തെലുഗു നടൻ ജയ പ്രകാശ് റെഡ്​ഢി അന്തരിച്ചു

​ഹൈദരാബാദ്​: തെലുഗു നടൻ ജയ പ്രകാശ് റെഡ്​ഢി അന്തരിച്ചു. 74 വയസായിരുന്നു. ഹൃദയാഘാതത്തെ തുടർന്നായിരുന്നു മരണം. ആന്ധ്രപ്രദേശിലെ ഗുണ്ടൂരിലെ സ്വവസതിയിൽ ആയിരുന്നു അന്ത്യം.

തെലുഗു​, തമിഴ്​ സിനിമകളിലെ വില്ലൻ, ഹാസ്യ വേഷങ്ങളിൽ ഒരുപോലെ തിളങ്ങിയ നടനാണ്​ ജയ പ്രകാശ്​ റെഡ്​ഢി​. പൊലീസ് സബ് ഇൻസ്പെക്ടറായി ജോലി ചെയ്യുന്നതിനിടെ 1988ൽ പുറത്തിറങ്ങിയ വെങ്കിടേഷ് ചിത്രം 'ബ്രഹ്മ പുത്രുദു' എന്ന ചിത്രത്തിലൂടെയാണ്​ റെഡ്​ഢി സിനിമാജീവിതം ആരംഭിച്ചത്​. നന്ദമുറി ബാലകൃഷ്ണയുടെ 'സമരസിഹ റെഡ്​ഢി'​ എന്ന ചിത്രത്തിലെ കഥാപാത്രത്തിലൂടെ അദ്ദേഹം കൂടുതൽ ജനപ്രിയനായി.

തമിഴ്​, തെലുഗു ഭാഷകളിലായി നൂറോളം സിനിമകളിൽ വേഷമിട്ടു. ധനുഷ് കേന്ദ്രകഥാപാത്രമായെത്തിയ തമിഴ് റീമേക്ക് ചിത്രം 'ഉത്തമപുതിരനി'ലും ശ്രദ്ധേയമായ കഥാപാത്രത്തെ അവതരിപ്പിച്ചു. ആരു, ആഞ്ജനേയ തുടങ്ങിയ തമിഴ് ചിത്രങ്ങളിലും അഭിനയിച്ചിരുന്നു.

രാധയാണ് ഭാര്യ, മക്കൾ നിരഞ്ജ്, ദുഷ്യന്ത്. നട​െൻറ വിയോഗത്തിൽ താരങ്ങളായ നാഗാർജ്ജുന, മഹേഷ്​ ബാബു, വെങ്കിടേഷ്​, പ്രകാശ്​ രാജ്​, രാജമൗലി തുടങ്ങിയവർ ആദരാഞ്​ജലികൾ അർപ്പിച്ചു.