സോനു സൂദിന്​ സ്​പൈസ്​ ജെറ്റിന്‍റെ ആദരം; നടന്‍റെ ചിത്രം പതിച്ച പ്രത്യേക വിമാനം പുറത്തിറക്കി

ന്യൂഡൽഹി: കോവിഡ്​ മഹാമാരിക്കാലത്ത്​ രാജ്യം അടച്ചുപൂട്ടിയ വേളയിൽ പലഭാഗങ്ങളിലായി കുടുങ്ങിയ അന്തർ സംസ്​ഥാന തൊഴിലാളികളുടെ രക്ഷകനായി മാറിയ നടൻ സോനൂ സൂദ്​ കൈയ്യടി നേടിയിരുന്നു. വെള്ളിത്തിരയിൽ വില്ലൻ വേഷങ്ങളിലൂടെ ശ്രദ്ധേയനായ നടൻ യഥാർഥ ജീവിതത്തിൽ നായകനായ മാറി.

മഹാമാരിക്കാലത്തെ സേവന പ്രവർത്തനങ്ങൾക്ക്​ നിരവധി അംഗീകാരങ്ങളും നടനെ തേടിയെത്തി. ഇപ്പോൾ സോനുവിനെ ആദരിക്കുന്നതിനായി പ്രത്യേക വിമാനം പുറത്തിറക്കിയിരിക്കുകയാണ് സ്പൈസ്ജെറ്റ്. സോനുവിന്‍റെ ചിത്രം ആലേഖനം ചെയ്​ത ബോയിങ് 737 വിമാനമാണ് സ്പൈസ്ജെറ്റ് പുറത്തിറക്കിയത്.

കോവിഡ് കാലത്ത് സോനു സൂദ് ചെയ്ത ​േസവനങ്ങള്‍ക്ക് നന്ദി രേഖപ്പെടുത്താനാണ്​ ഉദ്ദേശിച്ചതെന്ന്​ കമ്പനി ചെയര്‍മാനും മാനേജിങ് ഡയരക്ടറുമായ അജയ് സിങ് വ്യക്തമാക്കി.

ലോക്​ഡൗൺ കാലത്ത്​ ഇന്ത്യക്ക്​ പുറത്ത്​ കുടുങ്ങിപ്പോയവരെ നാട്ടിലെത്തിക്കാനുള്ള ദൗത്യത്തിനായി സോനു സൂദും സ്പൈസ്ജെറ്റും കൈകോർത്തിരുന്നു. ദൗത്യത്തിന്‍റെ ഭാഗമായി കിര്‍ഗിസ്​ഥാനില്‍ അകപ്പെട്ട 1500ഓളം ഇന്ത്യന്‍ വിദ്യാര്‍ഥികളെയും ഉസ്ബെക്കിസ്ഥാന്‍, റഷ്യ തുടങ്ങി മറ്റുരാജ്യങ്ങളിലും കുടുങ്ങിയ നൂറുകണക്കിന് ഇന്ത്യക്കാരെയും നാട്ടിലെത്തിച്ചിരുന്നു.

ലോക്​ഡൗൺ കാലത്തും ഇ​േ​പ്പാഴും​ സ്​പൈസ്​ജെറ്റിന്‍റെ ഭാഗത്ത്​ നിന്നുണ്ടായ പിന്തുണക്ക് സ്​നേഹത്തിനും​ സോനു സൂദ് നന്ദി അറിയിച്ചു. ​