തടികുറച്ച്​ പഴയരൂപത്തിൽ ഫർദീൻ ഖാൻ; ഇനി ബോളിവുഡിൽ 'റീ എൻട്രി'

മുംബൈ: ശനിയാഴ്​ച ബോളിവുഡ്​ കാസ്​റ്റിങ്​ ഡയറക്​ടർ മുകേഷ്​ ഛബ്രയുടെ ഓഫിസിൽ നിന്ന്​ ഇറങ്ങി വരുന്ന 'യുവാവിനെ' കണ്ടവരെല്ലാം ഒന്ന്​ ശങ്കിച്ചു- നടൻ ഫർദീൻ ഖാനെ പോലെ തന്നെയുണ്ടല്ലോ ഇയാൾ! ‌‌‌ഫർദീൻ ഖാൻ തന്നെയാ​ണ്​ അതെന്ന്​ അറിഞ്ഞപ്പോൾ അവർ അത്​ഭുതം കൂറി. അത്രക്കുണ്ട്​ മാറ്റം. തടിച്ചുരുണ്ട്​ ബോഡി ഷെയ്​മിങ്​ വരെ നേരിട്ട ഫർദീൻ ഖാൻ പഴയ രൂപം വീ​ണ്ടെടുത്തതാണ്​ ഇപ്പോൾ ബോളിവുഡിലെ സംസാര വിഷയം. പത്ത്​ വർഷം മുമ്പുള്ള ഫർദീൻ ഖാനെയാണ്​ ഇപ്പോൾ കാണുന്നതെന്ന്​ ആരാധകര​ും പറയുന്നു.

2005ൽ 'നോ എൻട്രി' എന്ന ഹാസ്യ ചിത്രത്തിലൂടെ ​​ശ്രദ്ധേയനായ ഫർദീൻ ഇപ്പോൾ ബോളിവുഡിലേക്ക​ുള്ള 'റീ എൻട്രി'ക്ക്​ ഒരുങ്ങുകയാണെന്നാണ്​ റിപ്പോർട്ടുകൾ. മുകേഷ്​ ഛബ്രയുമായുളള കൂടിക്കാഴ്​ച അതിന്​ മുന്നോടിയാണെന്നാണ്​ സൂചന. മുകേഷ്​ ഛബ്രയുടെ വാക്കുകൾ ഈ സംശയം ശരിവെക്കുന്നുമുണ്ട്​. 'ഫർദീൻ ഒരു തിരിച്ചുവരവ്​ ആഗ്രഹിക്കുന്നുണ്ട്​. ഞങ്ങൾ അവസരങ്ങൾ വിലയിരുത്തി കൊണ്ടിരിക്കുകയാണ്​. അദ്ദേഹം തിരിച്ചെത്തി കഴിഞ്ഞു. പഴയതുപോലെ സുന്ദരനായി'- മുകേഷ്​ പറഞ്ഞു.

രണ്ടായിരത്തി​െൻറ തുടക്കത്തിൽ ബോളിവുഡ്​ ആരാധകരുടെ ഹരമായിരുന്നു ഫർദീൻ ഖാൻ. നടനും സംവിധായകനും നിർമാതാവുമായ ഫിറോസ്‌ ഖാ​െൻറ മകനായ ഫർദീൻ 1998ൽ 'പ്രേം അഗൻ' എന്ന സിനിമയിലൂടെയാണ്​ ബോളിവുഡിൽ അരങ്ങേറ്റം കുറിച്ചത്​. ഫിറോസ്‌ ഖാൻ സംവിധാനം ചെയ്​ത ചിത്രം ബോക്സ് ഓഫിസിൽ ശരാശരി ചലനമേ സൃഷ്​ടിച്ചുള്ളു.

2005ൽ ഇറങ്ങിയ 'നോ എൻട്രി' എന്ന ഹാസ്യചിത്രം വിജയമായതോടെ ഫർദീൻ ശ്രദ്ധനേടി. പക്ഷേ, പിന്നീട് ഈ വിജയം ആവർത്തിക്കാൻ അദ്ദേഹത്തിന്​ കഴിഞ്ഞില്ല. തുടർച്ചയായി ചിത്രങ്ങൾ പരാജയപ്പെട്ടു. 2010ൽ മുദസ്സർ അസീസി​െൻറ സംവിധാനത്തിൽ ഇറങ്ങിയ 'ദുൽഹ മിൽ ഗയ' ആണ്​ ഫർദീൻ അവസാനമായി വേഷമിട്ട ചിത്രം. സുഷ്​മിത സെന്നും ഇശിത ശർമ്മയും നായികമാരാ​െയത്തിയ, ഷാരൂഖ്​ ഖാൻ അതിഥി ​േ​​വഷത്തിലെത്തിയ ഈ ചിത്രം പരാജയപ്പെട്ടതോടെ അഭിനയരംഗത്ത്​ നിന്ന്​ മാറി നിൽക്കുകയായിരുന്നു അദ്ദേഹം.

ശരീരഭാരം കുറച്ച ഫർദീൻ ഖാ​െൻറ പുതിയ ചിത്രങ്ങൾ ഇപ്പോൾ വെെറലാവുകയാണ്. സിനിമയിൽ നിന്ന് മാറി നിന്ന സമയത്ത് തടി കൂട‌ിയതി​െൻറ പേരിൽ 2016ൽ ക‌ടുത്ത ബോഡി ഷെയ്മിങ് നേരി‌‌ട്ട നടനാണ് അദ്ദേഹം. എന്നാൽ, 'പരിഹസിക്കുന്നവരെ ​ഗൗനിക്കുന്നില്ല, എ​െൻറ ശരീര​െത്തയോർത്ത്​ എനിക്ക്​ അഭിമാനം മാത്രമേയുള്ളു' എന്നായിരുന്നു ഇതിനോട്​ ഫർദീ​െൻറ പ്രതികരണം.