അവർ ഇതിഹാസത്തോട് നീതി പുലർത്തും; രാമായണത്തിൽ ഹനുമാന്റെ വേഷം ചെയ്യാൻ എനിക്ക് പേടിയാണ് -സണ്ണി ഡിയോൾ

നിതേഷ് തിവാരിയുടെ വരാനിരിക്കുന്ന ബ്രഹ്മാണ്ഡ ചിത്രമായ രാമായണത്തിൽ വമ്പൻ താരനിരായാണ് ഒന്നിക്കുന്നത്. രൺബീർ കപൂർ ശ്രീരാമനായി എത്തുമ്പോൾ നടൻ സണ്ണി ഡിയോൾ ചിത്രത്തിൽ ഹനുമാനായി അഭിനയിക്കും. ഇപ്പോഴിതാ കഥാപാത്രത്തെ കുറിച്ച് സംസാരിക്കുകയാണ് സണ്ണി ഡിയോൾ.

അഭിനേതാക്കളെ സംബന്ധിച്ചിടത്തോളം വെല്ലുവിളി നിറഞ്ഞ കാര്യങ്ങൾ ഞങ്ങൾക്ക് ഇഷ്ടമാണ്. കാരണം അത് രസകരമാണ്. നമ്മൾ കഥാപാത്രത്തെ കൃത്യമായി മനസിലാക്കുകയും സംവിധായകന്റെ വാക്കുകൾ കേൾക്കുകയും വേണം. ഇതുവരെ ഷൂട്ടിങ് ആരംഭിച്ചിട്ടില്ല. പക്ഷേ ഏറ്റവും വലിയ ചിത്രങ്ങളിൽ ഒന്നായിരിക്കും രാമായണ. രാമായണത്തിൽ ഹനുമാന്റെ വേഷം ചെയ്യാൻ എനിക്ക് പേടിയാണ്. പരിഭ്രാന്തിയും ഭയവും എപ്പോഴും ഉണ്ടാകും, പക്ഷേ വെല്ലുവിളി എങ്ങനെ ഏറ്റെടുക്കുമെന്ന് നിങ്ങൾ സ്വയം കണ്ടെത്തേണ്ടതിനാൽ അതാണ് അതിന്‍റെ ഭംഗി.

രാമായണം നിരവധി തവണ നിർമിച്ചിട്ടുണ്ട്. ഈ സിനിമ സ്‌ക്രീനിൽ വരുമ്പോഴും എല്ലാ അഭിനേതാക്കളും ഇതിഹാസത്തോട് നീതി പുലർത്തുമെന്ന് എനിക്ക് ഉറപ്പുണ്ട്. ആളുകൾ സംതൃപ്തരാകും, അവർ സിനിമ ആസ്വദിക്കും സണ്ണി ഡിയോൾ പറഞ്ഞു. രൺബീർ കപൂർ നല്ല നടനായതിനാൽ രാമായണ മികച്ചതായിരിക്കുമെന്ന് ഞാൻ കരുതുന്നു. ഏറ്റെടുക്കുന്ന ഏതൊരു പ്രോജക്റ്റിലും രൺബീർ എപ്പോഴും പൂർണ്ണമായും സമർപ്പിതനാണ്. ഈ ചിത്രം വിജയിക്കുമെന്ന് എനിക്ക് ഉറപ്പുണ്ട് സണ്ണി ഡിയോൾ പറഞ്ഞു.