കലയിലും പണക്കിലുക്കമായി ഡിജിറ്റൽ വിപ്ലവം; ഡിജിറ്റൽ ആർട്ട്​ വിറ്റുപോയത്​ 500 കോടിക്ക്​

വാഷിങ്​ടൺ: 'ബീപ്​ൾ' എന്ന പേരിൽ പ്രശസ്​തനായ അമേരിക്കൻ കലാകാരൻ ഒറ്റനാൾ കൊണ്ട്​ ലോകത്തേറ്റവും മൂല്യമുള്ള കലാരചനകളിലൊന്നിന്‍റെ ഉടമയായി. കഴിഞ്ഞ 13 വർഷങ്ങളിലായി എല്ലാ ദിവസവും നടത്തിയ രചനകളുടെ ഡിജിറ്റൽ കൊളാഷായ 'എവരിഡെയ്​സ്​- ദി ഫസ്റ്റ്​ 5000 ഡെയ്​സ്​' എന്ന കലാസൃഷ്​ടിയാണ് റെക്കോഡ്​ തുകക്ക്​ വിറ്റുപോയത്​. 6.93 കോടി ഡോളറി (504.44 കോടി രുപ)ന്​ ആയിരുന്നു വിൽപന. ഒറ്റ വിൽപനയോടെ ലോകത്തെ ഏറ്റവും മൂല്യമുള്ള മൂന്ന്​ ചിത്രകാരന്മാരിൽ ഒരാളായി ബീപ്​ൾ എന്ന മൈക്​ വിങ്ക്​ൾമാൻ.

പൂർണമായും 'ബീപ്​ൾ' സൃഷ്​ടിയെന്ന്​ ഒാരോ രചനയും തെളിയിക്കുന്ന കലാകാരന്‍റെ ഡിജിറ്റൽ മുദ്രയാണ്​ കൊളാഷിന്‍റെ സവിശേഷത. 100 ഡോളർ എന്ന വളരെ നിസ്സാരമായ തുകക്കാണ്​ ഫെബ്രുവരിയിൽ കൊളാഷിന്‍റെ ഓൺലൈൻ ലേലം ആരംഭിച്ചത്​. വ്യാഴാഴ്ചയായിരുന്നു അവസാന തീയതി. 33 പേർ അവസാനം വരെ ലേലത്തിൽനിലയുറപ്പിച്ചതോടെ​ വില കുത്തനെ ഉയർന്നു​. അമേരിക്കക്കാരായിരുന്നു പ​ങ്കെടുത്തവരിൽ ഏറെയുമെങ്കിലും യൂറോപ്​, ഏഷ്യ ഭൂഖണ്​ഡങ്ങളിൽനിന്നും പങ്കാളികളുണ്ടായതായി നടത്തിപ്പുകാരായ 'ക്രിസ്റ്റി' കമ്പനി വൃത്തങ്ങൾ പറയുന്നു.

സൗത്​ കരോലൈന ആസ്​ഥാനമായി പ്രവർത്തിക്കുന്ന ഗ്രാഫിക്​ ഡിസൈനറാണ്​ ബീപ്​ൾ. ലളിതമായും സങ്കീർണമായും ഓരോ ദിവസവും രചന നിർവഹിച്ചുവരുന്നത്​ ഒറ്റ കൊളാഷിലേക്ക്​ ചേർത്തുവെക്കുകയായിരുന്നു കലാകാരൻ. യു.എസ്​ ലേല സ്​ഥാപനമാണ്​ ക്രിസ്റ്റി.

ആദ്യ കാല രചനകളിൽ ചിലത്​ പതിവു സാധാരണ രചനകൾ മാത്രമാണെങ്കിൽ പിന്നീടുള്ളവ പലതും അതിസങ്കീർണതയും കൗതുകവും പേറുന്നവയാണ്​.

2007 മേയ്​ ഒന്നിനായിരുന്നു ആദ്യ രചന. കലാകാരൻ നേരിട്ട്​ ഇടപാടുകാരന്​ കലാസൃഷ്​ടി കൈമാറും. ​േ​ബ്ലാക്​ചെയിൻ എന്ന സാ​ങ്കേതികത ഉപയോഗിച്ച്​ ഓൺലൈൻ മോഷണം തടയും.

ക്രിപ​്​റ്റോകറൻസി ഉപയോഗിച്ചും ലേലത്തിൽ പ​െങ്കടുക്കാമെന്ന്​ നേരത്തെ ലേല കമ്പനി അറിയിച്ചതോടെ മാധ്യമങ്ങൾ ലേല വാർത്ത ഏറ്റെടുത്തിരുന്നു.