'ആൻഡ്രോയ്ഡ് കുഞ്ഞപ്പൻ' സിനിമ മോഷണമെന്ന് ആരോപിച്ച് മന്ത്രിക്ക് പരാതി

കൊച്ചി: മികച്ച നവാഗത സംവിധായകൻ, നടൻ, മികച്ച കലാസംവിധായകൻ എന്നിങ്ങ​െന കേരള സംസ്ഥാന ചലച്ചിത്ര പുരസ്കാരങ്ങൾ നേടിയ ശ്രദ്ധേയമായ സിനിമ 'ആൻഡ്രോയ്ഡ് കുഞ്ഞപ്പൻ വേർഷൻ 5.25' അമേരിക്കൻ ചിത്രം കോപ്പിയടിച്ചതാണെന്ന ആരോപണവുമായി മന്ത്രിക്ക് പരാതി. മൂവ്മെൻറ്​ ഫോർ ഇൻഡിപെൻഡൻറ്​ സിനിമ സംഘടന പ്രസിഡൻറ് സന്തോഷ് ബാബുസേനൻ, സെക്രട്ടറി കെ.പി. ശ്രീകൃഷ്ണൻ എന്നിവരുടെ നേതൃത്വത്തിലാണ് സിനിമ മോഷണമാണെന്ന് കാണിച്ച് സാംസ്കാരിക മന്ത്രി സജി ചെറിയാന് പരാതി നൽകിയത്.

ക്രിസ്​റ്റഫർ ഫോർഡി​െൻറ തിരക്കഥയിൽ ജേക്ക് ഷ്രയർ സംവിധാനം ചെയ്ത് 2012ൽ പുറത്തിറങ്ങിയ 'റോബോട്ട് ആൻഡ്​ ഫ്രാങ്ക്' എന്ന അമേരിക്കൻ ചിത്രത്തി​െൻറ ആശയവും സീനുകളും അതേപടി പകർത്തിയാണ് 'ആൻഡ്രോയ്ഡ് കുഞ്ഞപ്പൻ വേർഷൻ 5.25' ചെയ്തതെന്ന ആരോപണം ഉയർന്നിട്ടുണ്ടെന്ന് പരാതിയിൽ വ്യക്തമാക്കുന്നു. രണ്ട് സിനിമകളും കണ്ട പ്രേക്ഷകർ ആരോപണം ശരിയാണെന്ന് ഉറപ്പിക്കുകയാണ്.

സംസ്ഥാന ചലച്ചിത്ര അവാർഡും ഫിപ്രസി അവാർഡും നേടിയതും ദേശീയ- അന്തർദേശീയ സിനിമ പ്രേക്ഷകർ പങ്കെടുക്കുന്ന ഐ.എഫ്.എഫ്.കെ പോലെയുള്ള ഒരു രാജ്യാന്തര ചലച്ചിത്രമേളയിൽ പ്രദർശിപ്പിക്കപ്പെടുകയും ചെയ്ത സിനിമക്കെതിരെയാണ് പരാതിയെന്നതിനാൽ ഗൗരവമായി കാണണം. സംസ്ഥാന ചലച്ചിത്ര അവാർഡി​െൻറയും ഐ.എഫ്.എഫ്.കെയുടെയും സംഘടനച്ചുമതലയുള്ള കേരള ചലച്ചിത്ര അക്കാദമിക്ക് പ്രശ്നത്തി​െൻറ ഉത്തരവാദിത്തത്തിൽനിന്ന് ഒഴിഞ്ഞുമാറാൻ കഴിയില്ല.

ചലച്ചിത്ര അവാർഡിനും ഐ.എഫ്.എഫ്.കെക്കും സിനിമകൾ സമർപ്പിക്കുമ്പോൾ സ​ൃഷ്​ടി മൗലികമാണ് എന്ന ഒരു സത്യവാങ്മൂലം അപേക്ഷയോടൊപ്പം സമർപ്പിക്കുന്നുണ്ട്. സത്യവാങ്മൂലം എഴുതിവാങ്ങുന്നു എന്നല്ലാതെ ചലച്ചിത്ര അക്കാദമി ഒരുതരത്തിലുള്ള പരിശോധനയും നടത്തുന്നില്ല എന്നാണ് ഇത് തെളിയിക്കുന്നതെന്നും അവർ ആരോപിച്ചു.