'നടൻ വിവേകിന്​ ഹൃദയാഘാതം സംഭവിച്ചത് വാക്സിൻ സ്വീകരിച്ചതു മൂലമല്ല'- വിശദീകരണവുമായി ഡോക്​ടർമാർ

ചെന്നൈ: കോവിഡ് വാക്സിൻ സ്വീകരിച്ചതു മൂലമാണ് തമിഴ് നടൻ വിവേകിന് ഹൃദയാഘാതം സംഭവിച്ചതെന്ന പ്രചാരണം തെറ്റാണെന്ന്​ അദ്ദേഹത്തെ ചികിത്സിച്ച ഡോക്​ടർമാർ. അദ്ദേഹത്തിന്​ ഗുരുതരമായ ഹൃദ്രോഗം ഉണ്ടായിരുന്നെന്നും ഇടതു കൊറോണറി ആർട്ടറിയിൽ 100 ശതമാനം ബ്ലോക്ക് ഉണ്ടായിരുന്നെന്നും ഡോക്ടർമാർ വിശദീകരിച്ചു. ഹൃദ്രോഗം ഏതാനും ദിവസങ്ങൾക്കുള്ളിൽ ഉണ്ടാകുന്ന ഒന്നല്ലെന്നും വിവേക്​ കോവിഡ് നെഗറ്റിവ് ആയിരുന്നെന്നും അദ്ദേഹത്തെ ചികിൽസിച്ച വടപളനിയിലെ എസ്.ആർ.എം ഇൻസ്റ്റിറ്റ്യൂട്ട്സ് ഫൊർ മെഡിക്കൽ സയൻസിലെ ഡോക്ടർമാർ വാർത്താസമ്മേളനത്തിൽ വ്യക്തമാക്കി.

വെള്ളിയാഴ്ച രാവിലെ പതിനൊന്നു മണിക്കാണ് വിവേകിനെ അബോധാവസ്ഥയിൽ ആശുപത്രിയിൽ പ്രവേശിപ്പിക്കുന്നത്​. ഉടൻ തന്നെ എമർജൻസി ടീമും കാർഡിയോളജി ടീമും ചേർന്ന് അദ്ദേഹത്തിന്‍റെ ഹൃദയമിടിപ്പ് തിരികെ കൊണ്ടുവരുന്നതിന് ശ്രമിച്ചു. വിവേകിന്‍റെ ഇടത് കൊറോണറി ആര്‍ട്ടറിയില്‍ നൂറ് ശതമാനം ബ്ലോക്ക് കണ്ടെത്തിയതിനെ തുടർന്ന് അടിയന്തര കൊറോണറി ആന്‍ജിയോഗ്രാം ചെയ്യുകയും സ്റ്റെന്‍റ്​ സ്ഥാപിക്കുകയും ചെയ്യുകയായിരുന്നു. ബ്ലോക്ക് മാറ്റിയതിനു ശേഷം ഹൃദയമിടിപ്പിൽ പുരോഗതി കണ്ടിരുന്നു.

അദ്ദേഹത്തിേന്‍റത്​ അക്യൂട്ട് കൊറോണറി സിൻഡ്രോം ആയിരുന്നു. ഇത് ഹൃദയസംബന്ധിയായ പ്രശ്നമാണ്. ഇതും കോവിഡും തമ്മിൽ ബന്ധമില്ല. പരിശോധനയിൽ അദ്ദേഹം കോവിഡ്​ നെഗറ്റിവ്​ ആണെന്ന്​ കണ്ടെത്തിയിരുന്നെന്നും മെഡിക്കൽ സംഘം ചൂണ്ടിക്കാട്ടി.