ജനഗണമന ബ്രിട്ടീഷ് ഭരണാധികാരിയെ സ്തുതിക്കുന്ന ഗാനം; വന്ദേമാതരം ദേശീയഗാനമാക്കണം -വിവാദ പരാമർശവുമായി മുകേഷ് ഖന്ന

ശക്തിമാൻ, മഹാഭാരതം എന്നീ ജനപ്രിയ ടെലിവിഷൻ പരമ്പരകളിലൂടെ ശ്രദ്ധേയനായ നടനും നിർമാതാവുമായ മുകേഷ് ഖന്ന വീണ്ടും വിവാദത്തിൽ. ഇന്ത്യയുടെ നിലവിലെ ദേശീയ ഗാനമായ ജനഗണമനക്ക് പകരം വന്ദേമാതരം ദേശീയഗാനമായി പ്രഖ്യാപിക്കണമെന്നാണ് അദ്ദേഹത്തിന്റെ പുതിയ ആവശ്യം. വന്ദേമാതരം സംബന്ധിച്ചുള്ള നിലവിലെ വിവാദങ്ങൾ അനാവശ്യമാണെന്ന് പറഞ്ഞ അദ്ദേഹം, ജനഗണമന ബ്രിട്ടീഷ് ഭരണാധികാരിയെ സ്തുതിക്കാൻ എഴുതിയതാണെന്ന തന്റെ മുൻ വാദത്തിൽ ഉറച്ചുനിൽക്കുകയും ചെയ്തു.

എ.എൻ.ഐയോട് സംസാരിക്കവേയാണ് മുകേഷ് ഖന്ന ജനഗണമനയെക്കുറിച്ചുള്ള തന്റെ അഭിപ്രായങ്ങൾ വ്യക്തമാക്കിയത്. ‘വന്ദേമാതരം അനാവശ്യമായി ഒരു വിവാദമാക്കി മാറ്റിയിരിക്കുകയാണ്. ജനഗണമനയെക്കുറിച്ചുള്ള എന്റെ മുൻ പരാമർശങ്ങൾ ഇപ്പോൾ വൈറലായിട്ടുണ്ട്. എന്നാൽ ആ ഗാനം ഒരിക്കലും എന്റെ ദേശീയഗാനമാകാൻ കഴിയില്ലെന്ന് ഞാൻ വീണ്ടും ആവർത്തിക്കുന്നു.

ബ്രിട്ടീഷ് ഭരണകാലത്ത് മുൻ ബ്രിട്ടീഷ് രാജാവായ ജോർജ് അഞ്ചാമൻ ഇന്ത്യയിലുണ്ടായിരുന്ന സമയത്താണ് ജനഗണമന എഴുതപ്പെട്ടത്. ഗാനത്തിലെ 'ജന ഗണ മന അധിനായക' എന്ന വാക്കുകൾ ആ ഭരണാധികാരിയെയാണ് സൂചിപ്പിക്കുന്നത്, ഇന്ത്യയുടെ വിധി നിർണ്ണയിക്കുന്ന വ്യക്തിയായാണ് അതിൽ അദ്ദേഹത്തെ വിശേഷിപ്പിക്കുന്നതെന്ന് മുകേഷ് ഖന്ന അവകാശപ്പെട്ടു.

ഗാനത്തിന്റെ അക്ഷരാർത്ഥത്തിലുള്ള അർത്ഥം പരിശോധിച്ചാൽ, അത് ആരെയാണ് അഭിസംബോധന ചെയ്യുന്നത് എന്നതിനെക്കുറിച്ച് നിരവധി ചോദ്യങ്ങൾ ഉയർന്നുവരുമെന്നും അദ്ദേഹം കൂട്ടിച്ചേർത്തു. മാതൃരാജ്യത്തോടുള്ള ഭക്തിയും സ്നേഹവും പ്രകടിപ്പിക്കുന്ന വന്ദേമാതരത്തിന് കൂടുതൽ ദേശീയ പ്രാധാന്യം നൽകണമെന്നാണ് തന്റെ വിശ്വാസമെന്നും ഖന്ന പറഞ്ഞു.

‘നമ്മൾ വർഷങ്ങളോളം ബ്രിട്ടീഷ് ഭരണത്തിൻ കീഴിലായിരുന്നു. സ്വാതന്ത്ര്യം ലഭിച്ചിട്ടും നമ്മൾ ഇപ്പോഴും ഇംഗ്ലീഷ് വിദ്യാഭ്യാസത്തിന് കൂടുതൽ വില കൽപ്പിക്കുന്നു. എന്നാൽ ഇന്ത്യക്ക് അതിന്റേതായ സമ്പന്നമായ വിദ്യാഭ്യാസ പാരമ്പര്യങ്ങളുണ്ട്’ അദ്ദേഹം കൂട്ടിച്ചേർത്തു.

ഇതിന് മുൻപ് ഐ.എ.എൻ.എസ് (IANS) വാർത്താ ഏജൻസിക്ക് നൽകിയ ഒരു അഭിമുഖത്തിലും ജനഗണമനയെക്കുറിച്ച് മുകേഷ് ഖന്ന സമാനമായ പരാമർശങ്ങൾ നടത്തിയിരുന്നു. ‘മൂന്ന് വർഷം മുൻപ് തന്നെ ഞാൻ ഇത് പറഞ്ഞിരുന്നു. വന്ദേമാതരം ദേശീയ ഗാനമാക്കണം. ജനഗണമന നമ്മുടെ രാജ്യത്തിന്റെ ദേശീയ ഗാനമല്ല. അത് എലിസബത്ത് രാജ്ഞിക്ക് നൽകിയ ഒരു ആദരവായിരുന്നു. അവരെ സ്തുതിച്ചുകൊണ്ടാണ് രബീന്ദ്രനാഥ ടാഗോർ ആ ഗാനം എഴുതിയത്’ എന്നായിരുന്നു മുകേഷ് ഖന്ന അന്ന് പറഞ്ഞത്.

എന്നാൽ ഈ പരാമർശത്തിന്റെ പേരിൽ സമൂഹമാധ്യമങ്ങളിൽ അദ്ദേഹം കടുത്ത പരിഹാസത്തിന് ഇരയായിരുന്നു. എലിസബത്ത് രാജ്ഞി ജനിച്ചത് 1926ലാണെന്നും, എന്നാൽ ജനഗണമന ആദ്യമായി ആലപിക്കപ്പെട്ടത് 1911ലാണെന്നും ചൂണ്ടിക്കാട്ടി നിരവധി പേർ അദ്ദേഹത്തിന്റെ വാദങ്ങളിലെ പൊള്ളത്തരം തുറന്നുകാട്ടിയിരുന്നു.