സി.ഐ.ഡി മൂസയുടെ രണ്ടാംഭാഗം; ചിത്രത്തിനെ കുറിച്ച് ദിലീപ്

ദിലീപിന്റെ സൂപ്പർ ഹിറ്റ് ചിത്രങ്ങളാണ് സി.ഐ.ഡി മൂസയും റൺവേയും. ഇന്നും ഈ ചിത്രങ്ങൾ മിനിസ്ക്രീനിൽ ചിരി പടർത്തുന്നുണ്ട്. നേരത്തെ ചിത്രങ്ങളുടെ രണ്ടാംഭാഗം വരുന്നതായി വാർത്തകൾ പ്രചരിച്ചിരുന്നു. പിന്നീട് മറ്റു വിവരങ്ങൾ പുറത്തു വന്നിരുന്നില്ല. എന്നാൽ ഇപ്പോൾ ചിത്രത്തിന്റെ രണ്ടാംഭാഗത്തെ കുറിച്ച് വെളിപ്പെടുത്തുകയാണ് ദിലീപ് . സഹോദരൻ അനൂപ് പത്മനാഭൻ ആദ്യമായി സംവിധാനം ചെയ്യുന്ന ചിത്രമായ തട്ടാശ്ശേരി കൂട്ടത്തിന്റെ പ്രമോഷന്റെ ഭാഗമായിട്ടുള്ള പ്രസ്മീറ്റിലാണ് ഇക്കാര്യം പറഞ്ഞത്.

'റൺവേ, സി.ഐ.ഡി മൂസ 2 തുടങ്ങിയ ചിത്രങ്ങളുടെ രണ്ടാംഭാഗം വരണമെന്ന് തന്നെക്കാൾ കൂടുതൽ ആഗ്രഹിക്കുന്നത് പ്രേക്ഷകരാണ്. എന്നാൽ ആദ്യഭാഗം എഴുതിയ തിരക്കഥാകൃത്തുക്കൾ ഇപ്പോൾ വേർപിരിഞ്ഞു. അവരെ ഒന്നിപ്പിക്കാനായി നടക്കുകയാണ് ഞാനും ജോണിയും ജോഷി സാറും'- ദിലീപ് പറഞ്ഞു.

ഉദയ് കൃഷ്ണയും സിബി കെ തോമസും ചേർന്നാണ് ഈ രണ്ട് ചിത്രങ്ങൾക്കും തിരക്കഥ ഒരുക്കിയത്. ജോഷിയാണ് 2004 ൽ ദിലീപിനെ കേന്ദ്രകഥാപാത്രമാക്കി റൺവേ ഒരുക്കിയത്. നടന്റെ കരിയർ മാറ്റിയ ഒരു ചിത്രമാണ് ജോണി ആന്റണിയുടെ സി.ഐ.ഡി മൂസ.