അമ്മയുടേയും അച്ഛ​േന്‍റയും പ്രിയപ്പെട്ട ചിത്രം പങ്കുവച്ച്​ ഐശ്വര്യ രജനീകാന്ത്​; വൈറൽ

തമിഴ്​ സൂപ്പർസ്റ്റാർ രജനികാന്തും ലതയും വിവാഹിതരായിട്ട് നാല് പതിറ്റാണ്ടായി. ദമ്പതികൾക്ക് ഐശ്വര്യ, സൗന്ദര്യ എന്നിങ്ങനെ രണ്ട് പെൺമക്കളാണുള്ളത്​. 1981 ഫെബ്രുവരി 26ന് ആന്ധ്രാപ്രദേശിലെ തിരുപ്പതി ക്ഷേത്രത്തിൽ വച്ചാണ് രജനീകാന്തും ലതയും വിവാഹിതരായത്. വിവാഹത്തിന് ഒരു വർഷം മുമ്പ് 1980 ലാണ് ഇരുവരും കണ്ടുമുട്ടുന്നത്. രജനിയുടെ 'തില്ലു മുള്ളു'വിന്റെ ചിത്രീകരണത്തിനിടെ ഒരു കോളേജ് മാഗസിന് അഭിമുഖത്തിനായാണ്​ ലത രംഗാചാരി രജനികാന്തിനെ കാണുന്നത്​.

അഭിമുഖത്തിനിടയിൽതന്നെ​ ഇരുവരും തങ്ങൾക്ക് പൊതുവായ താൽപ്പര്യങ്ങളുണ്ടെന്ന് കണ്ടെത്തുകയായിരുന്നു​. രജനി ബസ് കണ്ടക്ടറായി ജോലി ചെയ്തിരുന്ന ബംഗളൂരുവുമായി ഇവർക്ക് ബന്ധമുണ്ടെന്നും തിരിച്ചറിഞ്ഞു. അഭിമുഖത്തിനൊടുവിൽ ലതയോട്​ രജനി, തന്നെ വിവാഹം കഴിക്കുമോ എന്ന് ചോദിച്ചതായാണ്​ അടുപ്പക്കാർ പറയുന്നത്​. മറുപടിയൊന്നും പറയാതെ ആദ്യം മാതാപിതാക്കളോട് സംസാരിക്കണമെന്നാണ്​ ലത പറഞ്ഞത്​. ലതയുടെ മാതാപിതാക്കളിൽ നിന്ന് അനുവാദം വാങ്ങാൻ രജനികാന്ത് തമിഴ് സിനിമാ മേഖലയിൽ നിന്നുള്ള നിരവധി മുതിർന്നവരുടെ സഹായം തേടി. ഒടുവിൽ, അവർ സമ്മതിക്കുകയും 1981ൽ വിവാഹിതരാകുകയും ചെയ്തു.

വൈറൽ ഫോ​ട്ടോ

രജനിയുടെ മകൾ ഐശ്വര്യയാണ്​ വൈറലായ ചിത്രം സമൂഹമാധ്യമത്തിൽ പങ്കുവച്ചത്​. ചുവന്ന ലിപ്സ്റ്റിക്ക് കൊണ്ട് ഭർത്താവിന്റെ മുഖത്ത്​ വരയ്ക്കുന്ന ലതയാണ്​ ഫോട്ടോയിൽ ഉള്ളത്​. മീശയില്ലാതെ ഓമനത്വമുള്ള മുഖത്തോടുകൂടിയ രജനിയെയാണ്​ ഫോ​ട്ടോയിൽ കാണുന്നത്​.

മാതാപിതാക്കളുടെ 38-ാം വിവാഹവാർഷിക ദിനത്തിലാണ് ഐശ്വര്യ ഈ പോസ്റ്റ് പങ്കുവെച്ചത്. '38 വർഷവും അതിലധികവും. നിങ്ങളെ മാതാപിതാക്കളായി ലഭിച്ചത്​ അനുഗ്രഹമാണ്​... വിവാഹ വാർഷികാശംസകൾ അമ്മ, അപ്പ'-ഐശ്വര്യ ചിത്രത്തോടൊപ്പം കുറിച്ചു.

അടുത്തിടെയാണ്​ തലച്ചോറിലേക്കുള്ള രക്തക്കുഴലിലെ ബ്ലോക്ക് നീക്കാനുള്ള ശസ്ത്രക്രിയക്ക് രജനീകാന്ത്​ വിധേയനായത്​. മൂന്ന് ദിവസത്തെ ആശുപത്രിവാസത്തിനുശേഷമാണ്​ 70കാരൻ തിരികെ വീട്ടിലെത്തിയത്​.

തലച്ചോറിലേക്കുള്ള സാധാരണ രക്തപ്രവാഹം പുനഃസ്ഥാപിക്കുന്നതിനായി 'കരോട്ടിഡ് ആർട്ടറി റിവാസ്കുലറൈസേഷൻ' ശസ്ത്രക്രിയയാണ്​ നടത്തിയത്. രജനികാന്തിനെ മുഖ്യമന്ത്രി എം.കെ. സ്​റ്റാലിൻ, ആരോഗ്യ മന്ത്രി എം. സുബ്രമണ്യം എന്നിവർ ആശുപത്രിയിൽ സന്ദർശിച്ചിരുന്നു.