'അന്യൻ' ഹിന്ദി റീമേക്ക്​ പ്രതിസന്ധിയിൽ; ശങ്കറിനെ കോടതി കയറ്റാനൊരുങ്ങി ആസ്​കാർ രവിചന്ദ്രൻ

മുംബൈ: തമിഴിലെ മെഗാഹിറ്റ്​ ചിത്രമായ അന്യന്‍റെ ഹിന്ദി റിമേക്കിന്‍റെ ഉടമസ്​ഥാവകാശത്തെ ചൊല്ലി തർക്കം. അന്യന്‍റെ നിർമാതാവായ ആസ്​കാർ രവിചന്ദ്രനാണ്​ സംവിധായകൻ ശങ്കറിനും നിർമാതാവ്​ ജയന്തിലാൽ ഗാഡക്കുമെതിരെ നിയമനടപടി സ്വീകരിക്കാൻ ഒരുങ്ങുന്നത്​. ശങ്കറിനെതിരെ രവിചന്ദ്രൻ നേരത്തെ സൗത്ത്​ ഇന്ത്യൻ ഫിലം ചേമ്പർ ഓഫ്​ കൊമേഴ്​സിൽ പരാതി നൽകിയിരുന്നു.

'ഞാന്‍ ശങ്കറിനും ജയന്തിലാൽ ഗാഡക്കുമെതിരെ നിയമനടപടികള്‍ സ്വീകരിക്കുകയാണ്. എന്‍റെ സമ്മതം ഇല്ലാതെ അവര്‍ക്ക് സിനിമ റീമേക്ക് ചെയ്യാനാവില്ല. കാരണം സിനിമയുടെ പകർപ്പവകാശം എ​േന്‍റതാണ്​'-രവിചന്ദ്രൻ പറഞ്ഞു. അന്യന്‍റെ​ തിരക്കഥയൊരുക്കിയത്​ താനാണെന്നായിരുന്നു ശങ്കറിന്‍റെ പ്രതികരണം​.

'അവന്​ എന്തുവേണമെങ്കിലും പറയുകയും അവകാശപ്പെടു​കയും ചെയ്യാം. അന്യൻ എന്‍റെ സിനിമയാണെന്ന്​ എല്ലാവർക്കുമറിയാം. ഞാൻ അവനെ സംവിധാനം ചെയ്യാൻ വിളിക്കുകയായിരുന്നു'- ചേംബറിന്‍റെ പിന്തുണയുണ്ടെന്ന്​ സൂചിപ്പിച്ച്​ രവിചന്ദ്രൻ പറഞ്ഞു.

നടൻ വിക്രം നായകനായി അഭിനയിച്ച അന്യന്‍റെ ഹിന്ദി റീമേക്കിനെ കുറിച്ച്​ സോഷ്യൽ മീഡിയയിലൂടെ അറിഞ്ഞ്​ താൻ ഞെട്ടിപ്പോയെന്ന്​ രവിചന്ദ്രൻ പറഞ്ഞു. 'എന്‍റെ അറിവില്ലാതെ ചിത്രത്തിന്‍റെ റീമേക്ക്​ പ്രഖ്യാപിച്ചപ്പോൾ ഞാൻ ഞെട്ടിപ്പോയി. സിനിമ ചരിത്രത്തിൽ ആദ്യമായിട്ടാകും ഇങ്ങനെ സംഭവിക്കുന്നത്​'-രവിചന്ദ്രൻ പറഞ്ഞു. രൺവീർ സിങ്ങിനെ നായകനാക്കി അന്യന്‍റെ ഹിന്ദി റീമേക്ക്​ ഒരുക്കുന്ന വിവരം ഈ വർഷം ഏപ്രിലിലാണ്​ ശങ്കർ പ്രഖ്യാപിച്ചത്​.

അന്യനിൽ നിന്ന്​ പ്രചോദനം ഉൾകൊണ്ട്​ ചിത്രം വർത്തമാനകാലത്തേക്ക്​ പുനരാവിഷ്​കരിക്കാൻ ഒരുങ്ങുകയായിരുന്നു​ ശങ്കർ. റീമേക്ക് എന്നതിനു പകരം 'ഒഫിഷ്യല്‍ അഡാപ്റ്റേഷന്‍' എന്നാണ് പ്രോജക്റ്റ് പ്രഖ്യാപന വേളയിൽ​ സാമൂഹിക മാധ്യമങ്ങളിൽ ശങ്കർ ചിത്രത്തെ വിശേഷിപ്പിക്കുന്നത്​. 2022 മധ്യത്തോടെ ചിത്രീകരണം ആരംഭിക്കാനായിരുന്നു പദ്ധതി.

2005ൽ പുറത്തിറങ്ങിയ അന്യനിൽ 'മൾടിപ്​ൾ പേഴ്​സനാലിറ്റി ഡിസോഡർ' ബാധിച്ച വ്യക്തിയുടെ വേഷമായിരുന്നു വിക്രം കൈകാര്യം ചെയ്​തിരുന്നത്​​. അമ്പി, റെമോ, അന്യൻ എന്നിങ്ങനെ മൂന്ന് വേഷ-ഭാവ പകർച്ച കൊണ്ട് വിക്രം ഏവരെയും ഞെട്ടിച്ചു. താരത്തിന്‍റെ കരിയറിലെ ഏറ്റവും വലിയ ഹിറ്റുകളിൽ ഒന്നാണ്​ അന്യൻ. ഹിന്ദിയിൽ 'അപരിചിത്' തെലുഗുവിൽ 'അപരിചിതുടു' എന്നീ പേരിലും മൊഴിമാറ്റിയിരുന്നു. ചിത്രത്തിന് ​മികച്ച സ്​പെഷ്യൽ എഫക്​ടിനുള്ള ആ വർഷത്തെ ദേശീയ പുരസ്​കാരം ലഭിച്ചിരുന്നു.

സദ, നെടുമുടി വേണു, പ്രകാശ്​ രാജ്​, വിവേക്​, നാസർ എന്നിവർ പ്രധാന വേഷങ്ങളിലെത്തിയ അന്യൻ 53ാമത്​ ഫിലിം ഫെയർ അവാർഡിൽ​​ (സൗത്ത്​) മികച്ച സിനിമ, മികച്ച നടൻ, മികച്ച സംവിധായകൻ ഉൾപ്പെടെ നിരവധി പുരസ്​കാരങ്ങൾ വാരിക്കൂട്ടി.

റിലീസ്​ സമയത്ത്​ ചിത്രത്തിന്​ കേരളത്തിലും വൻ വരവേൽപായിരുന്നു ലഭിച്ചിരുന്നത്​. ശങ്കറിന്‍റെ കഥക്ക്​ സുജാതയാണ്​ സംഭാഷണങ്ങൾ ഒരുക്കിയത്​. ആസ്‍കാര്‍ ഫിലിംസിന്‍റെ ബാനറില്‍ വി. രവിചന്ദ്രന്‍ നിര്‍മ്മിച്ച ചിത്രത്തിനായി ഹാരിസ്​ ജയരാജ്​ ഈണമിട്ട ഗാനങ്ങളും സൂപ്പർ ഹിറ്റായി മാറി.