ആര്യന്​ ലഹരി നൽകിയിട്ടില്ല, വാങ്ങാൻ സഹായിച്ചിട്ടുമില്ല -ആരോപണങ്ങൾ നിഷേധിച്ച്​ അനന്യ പാണ്ഡെ

ന്യൂഡൽഹി: മയക്കുമരുന്ന്​ കേസുമായി ബന്ധപ്പെട്ട ആരോപണങ്ങൾ നിഷേധിച്ച്​ ബോളിവുഡ്​ താരം അനന്യ പാണ്ഡെ. കേസുമായി ബന്ധപ്പെട്ട്​ രണ്ടുദിവസമായി അനന്യയെ നാർക്കോട്ടിക്​സ്​ കൺട്രോൾ ബ്യൂറോ ചോദ്യം ചെയ്​തിരുന്നു.

താൻ മയക്കുമരുന്ന്​ ഉപയോഗിക്കാറില്ലെന്നും ആര്യൻ ഖാന്​ മയക്കുമരുന്ന്​ നൽകിയിട്ടില്ലെന്നും അനന്യ എൻ.സി.ബിയെ അറിയിച്ചതായാണ്​ വിവരം. ആര്യൻ ഖാന്‍റെ ഫോണിലെ രണ്ടുവർഷം പഴക്കമുള്ള വാട്​സ്​ആപ്​ ചാറ്റിന്‍റെ അടിസ്​ഥാനത്തിലാണ്​ 22കാരിയായ അനന്യയെ എൻ.സി.ബി ചോദ്യം ചെയ്​തത്​. തിങ്കളാഴ്ചയും അനന്യയെ ചോദ്യം ചെയ്യും.

ആഡംബര കപ്പലിലെ മയക്കുമരുന്ന്​ കേസുമായി ബന്ധപ്പെട്ട്​ ഒക്​ടോബർ മൂന്നിനാണ്​ ബോളിവുഡ്​ താരം ഷാരൂഖ്​ ഖാന്‍റെ മകൻ ആര്യൻ ഖാനെ അറസ്റ്റ്​ ചെയ്​തത്​. ആര്യന്‍റെ സുഹൃത്തുക്കളെയും പിടികൂടിയിരുന്നു. നിലവിൽ ആർതർ റോഡ്​ ജയിലിലാണ്​ ആര്യനും സുഹൃത്തുക്കളും.

2018-19 ലെ വാട്​സ്​ആപ്​ ചാറ്റിന്‍റെ അടിസ്​ഥാനത്തിലാണ്​ അനന്യയെ ചോദ്യം ചെയ്തത്​. മണിക്കൂറുകളോളമാണ്​ അനന്യയെ രണ്ടുദിവസം എൻ.സി.ബി ചോദ്യം ചെയ്​തത്​. താൻ ലഹരി ഉപയോഗിക്കുകയോ വിതരണം ചെയ്യുകയോ ചെയ്​തിട്ടില്ല. ആര്യനുമായി ലഹരിയുമായി ബന്ധപ്പെട്ട കാര്യങ്ങൾ സംസാരിച്ചിട്ടില്ല -അനന്യ പറഞ്ഞു.

എന്നാൽ, 2018-19ൽ അനന്യ ആര്യന്​ ലഹരിമരുന്ന്​ ഇടപാടുകാരുടെ നമ്പറുകൾ നൽകുകയും മൂന്നുവട്ടം ലഹരി വാങ്ങാൻ സഹായിച്ചെന്നും എൻ.സി.ബി പറയുന്നു.

അനന്യ പാണ്ഡെയുടെ മുംബൈ ബന്ദ്രയിലെ വസതിയിൽ എൻ.സി.ബി പരിശോധന നടത്തിയിരുന്നു. ലാപ്​ടോപ്പും മൊബൈൽ ഫോണുകളും പിടിച്ചെടുത്തു. വ്യാഴാഴ്ച രണ്ടു മണിക്കൂറോളവും വെള്ളിയാഴ്ച നാലുമണിക്കൂറോളവുമാണ്​ അനന്യയെ ചോദ്യം ചെയ്​തത്​.

ആര്യന്‍റെ ജാമ്യ​ാപേക്ഷ ബോ​ംബെ ​ഹൈകോടതി ചൊവ്വാഴ്ച പരിഗണിക്കും. കഴിഞ്ഞദിവസം ഷാരൂഖ്​ ഖാൻ ജയിലിലെത്തി ആര്യനെ കണ്ടിരുന്നു.