ഞാൻ മരിച്ചെന്നാണ് കരുതിയത്, മാനസിക വെല്ലുവിളികളുണ്ട്; തുറന്ന് പറഞ്ഞ് ഹണി സിങ്

ബൈപോളാർ ഡിസോർഡറുമായുള്ള പോരാട്ടത്തെക്കുറിച്ച് റാപ്പർ യോ യോ ഹണി സിങ്. തനിക്ക് മാനസിക വെല്ലുവിളികളുണ്ടെന്നും വർഷങ്ങളായി ഈ അവസ്ഥയോട് പോരാടുകയാണെന്നും ഹണി സിങ് അടുത്തിടെ നൽകിയ പോഡ്കാസ്റ്റിങ് വിഡിയോയിൽ പറഞ്ഞു. ഈ അവസ്ഥ നിസാരമല്ലെന്നും താരം കൂട്ടിച്ചേർത്തു.

'കഴിഞ്ഞ ആറ് വർഷമായി ബൈപോളാർ ഡിസോർഡറുമായി പോരാടുകയാണ്. ചില മാനസിക ബുദ്ധിമുട്ടുകൾ ഉണ്ടായിരുന്നു. എന്റെ പെരുമാറ്റത്തിലും ചിന്തയിലുമുള്ള മാറ്റങ്ങൾ എനിക്ക് തന്നെ മനസിലായിട്ടുണ്ട്. ആ സമയത്ത്, ഇനി എന്റെ മാതാപിതാക്കളെ കാണാൻ കഴിയില്ലെന്നു പോലും ഞാൻ കരുതി. ആദ്യത്തെ ഒരു മൂന്ന് വർഷങ്ങൾ നരക തുല്യമായിരുന്നു.ശരിക്കും ഞാൻ മരിച്ചുവെന്ന് ആ നാളുകളിൽ ഞാൻ കരുതി'- ഹണി സിങ് പറഞ്ഞു.

സംഗീതലോകത്ത് സജീവമായി തുടരുകയാണ് ഹണി സിങ്. ‘മില്യനയര്‍ ടൂര്‍’ എന്ന പേരിൽ പാട്ടുമായി ഇന്ത്യൻ പര്യടനത്തിന് ഒരുങ്ങുകയാണ് ഗായകൻ. ഫെബ്രുവരി 22ന് മുംബൈയിൽ മില്യനയര്‍ ടൂറിന് തുടക്കമാകും. ഇന്ത്യയിലെ വിവിധ നഗരങ്ങളിൽ പാട്ടുമായി ഹണി സിങ് എത്തും.