Top
Begin typing your search above and press return to search.
keyboard_arrow_down
Login
exit_to_app
exit_to_app
അടൽ ടണലിൽ തലയുയർത്തിയൊരു മലയാളി; പ്രതിസന്ധികളെ അതിജയിച്ച നാളുകൾ ഓർത്തെടുത്ത്​ പുരുഷോത്തമൻ
cancel
camera_alt

അടൽടണൽ നിർമാണത്തിന്​ നേതൃത്വം നൽകിയ ബോർഡർ റോഡ്സ് ഓർഗനൈസേഷൻ ചീഫ് എൻജിനീയർ കെ.പി. പുരുഷോത്തമൻ

Homechevron_rightEditors Choicechevron_rightഅടൽ ടണലിൽ...

അടൽ ടണലിൽ തലയുയർത്തിയൊരു മലയാളി; പ്രതിസന്ധികളെ അതിജയിച്ച നാളുകൾ ഓർത്തെടുത്ത്​ പുരുഷോത്തമൻ

text_fields
bookmark_border

മഞ്ഞുവീഴ്​ച, മണ്ണിടിച്ചിൽ, തുരങ്കം ഇടിഞ്ഞുവീഴൽ, കോവിഡ്​ ഭീതി... 10 വർഷത്തെ അടൽ തുരങ്കപാത നിർമാണത്തിനിടെ നേരിട്ട വെല്ലുവിളികൾ നിരവധിയാണ്​. ഇവയെല്ലാം അതിയിച്ച്​ ലോകത്തിലെ ഏറ്റവും ഉയരത്തിലുള്ള തുരങ്കപാതയെന്ന തലയെടുപ്പുമായി അടൽ ടണൽ യാഥാർഥ്യമായപ്പോൾ മലയാളികളുടെ അഭിമാനമുയർത്തി നിൽക്കുന്നൊരാളുണ്ട്​. ബോർഡർ റോഡ്സ് ഓർഗനൈസേഷൻ ചീഫ് എൻജിനീയറും കണ്ണൂർ ഏച്ചൂർ സ്വദേശിയുമായ കെ.പി. പുരുഷോത്തമൻ.

രാജ്യത്തി​െൻറ വിവിധ ഭാഗങ്ങളിൽ നിന്ന്​ അഭിനന്ദനങ്ങൾ പ്രവഹിക്കു​​േമ്പാൾ പുരുഷോത്തമന്​ പറയാനുള്ളത്​ ഇതാണ്​- '‌ഇതൊരാളുടെ നേട്ടമല്ല, ഒരു കൂട്ടം ആളുകളുടെ സമർപ്പണത്തി​െൻറ വിജയമാണ്'. ഹിമാചൽ പ്രദേശിലെ മണാലിയെ ലഹൗൾ– സ്പിതിയുമായി ബന്ധിപ്പിക്കുന്ന തുരങ്കത്തി​െൻറ നിർമാണം അതി സങ്കീർണമായിരുന്നെന്ന്​ പു​രുഷോത്തമൻ പറയുന്നു. ഏത്​ നിമിഷവും അപകടം പ്രതീക്ഷിച്ചായിരുന്നു നിർമാണത്തി​െൻറ ഓരോ ഘട്ടവും. ഭൂമി തുരന്നുള്ള നിർമാണമായിരുന്നതിനാൽ പ്രകൃതിദുരന്തങ്ങൾ മുന്നിൽക്കണ്ട്​ വേണമായിരുന്നു ഓരോഘട്ടവും മുന്നോട്ടുകൊണ്ടുപോകാൻ. എത്രയൊക്കെ ആസൂത്രണവും സുരക്ഷ മുൻകരുതലുകളും സ്വീകരിച്ചെങ്കിലും ഏത്​ നിമിഷവും ജീവൻ നഷ്​ടപ്പെ​ട്ടേക്കാമെന്ന്​ അവസ്​ഥയായിരുന്നു. മണ്ണൊലിപ്പും മണ്ണിടിച്ചിലും പാറ പൊട്ടിത്തെറിക്കലുമൊക്കെ പല തവണ ഉണ്ടാകുകയും ചെയ്​തു.

രണ്ടു വശങ്ങളെ സൗത്ത്​ പോർട്ടൽ, നോർത്ത്​ പോർട്ടൽ എന്ന്​ തരംതിരിച്ചാണ്​ തുരങ്കത്തി​െൻറ നിർമാണം തുടങ്ങിയത്. മഞ്ഞുവീഴ്​ചയും മറ്റും പ്രതിസന്ധി സൃഷ്​ടിച്ചതിനാൽ നിർമാണത്തി​െൻറ നാലിലൊരു ഭാഗം മാത്രമേ നോർത്ത് പോർട്ടലിൽ നടന്നുള്ളൂ. 25ലധികം തവണയാണ്​ മണ്ണൊലിച്ചിൽ ഉണ്ടായത്​. ഒരിക്കൽ ഉച്ചഭക്ഷണ സമയത്തു തുരങ്കത്തി​െൻറ ഒരു ഭാഗം തകർന്നുവീണപ്പോൾ ആരും സ്ഥലത്തില്ലാതിരുന്നതിനാലാണ് ആളപായം ഒഴിവായത്. നിർമാണത്തിനിടെ കോവിഡും പ്രതിസന്ധി സൃഷ്​ടിച്ചു. ജോലി സ്​ഥലം അടച്ചിടേണ്ടി വന്നു. തൊഴിലാളികളെ കിട്ടാതെയുമായി. പിന്നീട്​ സർക്കാറി​െൻറ പ്രത്യേക അനുമതിയോടെയാണ്​ നിർമാണം പുനരാരംഭിച്ചത്​. ഒരു കോവിഡ്​ കേസ്​ പോലും സൈറ്റിൽ ഉണ്ടായില്ലെന്നും പു​രുഷോത്തമൻ പറയുന്നു.


മുണ്ടേരി പഞ്ചായത്ത് വൈസ് പ്രസിഡൻറായിരുന്ന കേളമ്പേത്ത്് കണ്ണ​െൻറയും കുന്നിപ്പറമ്പിൽ യശോദയുടെയും മകനാണു പുരുഷോത്തമൻ. കണ്ണൂരിൽ നിന്ന്​ പോളിടെക്നിക്ക്​ പാസായ ശേഷം ഡൽഹിയിലെത്തിയാണ്​ സിവിൽ എൻജിനിയറിങ്ങിൽ ബിരുദം നേടുന്നത്​. കൺസ്ട്രക്‌ഷൻ മാനേജ്‌മെൻറിൽ പി.ജി ഡിപ്ലോമയും എം.ബി.എയുമുണ്ട്​. 1987ൽ ബോർഡർ റോഡ്സ് ഓർഗനൈസേഷനിലേക്ക്. അസി. എക്സിക്യൂട്ടീവ് എൻജിനിയറായി ആൻഡമാൻ നിക്കോബാർ ദ്വീപിലായിരുന്നു ആദ്യനിയമനം. നാഗാലാൻഡ്, രാജസ്ഥാൻ, മിസോറം, ജമ്മു കശ്മീർ, സിക്കിം, അരുണാചൽ പ്രദേശ്, ഉത്തരാഖണ്ഡ് എന്നിവിടങ്ങളിൽ ജോലി ചെയ്തിട്ടുണ്ട്​. അതിർത്തികളിലെ നിർണായക റോഡ് പദ്ധതികളിലും ഭാഗമായിട്ടുണ്ട്​. 2015 മുതൽ 2017 വരെ രണ്ട്​ വർഷം ഡപ്യൂട്ടേഷനിൽ കേരളത്തിലും സേവനമനുഷ്ഠിച്ചു. 2019ൽ വിശിഷ്​ട സേവാ മെഡലും ലഭിച്ചു. തലശ്ശേരി സ്വദേശി സിന്ധുവാണ് ഭാര്യ. മകൻ വരുൺ എം.ബി.ബി.എസ് കഴിഞ്ഞു. മകൾ യുവിക എൻജിനിയറിങ് കഴിഞ്ഞ് ഉപരിപഠനത്തിനായി യു.എസിലും.

മിച്ചം പിടിച്ചത്​ 800​ കോടി

കോവിഡ്​ കാലത്തെ തടസ്സമൊഴിച്ചാൽ മൂന്ന്​ ഷിഫ്റ്റിലായി 24 മണിക്കൂറും നിർമാണം നടന്നിരുന്നു. ഒരേ സമയം 3000 തൊഴിലാളികളും 770 ഓളം എൻജിനീയർമാരും സൂപ്പർവൈസർമാരും കൺസൾട്ടൻറുമാരും കരാറുകാരും നിർമാണത്തിൽ പങ്കാളികളായി. ഇത്രയധികം ഉയരത്തിലെ കാലാവസ്​ഥയിൽ തുടർച്ചയായി ജോലി ചെയ്യുന്നത്​ ആരോഗ്യപ്രശ്​നങ്ങൾ ഉണ്ടാക്കുമെന്നതിനാൽ ഒരു ടേമിൽ ജോലി ചെയ്​തവർക്ക്​ കുറച്ചുവർഷങ്ങൾക്കു ശേഷമാണ്​ അടുത്ത ടേം നൽകിയത്​. 2010ൽ ആണു തുരങ്കനിർമാണം ആരംഭിച്ചത്. ആറു വർഷത്തിനകം തീർക്കാനായിരുന്നു പദ്ധതി. പക്ഷേ, കാലാവസ്​ഥ അടക്കമുള്ള കാര്യങ്ങൾ പ്രതിസന്ധി തീർത്തപ്പോൾ നാല്​ വർഷം അധികം വേണ്ടി വന്നു. മണ്ണൊലിപ്പും മറ്റുമുള്ള ഷിയർ സോൺ എന്നറിയപ്പെടുന്ന മേഖലയിൽ 600 മീറ്റർ പൂർത്തിയാക്കാൻ നാലു വർഷത്തോളമെടുത്തു. 4083 കോടി ചെലവു കണക്കാക്കിയിരുന്ന പദ്ധതി 3200 കോടിക്ക്​ പൂർത്തിയാക്കാനായി. 800 കോടിയിലേറെ രൂപയോളം മിച്ചം പിടിക്കാൻ കഴിഞ്ഞു.


സമുദ്രനിരപ്പിൽനിന്ന് 3000 മീറ്റർ (10,000 അടി) ഉയരത്തിൽ പർവതം തുരന്ന് നിർമിച്ച, 9.02 കിലോമീറ്ററുള്ള, കുതിരലാടത്തി​െൻറ ആകൃതിയിലുള്ള സിംഗ്​ൾ-ട്യൂബ് ഡബിൾ ലെയിൻ ടണലാണിത്. 12,252 മെട്രിക് ടൺ സ്​റ്റീൽ, 1,69,426 മെട്രിക് ടൺ സിമൻറ്​ 1,01,336 മെട്രിക് ടൺ കോൺക്രീറ്റ് എന്നിവ നിർമാണത്തിന് ഉപയോഗിച്ചു. 5,05,264 മെട്രിക് ടൺ പാറയും മണ്ണുമാണു ഇവിടെനിന്നു തുരന്നെടുത്തത്. സാധാരണ സമാന്തരമായി നിർമിക്കുന്നതിന്​പകരം രക്ഷാതുരങ്കം താഴെ നിർമിച്ചിരിക്കുന്നു എന്നതും അടൽ ടണലി​െൻറ പ്രത്യേകതയാണ്​.

8 മീറ്ററാണു റോഡ്‌വേ. 5.525 മീറ്റർ ഓവർഹെഡ് ക്ലിയറൻസുണ്ട്. സെമി ട്രാൻ‌വേഴ്‌സ് വെൻറിലേഷൻ സിസ്​റ്റം, സൂപ്പർവൈസറി കൺട്രോൾ ആൻഡ് ഡേറ്റ അക്വിസിഷൻ (എസ്‌.സി.എ‌.ഡി.‌എ), നിയന്ത്രിത അഗ്നിശമന-പ്രകാശ നിരീക്ഷണം, ഓരോ 150 മീറ്ററിലും ടെലഫോൺ സൗകര്യം, ഓരോ 60 മീറ്ററിലും ഫയർ ഹൈഡ്രൻറ്​, ഓരോ 500 മീറ്ററിലും എമർജൻസി എക്സിറ്റ്, ഓരോ കിലോമീറ്ററിലും വായുവി​െൻറ ഗുണനിലവാര നിരീക്ഷണം, ഓരോ 250 മീറ്ററിലും സി.സി.ടിവി കാമറകളുള്ള ഓ​ട്ടോമാറ്റിക് ഡിറ്റക്‌ഷൻ സംവിധാനം തുടങ്ങിയവയെല്ലാം ടണലിലുണ്ട്​.


ഏതു കാലാവസ്ഥയിലും ലഡാക്കിലേക്കും ലേയിലേക്കും എത്താനുള്ള മാർഗം കൂടിയാണു ഹിമാലയത്തിലെ പിർ പഞ്ജൽ റേഞ്ചിലെ തുരങ്കം പൂർത്തിയായതോടെ തുറന്നു കൊടുക്കപ്പെട്ടത്​. മണാലിയും ലേയും തമ്മിലുള്ള ദൂരത്തിൽ 46 കിലോമീറ്ററോളം കുറവുണ്ടാക്കും. മണാലിയിൽനിന്ന് ലഹൗളിലേക്കും സ്പിതി വാലിയിലേക്കുമുള്ള യാത്ര നിലവിൽ അഞ്ച് മണിക്കൂറിൽ നിന്ന്​ 10 മിനിറ്റായി ചുരുങ്ങി. കനത്ത മഞ്ഞുവീഴ്ച കാരണം ആറുമാസത്തോളം പുറംലോകവുമായി ബന്ധമില്ലാതെ കിടക്കുന്ന ലഹൗൾ, സ്പിതി വാലി നിവാസികൾക്ക് തുരങ്കം ഏറെ സഹായകമാകും. ലഡാക്കിലുള്ള സൈനികർക്ക് ഏതു കാലാവസ്ഥയിലും യാത്ര സാധ്യമാകുകയും ചെയും.


Show Full Article
TAGS:Atal Tunnel K.P. Purushothaman 
Web Title - Malayali engineer describes specialities of atal tunnel
Next Story