ജിദ്ദ പുസ്​തക മേളക്ക്​ തുടക്കം, ​900 പ്രസാധകർ

ജിദ്ദ: ജിദ്ദ പുസ്​തകമേള ആരംഭിച്ചു. സൗദിയിലെയും അന്താരാഷ്‌ട്ര സാംസ്‌കാരിക രംഗത്തെ പ്രമുഖരുടെയും പ്രഭാഷകരുടെയും സമൂഹത്തിലെ വിവിധ വിഭാഗങ്ങളിലുള്ളവരുടെയും സാന്നിധ്യത്തിൽ വ്യാഴാഴ്​ച വൈകീട്ടാണ്​​ 'സൂപ്പർ ഡോം' കേന്ദ്രത്തിൽ​​ സാഹിത്യ-പ്രസിദ്ധീകരണ-വിവർത്തന അതോറിറ്റി പുസ്​തക മേള ഉദ്​ഘാടനം ചെയ്​തത്​. ഇത്തവണ മേളയിൽ 900-ലധികം പ്രാദേശിക, അറബ്, അന്തർദേശീയ പ്രസിദ്ധീകരണ സ്ഥാപനങ്ങൾ പങ്കെടുക്കുന്നുണ്ട്​. സ്വയം പ്രസിദ്ധീകരിച്ച എഴുത്തുകാരുടെ 400-ലധികം ശീർഷകങ്ങൾ, ഓഡിയോ ബുക്കുകൾക്കുള്ള പവലിയനുകൾ, ഡിജിറ്റൽ ലൈബ്രറി, വായനാ സെഷനുകളും ഏരിയകളും, പുസ്​തക പ്രേമികളെ ഒന്നിപ്പിക്കുന്ന കഫേകൾ എന്നിവയും ഉൾപ്പെടുന്നു.

പ്രാദേശികവും അന്തർദേശീയവുമായ രചയിതാക്കളുടെയും എഴുത്തുകാരുടെയും ശിൽപശാലകളും വായനക്കാരെ ഒരുമിച്ച് കൊണ്ടുവരുന്ന 'ബുക്ക് ടോക്ക്', ഡയലോഗ് സെഷനുകൾ, കവിതാ സായാഹ്നങ്ങൾ, ജാപ്പനീസ് കാർട്ടൂണുകൾക്കായുള്ള കോമിക്സ്​ (ആനിമേഷൻ)​, തിയേറ്റർ, സ്റ്റോറി ടെല്ലേഴ്‌സ് കോർണർ, ഗെയിംസ് ഏരിയ, ഇൻട്രാക്​ടീവ് ഷോകൾ, ആക്‌റ്റിവിറ്റികൾ എന്നിവക്കായി പ്രത്യേക മേഖലകളും മേളയിലുണ്ട്​. മേള ഈ മാസം 17 വരെ തുടരും. സമഗ്രവും വൈവിധ്യപൂർണവുമായ 100-ലധികം വരുന്ന വിവിധ സാംസ്​കാരിക വൈജ്ഞാനിക പരിപാടികൾ മേളയോടനുബന്ധിച്ച്​ നടക്കും. രണ്ട് സെമിനാറുകളുണ്ടാകും. ആദ്യത്തേത് ഡിജിറ്റൽ പ്രസിദ്ധീകരണത്തിനും രണ്ടാമത്തേത് സയൻസ് ഫിക്ഷനുമാണ്​. രാജ്യത്ത്​ ആദ്യമായായിരിക്കും ഇത്തരത്തിലുള്ള പരിപാടി സംഘടിപ്പിക്കുന്നത്​.

സൗദിയുടെ സാംസ്‌കാരിക രംഗത്തെ സമ്പന്നമാക്കുന്ന സാഹിത്യ നിലയമായിരിക്കും ജിദ്ദ പുസ്തകമേളയെന്ന്​ അതോറിറ്റി സി.ഇ.ഒ ഡോ. മുഹമ്മദ് ഹസൻ അലവാൻ പറഞ്ഞു. പുസ്​തക വ്യവസായവും പ്രസിദ്ധീകരണവും പ്രാപ്​തമാക്കാനും സാംസ്​കാരിക വിനിമയം പ്രോത്സാഹിപ്പിക്കാനും പൊതുജനങ്ങളുടെ അനുഭവം സമ്പന്നമാക്കാനുമാണ്​ അതോറിറ്റി ശ്രമിക്കുന്നത്​. ജിദ്ദ പുസ്തകമേള വായനയെ ജീവിതചര്യയായി പ്രോത്സാഹിപ്പിക്കും. അത്​ ധാരണകളെ വിശാലമാക്കും. ചക്രവാളങ്ങൾ തുറക്കും. അറിവി​െൻറ വിശാലമായ ഇടങ്ങളിലേക്ക് വ്യക്തിയെ ഉയർത്തും.

ജിദ്ദയുടെ ഹൃദയഭാഗത്തുള്ള സന്ദർശകർക്ക് ഒരു വിജ്ഞാന യാത്ര അത്​ പ്രദാനം ചെയ്യും. സൗദികളുടെ സാഹിത്യ പാരമ്പര്യത്തെ ഉയർത്തിക്കാട്ടുന്നതുമായിരിക്കും. പ്രമുഖ പ്രസിദ്ധീകരണ സ്ഥാപനങ്ങളെ പ്രകീർത്തിക്കുന്നതിനായി സമ്മാനങ്ങളും പൊതുജനങ്ങളെ പങ്കെടുക്കാനും പ്രേത്സാഹിപ്പിക്കുന്ന ഇൻററാക്​ടീവ് മത്സരങ്ങളും ജിദ്ദ പുസ്​തക മേളയിൽ ഒരുക്കിയിട്ടുണ്ടെന്നും സി.ഇ.ഒ പറഞ്ഞു.