അക്ഷയ്​ കുമാർ ചിത്രം 'ലക്ഷ്​മി ബോംബ്'​ റിലീസ്​ ഡേറ്റ്​ പ്രഖ്യാപിച്ച്​ ഡിസ്നി പ്ലസ്​ ഹോട്​സ്റ്റാർ

ബോളിവുഡ്​ സൂപ്പർതാരം അക്ഷയ്കുമാറി​െൻറ പുതിയ ചിത്രം ലക്ഷ്മി ബോംബ് നവംബര്‍ 9ന് ദീപാവലി ദിനത്തിൽ നേരിട്ട്​​ ഡിസ്‌നി പ്ലസ് ഹോട്‌സ്റ്റാറിൽ റിലീസ്​ ചെയ്യും. ബോളിവുഡ്​ ചരിത്രത്തിൽ തന്നെ ഒരു ചിത്രത്തിന്​ ലഭിക്കുന്ന ഏറ്റവും ഉയർന്ന തുകയായ 125 കോടിക്കാണ് ഹോട്​സ്റ്റാർ ലക്ഷ്​മി ബോംബ്​ സ്വന്തമാക്കിയതെന്നാണ്​ റിപ്പോർട്ട്​. ഫോക്‌സ്റ്റാറിനൊപ്പം സഹകരിച്ച് അക്ഷയ്കുമാറും തുഷാര്‍ കപൂറുമാണ് ലക്ഷ്മി ബോംബ് നിര്‍മ്മിച്ചിരിക്കുന്നത്.

തമിഴില്‍ രാഘവലോറന്‍സ് സംവിധാനം ചെയ്​ത്​ നായകനായി വേഷമിട്ട 'കാഞ്ചന' യുടെ ഹിന്ദി റീമേക്കാണ് 'ലക്ഷ്മി ബോംബ് '. ദക്ഷിണേന്ത്യയിൽ വന്‍വിജയം നേടിയ ചിത്രത്തി​െൻറ ബോളിവുഡ്​ റീമേക്കിനായി അക്ഷയ്​ കുമാർ താൽപര്യം അറിയിക്കുകയായിരുന്നു. രാഘവാ ലോറന്‍സ് തന്നെയാണ് റീമേക്കും സംവിധാനം ചെയ്തിരിക്കുന്നത്​. കിയാറ അദ്വാനിയാണ് നായിക.

സൽമാൻ ഖാ​െൻറ 'രാധേ' എന്ന ബിഗ്​ ബജറ്റ്​ ചിത്രവും അക്ഷയ്​ കുമാറി​െൻറ ലക്ഷ്​മി ബോംബും ഇൗദ്​ റിലീസായി എത്തേണ്ടതായിരുന്നു. ബോളിവുഡിലെ ഏറ്റവും വലിയ സൂപ്പർ സ്റ്റാറുകളുടെ ചിത്രങ്ങൾ ഒരുമിച്ചെത്തുന്ന ദിനത്തിന്​ കാത്തിരുന്ന ആരാധകർക്ക്​ നിരാശ സമ്മാനിച്ചുകൊണ്ടായിരുന്നു കോവിഡ്​ മഹാമാരിയുടെ രംഗപ്രവേശം. കോവിഡ്​ ലോക്​ഡൗണിനെ തുടർന്ന്​ നിരവധി ബോളിവുഡ്​ ചിത്രങ്ങളാണ്​ ഒടിടി റിലീസായി പ്രഖ്യാപിച്ചത്​.