14 മണിക്കൂർ നീണ്ട ശസ്ത്രക്രിയ, ദീപിക കക്കർ ഐ.സി.യുവിൽ; സ്നേഹത്തിനും പ്രാർത്ഥനകൾക്കും പിന്തുണക്കും നന്ദിയെന്ന് ഷോയിബ്

രണ്ടാം ഘട്ട കരൾ കാൻസറിന് 14 മണിക്കൂർ നീണ്ട ശസ്ത്രക്രിയക്ക് വിധേയയായ നടി ദീപിക കക്കറിന്റെ ആരോഗ്യ സ്ഥിതിയെക്കുറിച്ച് പുതിയ വിവരങ്ങൾ പങ്കുവെച്ച് ഭർത്താവും നടനുമായ ഷോയിബ് ഇബ്രാഹിം. നിലവിൽ ദിപ്പി ഐ.സി.യുവിലാണെന്നും വേദനയുണ്ട്. നിങ്ങളുടെ സ്നേഹത്തിനും പ്രാർത്ഥനകൾക്കും പിന്തുണക്കും എല്ലാവർക്കും എന്റെ ഹൃദയത്തിൽ നിന്ന് നന്ദി ഷോയിബ് സോഷ്യൽ മീഡിയ പോസ്റ്റിലൂടെ അറിയിച്ചു.

കാൻസർ സ്ഥിരീകരിച്ചത് മുതൽ ദീപികയുടെ എല്ലാ വിവരങ്ങളും ഷോയിബ് സോഷ്യൽ മീഡിയയിലൂടെ ആരാധകരെ അറിയിച്ചിരുന്നു. കഴിഞ്ഞയാഴ്ച, ഷോയിബും ദീപികയും യൂട്യൂബ് ചാനലിലൂടെ രോഗത്തെക്കുറിച്ച് തുറന്നു പറഞ്ഞിരുന്നു. മേയ് 16നാണ് ദീപികയുടെ ഇടത് കരളിൽ ട്യൂമർ കണ്ടെത്തിയത്. ട്യൂമർ കാൻസറാണോ എന്ന് അറിയാനുള്ള പരിശോധനകൾക്ക് ശേഷമാണ് നടി അസുഖ വിവരം ഇൻസ്റ്റഗ്രാമിലൂടെ പങ്കുവെച്ചത്.

'കണ്ടിട്ടുള്ളതും അനുഭവിച്ചതുമായ ഏറ്റവും പ്രയാസകരമായ സമയങ്ങളിൽ ഒന്നായിരുന്നു അത്! എന്റെ മുഴുവൻ കുടുംബവും എന്റെ കൂടെയുണ്ടെങ്കിൽ.... നിങ്ങളുടെ എല്ലാവരുടെയും സ്നേഹവും പ്രാർഥനകളും കൊണ്ട് ഞാൻ ഇതും മറികടക്കും' -എന്നാണ് ദീപിക എഴുതിയത്.