മഹാമാരി കണ്ണുതുറപ്പിച്ചു; നവാസുദ്ദീനുമായി​ ബന്ധം വേർ​െപ്പടുത്തുന്നില്ലെന്ന്​ ആലിയ

ന്യൂഡൽഹി: നടൻ നവാസുദീൻ സിദ്ദീഖിക്ക്​ അയച്ച വിവാഹമോചന ഹരജി പിൻവലിക്കുന്നതായി ഭാര്യ ആലിയ. കോവിഡ്​ സ്​ഥിരീകരിച്ചതും അതിനെ തുടർന്നുണ്ടായ സംഭവങ്ങളുമാണ്​ മനസുമാറ്റത്തിന്​ കാരണമെന്നും ആലിയ പറയുന്നു. കോവിഡ്​ സ്​ഥിരീകരിച്ചപ്പോൾ തന്നെയും ക​ുട്ടികളെയും നവാസുദ്ദീൻ സിദ്ദിഖി പരിചരിച്ചത്​ വഴിത്തിരിവാകുകയായിരുന്നുവെന്നാണ്​ ആലിയയുടെ പരാമർശം.

'എനിക്ക്​ കോവിഡ്​ സ്​ഥിരീകരിച്ചപ്പോൾ നവാസ്​ കുട്ടികളെ മാത്രമല്ല പരിചരിച്ചത്​, എന്നെയും നന്നായി നോക്കി. ഞങ്ങളുടെ അഭിപ്രായ വ്യത്യാസങ്ങൾ മാറ്റിനിർത്തി അദ്ദേഹം എന്നെ പരിചരിച്ചു. ഞാൻ മാനസിക സമ്മർദ്ദത്തിലായിരുന്ന​േപ്പാൾ, അദ്ദേഹം എന്നെ സഹായിച്ചു. ഈ മഹാമാരി കണ്ണുതുറപ്പിച്ചു. മറ്റു പ്രശ്​നങ്ങൾ എന്തുണ്ടായാലും കുട്ടികളും അവരുടെ ആരോഗ്യവുമാണ്​ പ്രധാനമെന്ന്​ ഞാൻ മനസിലാക്കി. ഞങ്ങളുടെ കുട്ടികൾക്ക്​ ഞങ്ങളെ വേണം. ഞങ്ങൾ ഒരുമിച്ചുള്ളതാണ്​ അവരുടെ സന്തോഷം. മറ്റു വി​യോജിപ്പുകളെ മാറ്റി നിർത്താം. ഞാൻ അദ്ദേഹത്തിന്​ അയച്ച വിവാഹമോചന ഹരജി പിൻവലിക്കുന്നു. ഞാൻ അദ്ദേഹത്തിൽനിന്ന്​ വിവാഹമോചനം തേടുന്നില്ല. ഈ വിവാഹ ബന്ധത്തിന്​ ഒരു അവസരം കൂടി നൽകാൻ ആഗ്രഹിക്കുന്നു' -ആലിയ സിദ്ദീഖി ടൈംസ്​ ഓഫ്​ ഇന്ത്യയോട്​ പറഞ്ഞു.

അതേസമയം കുട്ടികൾക്കാണ്​ തങ്ങളുടെ ജീവിതത്തിൽ പ്രധാന്യ​െമന്നും അതിനാൽ മറ്റു വിയോജിപ്പ​ുകളെ മാറ്റിവെക്കുകയാണെന്നും നവാസുദ്ദീൻ സിദ്ദീഖി പ്രതികരിച്ചു.

കഴിഞ്ഞവർഷം മേയിലാണ്​ വിവാഹമോചനം ആവശ്യപ്പെട്ട്​ ആലിയ ഹരജി സമർപ്പിച്ചത്​. 10 വർഷമായി വിവാഹബന്ധം അസ്വസ്​ഥമായിരുന്നുവെന്നായിരുന്നു പ്രതികരണം. നവാസുദ്ദീന്‍റെ സഹോദരൻ ഷമാസിനെതിരെയും ആലിയ ആരോപണങ്ങൾ ഉന്നയിച്ചിരുന്നു.