കെ.എ. കൊടുങ്ങല്ലൂർ സാഹിത്യ പുരസ്കാരം വത്സലൻ വാതുശ്ശേരിക്ക്​

കോഴിക്കോട്: സാഹിത്യകാരനും ചിന്തകനും വാരാദ്യമാധ്യമം പ്രഥമ പത്രാധിപരുമായ കെ.എ. കൊടുങ്ങല്ലൂരിന്‍റെ സ്മരണക്ക് ‘മാധ്യമം’ റിക്രിയേഷന്‍ ക്ലബ് ഏര്‍പ്പെടുത്തിയ സാഹിത്യ പുരസ്കാരം വത്സലൻ വാതുശ്ശേരിക്ക്​. ‘ഗ്രന്ഥാലോകം’ സാഹിത്യ മാസികയിൽ പ്രസിദ്ധീകരിച്ച ‘ആകസ്മികം’ എന്ന കഥയാണ്​ അദ്ദേഹത്തെ 2024ലെ പുരസ്കാരത്തിന്​ അർഹനാക്കിയത്​. 20,000 രൂപയും പ്രശസ്തിപത്രവും ശിൽപവും അടങ്ങുന്ന അവാർഡ് മേയ്​ അവസാനവാരം സമ്മാനിക്കും.

എഴുത്തുകാരായ കെ.പി. രാമനുണ്ണി, യു.കെ. കുമാരൻ, പി.കെ. പാറക്കടവ്​ എന്നിവരടങ്ങിയ ജൂറിയാണ്​ ജേതാവിനെ തെരഞ്ഞെടുത്തത്​. കഥാ സന്ദർഭങ്ങളെ ധ്വനിപ്പിച്ചുകൊണ്ട്‌ തന്നെ കഥയെ എങ്ങനെ തീവ്ര അനുഭവമാക്കി മാറ്റാൻ കഴിയും എന്ന് തെളിയിക്കുന്ന കഥയാണ് വത്സലൻ വാതുശ്ശേരിയുടെ 'ആകസ്മികം' എന്ന് ജൂറി വിലയിരുത്തി.

ചാലക്കുടി സ്വദേശിയായ വത്സലൻ വാതുശ്ശേരിക്ക് നേരത്തെ​ മലയാറ്റൂർ രാമകൃഷ്ണൻ അവാർഡ്​, വി.ടി. കുമാരൻ അവാർഡ്, ഇടശ്ശേരി അവാർഡ്, എസ്.ബി.ടി അവാർഡ്, അപ്പൻ തമ്പുരാൻ നോവൽ പുരസ്കാരം, കേരള സംസ്ഥാന ചലച്ചിത്ര അക്കാദമി ടെലിവിഷൻ അവാർഡ് എന്നിവ ലഭിച്ചിട്ടുണ്ട്​. ഭാര്യ: ഡോ. ബി. പാർവതി, മകൾ: അഭിരാമി.

വാർത്തസമ്മേളനത്തിൽ ജൂറി അംഗം പി.കെ. പാറക്കടവ്, മാധ്യമം റിക്രിയേഷൻ ക്ലബ്​ പ്രസിഡന്‍റ്​ ഹാഷിം എളമരം, പുരസ്കാര സമിതി കൺവീനർ എ. ബിജുനാഥ്​ എന്നിവർ പ​ങ്കെടുത്തു.​