തമിഴ് സംവിധായകൻ എം. മണികണ്ഠന്റെ ദേശീയ പുരസ്കാരം തിരിച്ചുനൽകി മോഷ്ടാക്കൾ

2014ൽ പുറത്തിറങ്ങിയ ‘കാക്ക മുട്ടൈ’ എന്ന ചിത്രത്തിലൂടെ ശ്രദ്ധേയനായ തമിഴ് സംവിധായകൻ മണികണ്ഠൻ ​ഇപ്പോൾ വാർത്തകളിൽ നിറഞ്ഞുനിൽക്കുന്നത് വേറെ കാരണത്താലാണ്. രണ്ടു ദിവസം മുമ്പ്, അദ്ദേഹത്തിന്റെ ഉസലംപെട്ടിയിലെ വസതിയിൽ ​വൻ മോഷണം നടന്നു. ഒരു ലക്ഷം ​രൂപയും അഞ്ചു പവൻ സ്വർണാഭരണങ്ങളും രണ്ടു ദേശീയ അവാർഡ് മെഡലുകളും മോഷണം പോയെന്നാണ് അദ്ദേഹത്തിന്റെ ഡ്രൈവർ പൊലീസിൽ നൽകിയ പരാതിയിൽ പറയുന്നത്. എന്നാൽ, മോഷണവസ്തുക്കളിൽ അവാർഡ് മെഡൽ മാത്രം തിരിച്ചുനൽകിയിരിക്കുകയാണ് മോഷ്ടാക്കൾ; ഒപ്പം, ഒരു ക്ഷമാപണക്കുറിപ്പും. ദേശീയ പുരസ്കാരത്തിന്റെ മെഡലുകൾ ഒരു പോളിത്തീൻ കവറിലാക്കി രാത്രി വീടിന്റെ ഗേറ്റിനുമുകളിൽ​വെക്കുകയായിരുന്നുവെന്ന് മണികണ്ഠൻ പറഞ്ഞു. ‘ഞങ്ങളോട് ക്ഷമിക്കണം. നിങ്ങൾ അധ്വാനിച്ച് സമ്പാദിച്ചത് നിങ്ങൾക്കുള്ളതാണ്.’

ഉസലംപട്ടിയാണ് സ്വദേശമെങ്കിലും സിനിമാത്തിരക്കുകൾ കാരണം മണികണ്ഠൻ ഇപ്പോൾ താമസിക്കുന്നത് ചെന്നൈയിലാണ്. ഡ്രൈവറും മറ്റൊരു സഹായിയുമാണ് മോഷണം നടന്ന വീട്ടിലുണ്ടായിരുന്നത്. രണ്ടു ദിവസം മുമ്പ്, വീടിന്റെ ​ഗേറ്റ് തുറന്നുകിടക്കുന്നത് പുറത്തുപോയിവന്ന ഡ്രൈവറുടെ ശ്രദ്ധയിൽപെടുകയായിരുന്നു. ഡ്രൈവറാണ് പൊലീസിനെ വിവരമറിയിച്ചത്.

രണ്ടു വർഷം മുമ്പാണ് മണികണ്ഠന്റെ അവസാന ചിത്രം പുറത്തുവന്നത്- ‘കടൈസി വിവാസായി’. ഈ ചിത്രത്തിനാണ് അദ്ദേഹത്തിന് ദേശീയ പുരസ്കാരം ലഭിച്ചത്. കൃമി, ആണ്ടവൻ കട്ടളൈ തുടങ്ങി ശ്രദ്ധേയമായ ഒരുപിടി ചിത്രങ്ങൾ സംവിധാനം ചെയ്തിട്ടുണ്ട് മണികണ്ഠൻ.