കലാമണ്ഡലം ചരിത്രത്തിൽ ആദ്യം; ഭരതനാട്യപഠനം പൂർത്തിയാക്കി ആൺകുട്ടി

ചെറുതുരുത്തി (തൃശൂർ): കലാമണ്ഡലത്തിന്റെ ചരിത്രത്തിൽ ആദ്യമായി ഭരതനാട്യപഠനം പൂർത്തീകരിച്ച ആൺകുട്ടി ബുധനാഴ്ച സ്ഥാപനത്തിന്റെ പടിയിറങ്ങും. ഡോ. ആർ.എൽ.വി. രാമകൃഷ്ണന്റെ ശിക്ഷണത്തിലാണ് ആസ്ട്രേലിയയിൽ സ്ഥിരതാമസക്കാരനായ ഡാനിയേൽ ആറുമാസം ഭരതനാട്യം പഠിച്ചത്.

11ാം വയസ്സിൽ ആറു മാസത്തെ കോഴ്സിലാണ് പിറവം മാമലശ്ശേരി വീട്ടിൽ എൽദോ-ഹണി ദമ്പതികളുടെ മകനായ ഡാനിയേൽ ചേർന്നത്. ഡാനിയേലും മാതാപിതാക്കളും വർഷങ്ങളായി ആസ്ട്രേലിയയിലാണ്. ഭരതനാട്യം പഠിക്കണമെന്ന ഡാനിയേലിന്റെ ആഗ്രഹം മാതാപിതാക്കൾ സാധിച്ചു​കൊടുക്കുകയായിരുന്നു. ആറു മാസംകൊണ്ട് ഭരതനാട്യത്തിന്റെ ഒരുവിധം പഠനങ്ങൾ എല്ലാം പൂർത്തിയാക്കി.

ബുധനാഴ്ച കലാമണ്ഡലം രജിസ്ട്രാർ ഡോ. പി. രാജേഷ് കുമാർ സർട്ടിഫിക്കറ്റ് നൽകും. നൃത്ത വിഭാഗം മേധാവി കലാമണ്ഡലം സംഗീത പ്രസാദും മറ്റ് അധ്യാപകരും പ​ങ്കെടുക്കും.

കലാമണ്ഡലത്തിൽ ആൺകുട്ടികൾക്ക് ഭരതനാട്യം പഠിക്കാൻ അവസരമുണ്ടായിരുന്നില്ല. കഴിഞ്ഞ വർഷം മുതലാണ് അവസരം ഒരുക്കിയത്. കഴിഞ്ഞ വർഷം ആൺകുട്ടികൾ പഠിക്കാനെത്തിയില്ല. ഈ വർഷമാണ് ആദ്യമായി ഒരാൾ ചേർന്നത്. രണ്ടു വേദികളിൽ ഡാനിയേലും രാമകൃഷ്ണനും ഒരുമിച്ച് ഭരതനാട്യം അവതരിപ്പിച്ചു. ആൺകുട്ടിയെ പഠിപ്പിക്കാൻ അവസരം കിട്ടിയതിന് കലാമണ്ഡലത്തിനോട് ഒരുപാട് നന്ദിയുണ്ടെന്ന് ഡോ. ആർ.എൽ.വി. രാമകൃഷ്ണൻ പറഞ്ഞു.