'എന്റെ വോട്ട് സാന്ദ്രാ തോമസിന്'; പിന്തുണയുമായി കെ. ആർ. മീര
text_fields
കൊച്ചി: നിർമാതാവും നടിയുമായ സാന്ദ്രാ തോമസിനെ പിന്തുണച്ച് എഴുത്തുകാരി കെ.ആർ. മീര. ഫേസ്ബുക്ക് പോസ്റ്റിലൂടെയാണ് കെ.ആർ. മീര പിന്തുണ അറിയിച്ചത്. മലയാള ചലച്ചിത്ര നിർമാതാക്കളുടെ സംഘടന തെരഞ്ഞെടുപ്പിൽ മത്സരിക്കുന്ന സാന്ദ്രാ തോമസ് പ്രതിഷേധത്തിന്റെ ഭാഗമായി പർദ ധരിച്ചാണ് നാമനിർദേശ പത്രിക സമർപ്പിക്കാൻ എത്തിയത്. അതിന്റെ ചിത്രമടക്കം പങ്കുവെച്ചായിരുന്നു കെ.ആർ. മീരയുടെ ഫേസ്ബുക്ക് പോസ്റ്റ്.
പ്രൊഡ്യൂസേഴ്സ് അസോസിയേഷനിൽ വോട്ട് ഉണ്ടായിരുന്നെങ്കിൽ എന്റെ വോട്ട് സാന്ദ്ര തോമസിന് എന്നാണ് മീര കുറിച്ചത്. കെ.ആർ. മീരയുടെ പോസ്റ്റ് സാന്ദ്ര തോമസ് പങ്കുവെക്കുകയും ചെയ്തിട്ടുണ്ട്. ഈ പോസ്റ്റിനെ പിന്തുണച്ച് നിരവധി പേരാണ് രംഗത്തുവന്നിട്ടുള്ളത്. ആഗസ്റ്റ് 14നാണ് നിർമാതാക്കളുടെ സംഘടനയിലേക്ക് തെരഞ്ഞെടുപ്പ് നടക്കുന്നത്. ആഗസ്റ്റ് രണ്ടാണ് പത്രിക സമർപ്പിക്കാനുള്ള അവസാന തീയതി.
നിലവിലെ ഭരണസമിതിയില്‍പ്പെട്ട പ്രമുഖര്‍ക്കെതിരെ സ്ത്രീത്വത്തെ അപമാനിച്ചെന്ന് ആരോപിച്ചുള്ള നിയമ നടപടിക്ക് പിന്നാലെയാണ് തെരഞ്ഞടുപ്പില്‍ മത്സരിക്കുമെന്ന സാന്ദ്രയുടെ പ്രഖ്യാപനം. ലൈംഗികാധിക്ഷേപത്തിനെതിരെയുള്ള പ്രതിഷേധമാണ് ഇത്തരമൊരു വസ്ത്രധാരണത്തിന് പിന്നിലെന്നും സാന്ദ്ര പറഞ്ഞു. സംഘടനക്കുള്ളിൽ ഒരു കുത്തക ഉണ്ടെന്നും അതിന് എതിരെയാണ് തന്‍റെ മത്സരമെന്നും സാന്ദ്ര പറ‍യുന്നു. നിർമാതാവ് ലിസ്റ്റിൻ സ്റ്റീഫൻ അടക്കമുള്ളവർക്കെതിരെ സാന്ദ്ര ആരോപണം ഉന്നയിച്ചിരുന്നു.
സംഘടനക്കെതിരെ ആരോപണങ്ങൾ ഉന്നയിച്ചെന്നും മാധ്യമങ്ങളിലൂടെ അംഗങ്ങളെ മോശക്കാരാക്കിയെന്നും ആരോപിച്ച് നിർമാതാക്കളുടെ സംഘടനയിൽനിന്ന് സാന്ദ്ര തോമസിനെ പുറത്താക്കിയിരുന്നു. അച്ചടക്കലംഘനം ചൂണ്ടിക്കാട്ടിയായിരുന്നു നടപടി. സംഘടനയിലെ ചില അംഗങ്ങൾ വ്യക്തിപരമായി അവഹേളിച്ചതിൽ നടപടി ആവശ്യപ്പെട്ട് സംഘടനക്ക് സാന്ദ്ര പരാതി നൽകിയിരുന്നു. സിനിമയുടെ വിതരണവുമായി ബന്ധപ്പെട്ട യോഗത്തിലേക്ക് വിളിച്ചുവരുത്തി അപമാനിച്ചുവെന്നതടക്കമുള്ള കാര്യങ്ങളാണ് ഇതിൽ ചൂണ്ടിക്കാട്ടിയത്. നിർമാണ മേഖല സ്ത്രീവിരുദ്ധമാണെന്നും സംഘടനയിൽ പവര്‍ ഗ്രൂപ് ശക്തമാണെന്നുമടക്കമുള്ള കാര്യങ്ങൾ സാന്ദ്ര ആരോപിക്കുന്നു. സാന്ദ്രയുടെ പരാതിയിൽ പൊലീസ് കേസ് എടുത്തിരുന്നു.