ഒ.എം.ആർ പരീക്ഷകൾ പി.എസ്.സി സെപ്​റ്റംബറിൽ പുനരാരംഭിക്കും

തിരുവനന്തപുരം: ഒ.എം.ആർ പരീക്ഷകൾ സെപ്​റ്റംബർമുതൽ പുനരാരംഭിക്കാൻ പി.എസ്.സി ഒരുങ്ങുന്നു. കോവിഡിനെതുടർന്ന് മാറ്റിവെച്ച പരീക്ഷകളാണ് ആദ്യം നടത്തുക. മാർച്ച് , ഏപ്രിൽ, മേയ് മാസങ്ങളിലെ മാറ്റിവെച്ച പരീക്ഷകൾക്ക് പുതിയ തീയതി നിശ്ചയിക്കാനും പരീക്ഷാകേന്ദ്രങ്ങൾ കണ്ടെത്താനും തിങ്കളാഴ്​ച ചേർന്ന കമീഷൻ യോഗം പരീക്ഷാവിഭാഗത്തിന് നിർദേശം നൽകി. 1000ന് താഴെ അപേക്ഷകരുള്ള പരീക്ഷകൾ കോവിഡ് മാനദണ്ഡങ്ങൾ പാലിച്ച് പി.എസ്.സി പരീക്ഷാകേന്ദ്രത്തിൽ നടത്തും. ആരോഗ്യം, പൊലീസ് തുടങ്ങി പ്രധാന വകുപ്പുകളിലെ തസ്​തികകളിലേക്കുള്ള പരീക്ഷകൾക്ക് മുൻഗണന നൽകും. കെ.എ.എസ് പ്രാഥമിക പരീക്ഷയുടെ ഫലം രണ്ടാഴ്ചക്കുള്ളിൽ പ്രസിദ്ധീകരിക്കാനാകും. വനിതാ പൊലീസി​െൻറ റാങ്ക്പട്ടികയും ഉടന്‍ പ്രസിദ്ധീകരിക്കും. അവശേഷിക്കുന്ന കായികപരീക്ഷ പൂര്‍ത്തിയാക്കി വിജയിക്കുന്നവരെ റാങ്ക്പട്ടികയില്‍ പിന്നീട് കൂട്ടിച്ചേര്‍ക്കാനും തീരുമാനിച്ചു.

സര്‍വകലാശാല കമ്പ്യൂട്ടര്‍ അസിസ്​റ്റൻറിന് 2000 പേരുടെ സാധ്യതാപട്ടിക പ്രസിദ്ധീകരിക്കും. വനിതാ ശിശുവികസനവകുപ്പില്‍ ഐ.സി.ഡി.എസ് സൂപ്പര്‍വൈസര്‍ നിയമനത്തിന് 1200 പേരുടെ ചുരുക്കപ്പട്ടിക പ്രസിദ്ധീകരിക്കും. 600 പേരെ മുഖ്യപട്ടികയില്‍ ഉള്‍പ്പെടുത്തും.

ആരോഗ്യവകുപ്പില്‍ മെഡിക്കല്‍ റെക്കോഡ്​സ് ലൈബ്രേറിയന്‍, ഹൈസ്‌കൂള്‍ അസിസ്​റ്റൻറ് സോഷ്യൽ സയന്‍സ് തമിഴ് മീഡിയം തസ്തികകള്‍ക്ക് ഓണ്‍ലൈന്‍ പരീക്ഷ നടത്തും. ക​െണ്ടയ്​ൻമെൻറ് സോണിനെതുടർന്ന് അടച്ചിട്ട പി.എസ്.സി ആസ്ഥാനത്ത് ബുധനാഴ്ചമുതൽ അഭിമുഖ, വകുപ്പുതല പരീക്ഷകൾ ആരംഭിക്കും. ക്വാറൻറീനിൽ കഴിയുന്നവർക്കും മറ്റ് രോഗബാധയുള്ളവർക്കും അഭിമുഖത്തിനുള്ള തീയതി മാറ്റിനൽകും. അതിന് ഉദ്യോഗാർഥികൾ പ്രത്യേകം അപേക്ഷ നൽകണം.