തുമ്പയും കുഞ്ഞുമോളും -കവിത

ബാലകൃഷ്ണൻ മൊകേരി എഴുതിയ കവിത

തുമ്പയും കുഞ്ഞുമോളും

പടിവാതിൽക്കൽ

അച്ഛനെ കാത്തിരിക്കുന്ന

പൂമ്പാറ്റ പോലുള്ള കുഞ്ഞുമോളോട്,

പാതയോരത്ത്

എങ്ങനെയോ അതിജീവിച്ചു നിന്ന

ഒരു തുമ്പ

ഇടറിയ വാക്കുകളാൽ,

പൂക്കളമൊരുക്കേണ്ടേ കുഞ്ഞേ,

എന്നെ വിളിക്കുന്നില്ലേ ?

എന്നു ചോദിച്ചതു കേട്ട്

കാറ്റു പോലും ശ്വാസമടക്കിയപ്പോൾ,

പൂക്കളം തീർക്കാതെ -

യോണമില്ലല്ലോ എന്നും

നിന്നെപ്പോലുള്ള കാട്ടുചെടികളുടെ

പൂവിറുക്കാറില്ല ഞങ്ങളെന്നും,

അച്ഛൻ അങ്ങാടിയിൽ നിന്ന്

കൊണ്ടുവരുന്ന വില കൂടിയ

പല തരം പൂക്കളാൽ

ഞങ്ങൾ പൂക്കളം തീർക്കുമെന്നും

കുഞ്ഞുമോൾ പറഞ്ഞു.

അപ്പോൾ,

ഒരു കാറ്റുപോലുമില്ലെങ്കിലും

തുമ്പച്ചെടി ഒടിഞ്ഞ്

നീർച്ചാലിലേക്കു വീണുപോയി!