855 കോടി രൂപയുടെ കരാർ: അന്ധേരിയിലെ ഭൂമി വിറ്റ് ജിതേന്ദ്ര കപൂറും കുടുംബവും

ബോളിവുഡ് നടൻ ജീതേന്ദ്ര കപൂറും കുടുംബവും മുംബൈയിലെ അന്ധേരിയിലുള്ള ഭൂമി എൻ.ടി.ടി ഗ്ലോബൽ ഡാറ്റാ സെന്ററുകൾക്ക് 855 കോടി രൂപക്ക് വിറ്റു. കുടുംബ ഉടമസ്ഥതയിലുള്ള രണ്ട് സ്ഥാപനങ്ങളായ പാന്തിയോൺ ബിൽഡ്കോൺ പ്രൈവറ്റ് ലിമിറ്റഡ്, തുഷാർ ഇൻഫ്ര ഡെവലപ്പേഴ്‌സ് പ്രൈവറ്റ് ലിമിറ്റഡ് എന്നിവ വഴിയാണ് സ്വത്ത് വിറ്റത്.

2025 മെയ് 29 ന് രജിസ്റ്റർ ചെയ്ത ഈ ഇടപാടിൽ 9,664.68 ചതുരശ്ര മീറ്റർ (ഏകദേശം 2.39 ഏക്കർ) വിസ്തൃതിയുള്ള രണ്ട് ഭൂമിയുടെ വിൽപ്പന ഉൾപ്പെട്ടിരുന്നു. നിലവിൽ ബാലാജി ഐ.ടി പാർക്ക് സ്ഥിതി ചെയ്യുന്ന ഈ സ്ഥലത്ത് ഏകദേശം 4.9 ലക്ഷം ചതുരശ്ര അടി വിസ്തീർണ്ണമുള്ള മൂന്ന് കെട്ടിടങ്ങൾ ഉൾപ്പെടുന്നുവെന്ന് രേഖകൾ വ്യക്തമാക്കുന്നു. മുമ്പ് നെറ്റ്മാജിക് ഐ.ടി സർവീസസ് എന്നറിയപ്പെട്ടിരുന്ന എൻ.‌ടി‌.ടി ഗ്ലോബൽ ഡാറ്റാ സെന്ററുകളും ക്ലൗഡ് ഇൻഫ്രാസ്ട്രക്ചർ ഇന്ത്യ പ്രൈവറ്റ് ലിമിറ്റഡും ചേർന്നാണ് ഭൂമി വാങ്ങിയത്.

വിൽപ്പനക്കാരായ പാന്തിയോൺ ബിൽഡ്‌കോൺ, തുഷാർ ഇൻഫ്ര ഡെവലപ്പേഴ്‌സ് എന്നിവ ജീതേന്ദ്ര കപൂറിന്റെയും കുടുംബത്തിന്റെയും ഉടമസ്ഥതയിലുള്ള കമ്പനികളാണ്. ഈ ഇടപാടിന് 8.69 കോടി രൂപയുടെ സ്റ്റാമ്പ് ഡ്യൂട്ടിയും 30,000 രൂപയുടെ രജിസ്ട്രേഷൻ ഫീസും ലഭിച്ചതായി രേഖകൾ വ്യക്തമാക്കുന്നു.