'അടിത്തട്ട്​' സിനിമ കാണാനെത്തുന്നവരെ തിരിച്ചയക്കുന്നു -സംവിധായകൻ

കൊച്ചി: വെള്ളിയാഴ്ച റിലീസ്​ ചെയ്ത മലയാളചിത്രം 'അടിത്തട്ട്​' കാണാനെത്തുന്നവരെ തിയറ്ററുകളിൽ നിരുത്സാഹപ്പെടുത്തി തിരിച്ചയക്കുന്നതായി സംവിധായകൻ ജിജോ ആന്‍റണി. കൊച്ചിയിൽ വാർത്തസമ്മേളനത്തിലാണ്​ ഇക്കാര്യം വ്യക്തമാക്കിയത്​.

കടപ്പുറത്തെ ജീവിതവും ഭാഷയും ശൈലിയും കോർത്തിണക്കി തയാറാക്കിയ ചിത്രത്തിൽ ഷൈൻ ടോം ചാക്കോയും സണ്ണിവെയ്​നുമാണ്​ നായകന്മാർ​. ഒരുവർഷ​ത്തിലേറെ കഷ്ടപ്പെട്ടാണ്​ ചിത്രം പൂർത്തിയാക്കിയത്​. നല്ല സിനിമയെടുത്താലും തിയറ്ററിൽ ആളുകളെ കയറ്റാൻ പണവും ബിരിയാണിയും കൊടുക്കേണ്ട സ്ഥിതിയാണ്​.

ചില തിയറ്ററുകളിൽ കയറാനെത്തുന്ന പ്രേക്ഷകരിൽ തെറ്റിദ്ധാരണ പരത്തി തിരിച്ചയക്കുന്ന രീതി ശരിയല്ല. ചിത്രം കണ്ടശേഷമാണ്​ വിലയിരുത്തൽ നടത്തേണ്ടതെന്നും അദ്ദേഹം പറഞ്ഞു. വാർത്തസമ്മേളനത്തിൽ തിരക്കഥകൃത്ത്​ ഖൈസ്​ മിലനും പ​ങ്കെടുത്തു.