾ പ്രദർശിപ്പിക്കും. പരേഖിന്റെ 'തീസ്‌രി മൻസിൽ', 'ദോ ബദൻ', 'കടി പതംഗ്' എന്നിവയും പ്രദർശിപ്പിക്കും.