‘ജാനകി’ ആരുടെ വികാരമാണ് വ്രണപ്പെടുത്തുന്നത്..?, സെൻസർ ബോർഡ് പറയുന്നത് പോലെ സിനിമ ചെയ്യണോ..?; വിശ്വസനീയമായ ന്യായമുണ്ടെങ്കിൽ ഹാജരാക്കൂവെന്ന് ഹൈകോടതി

കൊച്ചി: ‘ജാനകി V/S സ്റ്റേറ്റ് ഓഫ് കേരള (ജെ.എസ്.കെ)’ എന്ന സിനിമയുടെ പേര്​ ചില മതവിഭാഗങ്ങളെ അപകീർത്തിപ്പെടുത്തുന്നതാ​ണെന്ന ആരോപണം​ പ്രഥമദൃഷ്​ട്യാ നിലനിൽക്കുന്നതല്ലെന്ന്​ ഹൈകോടതി.

മത, വംശീയ വികാരങ്ങളെ വ്രണപ്പെടുത്തുന്ന വാക്കുകളും ദൃശ്യങ്ങളും ഒഴിവാക്കണമെന്നാണ് സിനിമ സർട്ടിഫിക്കേഷൻ മാർഗനിർ​ദേശങ്ങളിലുള്ളത്. എന്നാൽ ‘ജാനകി’ എന്ന പേര് ആരുടെ വികാരമാണ് വ്രണപ്പെടുത്തുന്നതെന്ന് മനസ്സിലാകുന്നില്ല. രാജ്യത്തെ 80 ശതമാനം ആളുകൾക്കും മതവുമായി ബന്ധ​പ്പെട്ട പേരാണുള്ളതെന്നും ജസ്റ്റിസ്​ എൻ. നഗരേഷ്​ ചൂണ്ടിക്കാട്ടി. സുരേഷ് ഗോപി നായകനായ സിനിമക്ക് സെൻസർ സർട്ടിഫിക്കറ്റ് വൈകുന്നതിനെതിരെ നിർമാതാക്കളായ ‘കോസ്മോ എന്റർടെയ്ൻമെന്റ്സ്’ നൽകിയ ഹരജിയാണ്​ കോടതി പരിഗണിച്ചത്​.

സിനിമയുടെ പേര് മൂന്ന് മാസംമുമ്പ് അംഗീകരിച്ചതാണെന്നും പ്രദർശനത്തോടനുബന്ധിച്ച്​ സമാന നടപടിക്രമങ്ങൾ പൂർത്തിയാക്കാൻ സെൻസർ​ ബോർഡിന്​ സമർപ്പിച്ചപ്പോഴാണ്​ പേര്​ മാറ്റാൻ ആവശ്യപ്പെട്ടതെന്നും ഹരജിക്കാർക്ക്​ വേണ്ടി അഡ്വ. ഹാരിസ് ബീരാൻ എം.പി ചൂണ്ടിക്കാട്ടി.

‘ജാനകി ജാനേ’ എന്ന പേരിൽ 2023ൽ മലയാളത്തിൽ സിനിമ ഇറങ്ങിയപ്പോൾ പ്രശ്നമുണ്ടായിട്ടില്ല. സിനിമയുടെ റിലീസിങ്​ നീളുന്നത് ഏറെ ബുദ്ധിമുട്ടുണ്ടാക്കുന്നുണ്ട്​. സെൻസർ ബോർഡ് തീരുമാനത്തിനെതിരേ ഫിലിം സർട്ടിഫിക്കേഷൻ അപ്പലേറ്റ് ട്രൈബ്യൂണലിനെ സമീപിക്കാമെന്ന്​ ആക്ടിലുണ്ടെങ്കിലും 2021ൽ ട്രൈബ്യൂണൽ പിരിച്ചുവിട്ടതിനാൽ കോടതിയാണ് ആശ്രയമെന്നും ഹരജിക്കാർ വാദിച്ചു. എന്നാൽ, മതവിഭാഗങ്ങളുടെ വികാരം വ്രണപ്പെടുത്തുന്ന ഘടകങ്ങളുള്ളതിനാലാണ്​ റിവൈസിങ്​ കമ്മിറ്റി മാറ്റങ്ങൾ നിർദേശിച്ചതെന്ന്​ സെൻസർ ബോർഡിന്​ വേണ്ടി കേന്ദ്ര സർക്കാർ അഭിഭാഷക അറിയിച്ചു. അപ്പോഴാണ്​ ആരുടെ വികാരമാണ്​ സിനിമ വ്രണപ്പെടുത്തുന്നതെന്ന്​ കോടതി ചോദിച്ചത്.

സിനിമയുടെ പേര്​ മാറ്റണമെന്ന്​ പറയുന്നതെന്തിനാണ്​. സെൻസർ ബോർഡ്​ പറയുന്നതുപോലെ വേണമോ സംവിധായകരും നടീനടൻമാരും ചെയ്യാൻ. കലാകാരന്‍റെ ആവിഷ്കാര സ്വാതന്ത്ര്യമാണ് സിനിമ​. ​അതിൽ ഇടപെടണമെങ്കിൽ വിശ്വസനീയവും ന്യായവുമായ കാരണമുണ്ടാവണം. എന്താണ്​ ജാനകി എന്ന പേരിലും സിനിമയിലുമുള്ള തെ​റ്റെന്ന്​ ചോദിച്ച കോടതി, ആ കഥാപാത്രം ​ആരെയാണ്​ പ്രതിനിധീകരിക്കുന്നതെന്നും ചോദിച്ചു. മാനഭംഗത്തിനിരയായ കഥാപാത്രത്തിനാണ് ജാനകി എന്ന പേരുള്ളതെന്ന് കേന്ദ്ര സർക്കാർ വ്യക്​തമാക്കി. നീതിക്ക് വേണ്ടി പോരാടുന്ന അതിജീവിതയാണ് ജാനകിയെന്ന് ഹരജിക്കാരും വാദിച്ചു. ജാനകി ബലാത്സംഗം ചെയ്ത കഥാപാത്രമല്ലല്ലോയെന്നും​ പോരാടി ജയിച്ച നായികയല്ലേയെന്നും കോടതി ചോദിച്ചു.

സെൻസർ ബോർഡിന്റെ എതിർ സത്യവാങ്മൂലം സമർപ്പിക്കാൻ നിർദേശിച്ച കോടതി, ഹരജി വീണ്ടും ബുധനാഴ്ച പരിഗണിക്കാൻ മാറ്റി. ‘ജാനകി’ എന്ന പേര് ഒഴിവാക്കണമെന്നാവശ്യപ്പെടുന്നതിന്‍റെ ന്യായങ്ങളുണ്ടെങ്കിൽ ഹാജരാക്കാനും അനിശ്ചിതമായി ഹരജി നീട്ടിക്കൊണ്ടു പോകാനാവില്ലെന്നും വ്യക്​തമാക്കി. സിനിമ കണ്ട്​ തീരുമാനമെടുക്കാനുള്ള ആവശ്യമുണ്ടായെങ്കിലും കോടതി നിരസിച്ചു.