മുല്ലനേഴി പുരസ്​കാരം മുരുകൻ കാട്ടാക്കടക്ക്​

തൃശൂർ: മുല്ലനേഴി ഫൗണ്ടേഷനും അവിണിശ്ശേരി സർവീസ്​ സഹകരണ ബാങ്കും സംയുക്തമായി നൽകുന്ന മുല്ലനേഴി പുരസ്​കാരം ഈ വർഷം കവിയും ഗാനരചയിതാവുമായ മുരുകൻ കാട്ടാക്കടക്ക്​ നൽകുമെന്ന്​ ഫൗണ്ടേഷൻ സെക്രട്ടറി കവി സി. രാവുണ്ണിയും ട്രഷറർ ജയൻ കോമ്രേഡും വാർത്തസമ്മേളനത്തിൽ അറിയിച്ചു.

'ചോപ്പ്​' എന്ന സിനിമക്കുവേണ്ടി രചിച്ച 'മനുഷ്യനാകണം..' എന്ന ഗാനത്തിനാണ് പുരസ്​കാരം. 15,001 രൂപയും പ്രശസ്​തിപത്രവും ഫലകവും അടങ്ങുന്ന പുരസ്​കാരം ഈമാസം 31ന്​ ഉച്ചകഴിഞ്ഞ്​ മൂന്നിന്​ തൃശൂരിൽ സാഹിത്യ അക്കാദമി ഹാളിൽ നടക്കുന്ന ചടങ്ങിൽ മന്ത്രി ഡോ. ആർ. ബിന്ദു സമ്മാനിക്കും. അശോകൻ ചരുവിൽ, കാവുമ്പായി ബാലകൃഷ്​ണൻ, രാവുണ്ണി എന്നിവരുൾപ്പെട്ട സമിതിയാണ്​ പുരസ്​കാരം നിർണയിച്ചത്​.

ഇതോടൊപ്പം നൽകുന്ന വിദ്യായ കാവ്യപ്രതിഭ പുരസ്​കാരത്തിന്​ അഞ്ച്​ പേർ അർഹരായി. തളിപ്പറമ്പ്​ വിദ്യാനികേതൻ ടാഗോർ ജി.എച്ച്​.എസ്​.എസിലെ ആറാം ക്ലാസ്​ വിദ്യാർഥിനി കെ.വി. മെസ്​ന, തിരുവനന്തപുരം കോട്ടൺഹിൽ സ്​കൂളിലെ ബി. ഗൗരി, കാസർകോട്​​ ചീമേനി ജി.എച്ച്​.എസ്​.എസിലെ പി. നിരഞ്​ജന, പാലക്കാട്​ പെരുമുടിയൂർ ഓറിയൻറൽ ജി.എച്ച്​.എസ്​.എസിലെ സി.ടി. റുക്​സാന, തൃശൂർ നടവരമ്പ്​ ജി.എച്ച്​.എസ്​.എസിലെ എം. മനീഷ എന്നിവരാണ്​​ പ്രശസ്​തി പത്രവും ഫലകവും പുസ്​തകങ്ങളും അടങ്ങുന്ന പുരസ്​കാരത്തിന്​ അർഹരായത്​.