ദീപിക കക്കറിന് ഇന്ന് ശസ്ത്രക്രിയ; പ്രാർഥനയിൽ ഉൾപ്പെടുത്തണമെന്ന് ഷോയിബ്

കാൻസർ സ്ഥിരീകരിച്ചതിനെ തുടർന്ന് നടി ദീപിക കക്കർ ഇന്ന് ശസ്ത്രക്രിയക്ക് വിധേയയാകും. ശസ്ത്രക്രിയയുടെ വിവരം നടനും ദീപികയുടെ ഭർത്താവുമായ ഷോയിബ് ഇബ്രാഹിം ഇൻസ്റ്റാഗ്രാമിൽ പങ്കുവെച്ച വൈകാരിക കുറിപ്പിലൂടെയാണ് പങ്കുവെച്ചത്. ആരാധകർ അവരെ പ്രാർഥനയിൽ ഉൾപ്പെടുത്തണമെന്ന് അദ്ദേഹം അഭ്യർഥിച്ചു.

'ദിപ്പിയുടെ ശസ്ത്രക്രിയ നാളെ രാവിലെ നടക്കും. അതൊരു നീണ്ട ശസ്ത്രക്രിയയായിരിക്കും... അവൾക്ക് നിങ്ങളുടെ എല്ലാ പ്രാർഥനകളും ശക്തിയും ആവശ്യമാണ്... ദയവായി അവളെ നിങ്ങളുടെ പ്രാർഥനയിൽ ഉൾപ്പെടുത്തുക' എന്ന് ഷോയിബ് കഴിഞ്ഞ ദിവസം തന്റെ ഇൻസ്റ്റാഗ്രാം സ്റ്റോറിയിൽ എഴുതി.

കഴിഞ്ഞയാഴ്ച, ഷോയിബും ദീപികയും യൂട്യൂബ് ചാനലിലൂടെ രോഗത്തെക്കുറിച്ച് തുറന്നു പറഞ്ഞിരുന്നു. മേയ് 16നാണ് ദീപികയുടെ ഇടതു കരളിൽ ട്യൂമർ കണ്ടെത്തിയത്. ട്യൂമർ കാൻസറാണോ എന്ന് അറിയാനുള്ള പരിശോധനകൾക്ക് ശേഷമാണ് നടി അസുഖ വിവരം ഇൻസ്റ്റഗ്രാമിലൂടെ പങ്കുവെച്ചത്.

'കണ്ടിട്ടുള്ളതും അനുഭവിച്ചതുമായ ഏറ്റവും പ്രയാസകരമായ സമയങ്ങളിൽ ഒന്നായിരുന്നു അത്! എന്റെ മുഴുവൻ കുടുംബവും എന്റെ കൂടെയുണ്ടെങ്കിൽ.... നിങ്ങളുടെ എല്ലാവരുടെയും സ്നേഹവും പ്രാർഥനകളും കൊണ്ട് ഞാൻ ഇതും മറികടക്കും' -എന്നാണ് ദീപിക എഴുതിയത്.