നദിമൂലം ഗതിമൂലം -കവിത

എത്രയോ മുഖങ്ങളാൽ കളിയാട്ടമാടി ഞാൻ

ഒടുവിലായെൻ്റെയൊറ്റമുഖമറിയുവാൻ

എത്രയോ രസങ്ങളിൽ ജിഹ്വയെ

പുണർന്നു ഞാൻ

ഒടുവിലായിയൊരൊറ്റ രുചിയെയറിയുവാൻ

എത്ര രാഗങ്ങളിൽ പ്രണയം നുകർന്നു ഞാൻ

ഒടുവിലീയമൃതപ്രവാഹത്തെയറിയുവാൻ

എത്രയോ പൂക്കളുടെ ഗന്ധത്തെയറിഞ്ഞു ഞാൻ

ഒടുവിലീയൊരൊറ്റ ഗന്ധമാസ്വദിക്കുവാൻ

എത്ര സുധാരസമൊഴുകുന്ന കണ്ടു ഞാൻ

അകതാരിലൊഴുകുന്ന തേൻകണമറിയുവാൻ

എത്രയോ പവനഗതികളെയറിഞ്ഞു ഞാൻ

ഒടുവിലീ പ്രാണൻ്റെ പ്രവാഹത്തെയറിയുവാൻ

നദിമൂലം ഗതിമൂലം തേടണ്ട നാമൊന്നും

ശുദ്ധമാണൊഴുകി വരുന്നതീ തോയം.