സൂര്യ കൃഷ്ണമൂർത്തി അന്തരിച്ചു; വിടവാങ്ങിയത് കലയുടെ സൂര്യൻ

തിരുവനന്തപുരം: ലോകപ്രശസ്ത ഇന്ത്യൻ നാടകപ്രവർത്തകനും കലാസംഘാടകനും കേരള സംഗീത നാടക അക്കാദമി മുൻ ചെയർമാനുമായ സൂര്യ കൃഷ്ണമൂർത്തി (നടരാജ കൃഷ്ണമൂർത്തി-75) അന്തരിച്ചു. അസുഖബാധിതനായി തിരുവനന്തപുരത്തെ സ്വകാര്യ ആശുപത്രിയിൽ ചികിത്സയിലിരിക്കെ ബുധനാഴ്ച വൈകീട്ടായിരുന്നു അന്ത്യം. വ്യാഴാഴ്ച രാവിലെ ഏഴുമുതൽ മൃതദേഹം തൈക്കാട് ‘ഗണേശ’ത്തിലെ ഓഡിറ്റോറിയത്തിൽ പൊതുദർശനത്തിനുവെക്കും. സംസ്കാരം വൈകീട്ട് അഞ്ചിന് തൈക്കാട് ശാന്തികവാടത്തിൽ.

മൂന്നു തവണ കേരള സംസ്ഥാന ചലച്ചിത്ര വികസന കോർപ്പറേഷൻ ഡയറക്ടറായിരുന്നു. 2023ൽ കേരള സർക്കാർ രണ്ടാമത്തെ ഉയർന്ന ബഹുമതിയായ കേരള പ്രഭ അവാർഡ് നൽകി ആദരിച്ചു.

സൂര്യ സ്റ്റേജ് ആൻഡ് ലൈറ്റ് ഷോ സ്ഥാപകനായ സൂര്യകൃഷ്ണമൂർത്തിയാണ് മലയാളത്തിൽ ആദ്യ ലൈറ്റ് ആൻഡ് സൗണ്ട് ഷോ അവതരിപ്പിച്ചത്. 1977ൽ അദ്ദേഹം തിരുവനന്തപുരത്ത് വിത്തുപാകിയ സൂര്യ ഫെസ്റ്റിവൽ ഇന്ന് ലോകത്തിലെ ഏറ്റവും വലിയ സാംസ്‌കാരിക ഉത്സവങ്ങളിലൊന്നാണ്. ഭാര്യ: രാജേശ്വരി. മക്കൾ: സീത (ഇൻകം ടാക്സ് ജോയന്‍റ് കമീഷണർ, ചെന്നൈ), ലക്ഷ്മൺ (എൻജിനീയർ, അമേരിക്ക). മരുമകൻ: ചന്ദൻ കുമാർ (ഇൻകം ടാക്സ് ജോയിന്‍റ് കമീഷണർ, ചെന്നൈ).

1951 ഏപ്രിൽ 11ന് പൊതുമരാമത്ത് വകുപ്പ് എൻജിനീയർ നടരാജപിള്ളയുടെയും സരസ്വതിയമ്മയുടെയും നാലുമക്കളിൽ ഇളയവനായി ജനനം. കോട്ടയത്തായിരുന്നു ജനിച്ചതെങ്കിലും ദിവസങ്ങൾ കഴിയുംമുമ്പേ തിരുവനന്തപുരത്തേക്കു മാറി. 1996 ൽ ഇന്ത്യൻ രാഷ്ട്രപതിയുടെ നാടക ശില്പകലക്കും സംവിധാനത്തിനുമുള്ള ദേശീയ അവാർഡ് ലഭിച്ചു. തമിഴ്നാട് സർക്കാർ കലൈലാമണി പുരസ്കാരം നൽകി ആദരിച്ചിരുന്നു.