Begin typing your search above and press return to search.
exit_to_app
exit_to_app
Homechevron_rightCulturechevron_rightArtchevron_rightഅക്ഷരങ്ങളിൽ ശൈഖ്​...

അക്ഷരങ്ങളിൽ ശൈഖ്​ മുഹമ്മദിന്‍റെ ചിത്രം; ഇത്​ നേഹയുടെ സ്​നേഹ സമ്മാനം

text_fields
bookmark_border
അക്ഷരങ്ങളിൽ ശൈഖ്​ മുഹമ്മദിന്‍റെ ചിത്രം; ഇത്​ നേഹയുടെ സ്​നേഹ സമ്മാനം
cancel

ദുബൈ: നാലു​ മീറ്ററുള്ള പേപ്പർ കാൻവാസിൽ യു.എ.ഇ വൈസ്​ പ്രസിഡന്‍റും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്തൂമിന്‍റെ ചിത്രം. അതും രണ്ടുലക്ഷത്തിലധികം അക്ഷരങ്ങൾ ഉപയോഗിച്ച്​​. കോഴിക്കോട്​ പയ്യോളി സ്വദേശി നേഹ ഫാത്തിമയാണ്​ അക്ഷരച്ചിത്രം(വേഡ്​ ആർട്ട്​) കൊണ്ട്​ ശൈഖ്​ മുഹമ്മദിന്​ സ്​നേഹസമ്മാനമൊരുക്കിയത്​. ഇത്​ അദ്ദേഹത്തിന്​ നേരിട്ട്​ സമ്മാനിക്കുകയെന്ന ആഗ്രഹവുമായി ഇപ്പോൾ ദുബൈയിലുണ്ട്​ നേഹ.

'ലോകം ആദരിക്കുന്ന ശൈഖ്​ മുഹമ്മദിന്​ ജന്മദിന സമ്മാനമായി നൽകണമെന്ന ആഗ്രഹവുമായി തയാറാക്കിയ ചിത്രമാണിത്​. ആ സ്വപ്നവുമായി ജൂലൈ എട്ടിന്​ ദുബൈയിലെത്തിയതാണ്​. ഇതുവരെ അതിന്​ സാധിച്ചില്ല. അത്​ സാധ്യമാകുമെന്ന പ്രതീക്ഷയിൽ കഴിയുകയാണിവിടെ'-നേഹ പറയുന്നു. ഈ സ്വപ്​നം പൂവണിയുന്നതും കാത്ത്​ ഒരുമാസത്തെ വിസിറ്റ്​ വിസയിൽ ഭർത്താവ്​ ഫിനു ഷാനിനൊപ്പം ദുബൈയിൽ ഹോട്ടലിൽ മുറിയെടുത്ത്​ താമസിക്കുകയാണ്​ 21കാരി. 400ലധികം പേപ്പറുകൾ ഉപയോഗിച്ചാണ്​ കോഴിക്കോട്​ സി.എക്ക്​ പഠിക്കുന്ന നേഹ ഈ വിസ്മയചിത്രം തയാറാക്കിയത്​. 'ശൈഖ്​ മുഹമ്മദ്​ ബിൻ റാശിദ്​ ആൽ മക്തൂം'എന്ന്​ എഴുതിയാണ്​ ചി​ത്രം വരച്ചത്​.

മാർച്ച്​ അവസാനം തുടങ്ങിയ ചിത്രരചന മൂന്നുമാസത്തോളമെടുത്താണ്​ പൂർത്തിയാക്കിയത്​. ഇതി​നിടെ മേയിൽ നിക്കാഹിന്‍റെ വേളയിൽ പോലും ചിത്രരചന ഉപേക്ഷിച്ചില്ല. 20 മണിക്കൂറോളം ചിത്രരചനക്കായി മാറ്റിവെച്ച ദിവസങ്ങളുമുണ്ട്​. ഇതിനിടെ വന്ന സി.എ, ബി.കോം (ഡിസ്റ്റൻസ്​ എജുക്കേഷൻ) പരീക്ഷകളും ഉപേക്ഷിച്ചു. അഞ്ചര മീറ്റർ കാൻവാസിൽ ചിത്രമൊരുക്കാനായിരുന്നു ആദ്യം തീരുമാനിച്ചത്​. പിന്നീടത്​ നാലു​ മീറ്ററായി ചുരുക്കി.

നേഹയുടെ ഈ സ്​നേഹോദ്യമത്തെ കുറിച്ച്​ അടുത്തിടെ 'ദുബൈ ടി.വി'റിപ്പോർട്ട്​ ചെയ്തിരുന്നു. ചെറുപ്പം മുതലേ വരക്കുമായിരുന്ന നേഹ കലയുടെ ലോകത്ത് എന്നും വ്യത്യസ്തത പുലർത്തിയിട്ടുണ്ട്.

കോവിഡ്​ കാലത്ത്​ വ്യത്യസ്തമായി എന്തെങ്കിലും ചെയ്യണമെന്ന തോന്നലിൽ പെൻസിൽ കാർവിങ്​ ആണ്​ തെരഞ്ഞെടുത്തത്​. തുടർന്ന് മനുഷ്യശരീരത്തിലെ വിവിധ സംവിധാനങ്ങളുടെ പേരുകൾ പെൻസിലിൽ കൊത്തിയെടുത്തു. അത്​ ഏഷ്യൻ ബുക്​ ഓഫ്​ റെക്കോഡ്​സിൽ ഇടംപിടിച്ചു. പിന്നീട്​ ലീഫ്​ കാർവിങ്ങിലേക്ക്​ തിരിഞ്ഞു. കമൽഹാസന്‍റെ 49 കഥാപാത്രങ്ങളുടെ രൂപം ലീഫ് ആർട്ടിലൂടെ ഒരുക്കി അദ്ദേഹത്തിന്​ ജന്മദിന സമ്മാനമായി അയച്ചു നൽകിയിരുന്നു. അക്ഷരങ്ങളിലൂടെയും കമൽഹാസന്‍റെ ചിത്രം വരച്ചിട്ടുണ്ട്​. കമൽഹാസന്‍റെ പേരുകൊണ്ട് വരച്ച ചിത്രം അദ്ദേഹത്തിന്​ നേരിട്ട്​ സമ്മാനിക്കാനും കഴിഞ്ഞു. ഇന്ത്യ സ്റ്റാർ ഐക്കൺ അവാർ‍‍ഡ് 2021, ഇന്‍റർനാഷനൽ വുമൺ ഇൻസ്പയറിങ് അവാർഡ് 2021 എന്നിവ നേഹയെ തേടിയെത്തിയിട്ടുണ്ട്​.

പൊന്നാടയിൽ മോഹൻലാലിന്‍റെ മുഖം എംബ്രോയിഡറി ചെയ്തതും അദ്ദേഹത്തിന്‍റെ ചിത്രം അക്ഷരങ്ങൾ കൊണ്ട്​ വരച്ചതും നേരിട്ട്​ നൽകാനായത്​ ജീവിതത്തിലെ സന്തോഷകരമായ മുഹൂർത്തമാണെന്ന്​ നേഹ പറയുന്നു. പിതാവ്​ പയ്യോളി വാളിയിൽ വീട്ടിൽ സമദ്​, മാതാവ്​ സുഹ്​റ, സഹോദരൻ വാഹിദ്​, കോഴിക്കോട്​ മിംസിൽ ജോലി ചെയ്യുന്ന ഭർത്താവ്​ ഫിനു ഷാൻ എന്നിവരുടെ പിന്തുണയും നേഹയുടെ കലാജീവിതത്തിനുണ്ട്​.

Show Full Article
TAGS:art 
News Summary - neha with gift portrait for sheikh muhammad
Next Story