പകക്കുണ്ട് നിലപാട്... കവിത

ആഞ്ഞ് വലിച്ച്

നെറുകയിൽ കയറ്റണം.

ഉറങ്ങുമ്പൊഴും മനസ്സിലുണ്ടാവണം.

ഭസ്മമാക്കാനുള്ള ശക്തിയുണ്ടാവണം.

പറ്റിയാൽ കത്തിച്ചു നിർത്തണം.

പകക്ക് ഒരു നേരമുണ്ടുണരാൻ

അമർന്ന്നിന്ന് , അനങ്ങാതെ,

ചാരെ നിന്നറിയാതെ

പുകഞ്ഞ് നിൽക്കണ മതുവരെ !

പകക്കുണ്ട് നിലപാട്,

വീട്ടുവാൻ

ചില തീർച്ചയും.

അതിർത്തികൾക്കുണ്ട്

അഭയാർത്ഥിയോടുണ്ട്.

ചോര കീറിയ

എരിവോർമ്മയുണ്ട്.

വംശ പരമ്പരയാൽ തലമൂത്ത പകകൾക്ക് ഊറ്റം കൂടിയ ചില വിഗ്രഹങ്ങളുണ്ടവിടെ.

കുഞ്ഞിനെ, അമ്മയെ, പാടുന്ന വേടനെ,

പകകൊണ്ട് തൂക്കുമ്പോൾ

നീയെന്നിൽ തുടരുക

കനലായി ,

കുത്തു വാക്കായി -

കൊടും പകയായി

ജ്വലിച്ചങ്ങ് നിൽക്കുക.