സു​രേ​ഷി​ൽനി​ന്ന്​ ഡാ​വി​ഞ്ചി​യി​ലേ​ക്ക്​

ര​ണ്ടാം ക്ലാ​സി​ൽ പ​ഠി​ക്കു​മ്പോ​ൾ ക​ളി​മ​ൺ ശി​ൽ​പ നി​ർ​മാ​ണ മ​ത്സ​ര​ത്തി​ൽ ല​ഭി​ച്ച പെ​ൻ​സി​ലാ​ണ്​ സു​രേ​ഷി​ന്‍റെ ക​ലാ​ജീ​വി​ത​ത്തി​ന്​ പ്ര​ചോ​ദ​ന​മാ​യ​ത്. സ്കൂ​ൾ കാ​ല​ഘ​ട്ട​ത്തി​ൽ സ​മ്മാ​ന​ങ്ങ​ൾ വാ​രി​ക്കൂ​ട്ടി​യ സു​രേ​ഷ്​ പി​ന്നീ​ട്​ ലോ​കം അ​റി​യ​പ്പെ​ടു​ന്ന ക​ലാ​കാ​ര​നാ​യി വ​ള​രു​ക​യാ​യി​രു​ന്നു.

ജ്യേ​ഷ്ഠ​ൻ​മാ​രാ​യ ഉ​ണ്ണി​കൃ​ഷ്ണ​നും സ​ന്തോ​ഷും ജോ​ലി ചെ​യ്തി​രു​ന്ന പ​ര​സ്യ സ്ഥാ​പ​ന​മാ​യ ഡാ​വി​ഞ്ചി​യി​ൽ നി​ന്നാ​ണ്​ സു​രേ​ഷും ചി​ത്ര​ക​ല​യു​ടെ കൂ​ടു​ത​ൽ പാ​ഠ​ങ്ങ​ൾ പ​ഠി​ച്ചെ​ടു​ത്ത​ത്. അ​ങ്ങി​നെ​യാ​ണ്​ ലി​യ​നാ​ഡോ ഡാ​വി​ഞ്ചി​യു​ടെ പേ​ര്​ സ്വ​ന്തം പേ​രി​നൊ​പ്പം കൂ​ട്ടി​ചേ​ർ​ത്ത​ത്. ക​ഠി​നാ​ധ്വാ​നി​യാ​യ സു​രേ​ഷ്​ ആ​ദ്യ ര​ണ്ട്​ പ​തി​റ്റാ​ണ്ട്​ ശി​ൽ​പ നി​ർ​മാ​ണ ലോ​ക​ത്താ​യി​രു​ന്നു.

കേ​ര​ള​ത്തി​ന്​ പു​റ​മെ ഇ​ത​ര സം​സ്ഥാ​ന​ങ്ങ​ളി​ലും ച​ലി​ക്കു​ന്ന വ​ലി​യ ശി​ൽ​പ​ങ്ങ​ൾ നി​ർ​മി​ച്ച്​ പ്ര​ശ​സ്ത​നാ​യി. ചി​ത്ര​ക​ല​യി​ലും അ​ദ്ദേ​ഹം വൈ​വി​ധ്യം ക​ണ്ടെ​ത്തി. 100ൽ ​പ​രം മാ​ധ്യ​മ​ങ്ങ​ൾ ഉ​പ​യോ​ഗി​ച്ച്​ 100 ചി​ത്രം വ​ര​ച്ച​ത്​ ഈ ​വ്യ​ത്യ​സ്ത കാ​ഴ്ച​പ്പാ​ടി​ന്​ ഒ​രു ഉ​ദാ​ഹ​ര​ണം മാ​ത്ര​മാ​ണ്.

പെ​ൻ​സി​ൽ, എ​ണ്ണ​ച്ചാ​യം, ജ​ല​ച്ചാ​യം, തീ, ​മെ​ഴു​കു​തി​രി​യു​ടെ പു​ക എ​ന്നി​വ​യെ​ല്ലാം വ​ര​യു​ടെ മാ​ധ്യ​മ​ങ്ങ​ളാ​യി വ​ന്നു. നി​ര​വ​ധി പു​ര​സ്കാ​ര​ങ്ങ​ളും സു​​രേ​ഷി​നെ തേ​ടി എ​ത്തി​യി​രു​ന്നു. സാ​മൂ​ഹി​ക വി​ഷ​യ​ങ്ങ​ളി​ൽ പ്ര​തി​ക​രി​ക്കാ​നും സു​രേ​ഷി​ന്‍റെ ക​ലാ​വി​രു​ത്​ ഉ​പ​യോ​ഗ​പ്പെ​ടു​ത്താ​റു​ണ്ട്. അ

ട്ട​പ്പാ​ടി​യി​ൽ ആ​ൾ​ക്കൂ​ട്ട മ​ർ​ദ​ന​ത്തി​നി​ര​യാ​യ മ​ധു​വി​ന്‍റെ ശി​ൽ​പം നി​ർ​മി​ച്ചും മു​ല്ല​പ്പെ​രി​യാ​ർ വി​ഷ​യ​ത്തി​ൽ മ​ണ​ൽ ശി​ൽ​പം നി​ർ​മി​ച്ചും സു​രേ​ഷ്​ ശ്ര​ദ്ധേ​യ​നാ​യി. പ്ര​ള​യ കാ​ല​ത്തെ ദു​രി​ത​വും അ​തി​ജീ​വ​ന ക​ഥ​യും ര​ക്ഷാ​പ്ര​വ​ർ​ത്ത​ന​വു​മെ​ല്ലാം ചേ​ർ​ത്ത ശി​ൽ​പം നി​യ​മ​സ​ഭ മ്യൂ​സി​യ​ത്തി​ലു​ണ​ട്. കോ​വി​ഡി​നെ​തി​രാ​യ ബോ​ധ​വ​ത്​​ക​ര​ണ​ത്തി​ന്‍റെ ഭാ​ഗ​മാ​യി അ​ഴി​ക്കോ​ട്​ ബീ​ച്ചി​ൽ ശി​ൽ​പം ത​യാ​റാ​ക്കി.

എ​ണ്ണി​യാ​ലൊ​ടു​ങ്ങാ​ത്ത നേ​ട്ട​ങ്ങ​ളു​മാ​യി പ്ര​വാ​സ ലോ​ക​ത്തും ചു​വ​ടു​റ​പ്പി​ക്കാ​നൊ​രു​ങ്ങു​ക​യാ​ണ്​ സു​രേ​ഷ്.

സ​സ്​​നേ​ഹം യു.​എ.​ഇ​ക്ക്...

വി​ത്തു​ക​ളാ​ൽ തീ​ർ​ത്ത മ​ഹാ​ത്​​മ ഗാ​ന്ധി, ക​ട​ൽ ഷെ​ല്ലു​ക​ൾ കൊ​ണ്ട്​ എം.​എ​സ്. ധോ​നി, മൊ​ബൈ​ൽ ഫോ​ണു​ക​ൾ കൊ​ണ്ട്​ മ​മ്മൂ​ട്ടി, അ​ടു​ക്ക​ള ഉ​പ​ക​ര​ണ​ങ്ങ​ളി​ൽ നി​ന്ന്​ മോ​ഹ​ൻ​ലാ​ൽ, മാ​ളി​ലെ സാ​ധ​ന​ങ്ങ​ൾ ഉ​പ​യോ​ഗി​ച്ച്​ എം.​എ. യൂ​സു​ഫ​ലി, മു​ള്ളാ​ണി​യാ​ൽ ഫ​ഹ​ദ്​ ഫാ​സി​ൽ, ഫു​ട്​​ബാ​ളും ജ​ഴ്​​സി​യും കൊ​ണ്ട്​ ല​യ​ണ​ൽ മെ​സ്സി, പ​പ്പാ​യ​യി​ൽ ശ​ശി ക​ലിം​ഗ, പു​സ്ത​ക​ങ്ങ​ളു​പ​യോ​ഗി​ച്ച് സ്വാ​ത​ന്ത്ര്യ സ​മ​ര സേ​നാ​നി​ അ​ബ്​​ദു​റ​ഹ്​​മാ​ൻ സാ​ഹി​ബ്, ഉ​രു​ള​ൻ ക​ല്ലി​ൽ നി​ന്ന്​ പൃ​ഥ്വി​രാ​ജ്, സ്വ​ർ​ണാ​ഭ​ര​ണം കൊ​ണ്ട്​ എ.​പി.​ജെ. അ​ബ്​​ദു​ൽ ക​ലാം,മാ​സ്കു​ക​ൾ ഉ​പ​യാ​ഗി​ച്ച്​ അ​മി​താ​ഭ്​ ബ​ച്ച​ൻ... ഡാ​വി​ഞ്ചി സു​രേ​ഷ്​ എ​ന്ന പ്ര​തി​ഭാ​സം വ്യ​ത്യ​സ്താ​ന​കു​ന്ന​ത്​ ഇ​ങ്ങ​നെ​യൊ​ക്കെ​യാ​ണ്.

ക​ല​യു​ടെ ലോ​ക​ത്ത്​ വ്യ​ത്യ​സ്ത​മാ​യി എ​ന്തൊ​ക്കെ ചെ​യ്യാ​മെ​ന്ന്​ ത​ല​പു​ക​ഞ്ഞ്​ ആ​ലോ​ചി​ച്ച്​ ന​ട​പ്പാ​ക്കു​ക​യാ​ണ്​ ഈ ​കൊ​ടു​ങ്ങ​ല്ലൂ​രു​കാ​ര​ൻ. പ്ര​കൃ​തി​യി​ലെ സ​ർ​വ​ച​രാ​ച​ര​ത്തി​ലും ത​ന്‍റെ കൈ​യൊ​പ്പു ചാ​ർ​ത്താ​ൻ സു​രേ​ഷ്​ ശ്ര​മി​ക്കു​ന്നു​ണ്ട്. കേ​ര​ള​ത്തി​ലെ പ​രീ​ക്ഷ​ണ ക​ല​ക​ൾ പ്ര​വാ​സ​മ​ണ്ണി​ലേ​ക്കും പ​റി​ച്ചു ന​ടാ​നൊ​രു​ങ്ങു​ക​യാ​ണ്​ ഡാ​വി​ഞ്ചി സു​രേ​ഷ്. മാ​സ​ങ്ങ​ളാ​യി ദു​ബൈ​യി​ൽ ത​ങ്ങു​ന്ന സു​രേ​ഷ്​ ഗ​ൾ​ഫി​ലും വി​സ്മ​യ​മൊ​രു​ക്കു​യാ​ണ്.

ലൗ ​ദു​ബൈ

ദു​ബൈ​യു​ടെ സൗ​ന്ദ​ര്യം ഇ​തി​ന​കം പ​ല കാ​ൻ​വാ​സി​ലും സു​രേ​ഷ്​ പ​ക​ർ​ത്തി​ക്ക​ഴി​ഞ്ഞു. ഉ​യ​ര​ങ്ങ​ളി​ൽ അ​ത്ഭു​തം സൃ​ഷ്ടി​ക്കു​ന്ന യു.​എ.​ഇ​യി​ലെ പ്ര​ധാ​ന കെ​ട്ടി​ട​ങ്ങ​ൾ ഉ​പ​യോ​ഗി​ച്ച്​ ‘ലൗ ​ദു​ബൈ’ എ​ന്ന്​ എ​ഴു​തി​യ​ത്​ ഈ ​ന​ഗ​ര​ത്തി​നോ​ടു​ള്ള ​ഇ​ഷ്ടം കൊ​ണ്ടു​കൂ​ടി​യാ​ണ്. ഒ​റ്റ​നോ​ട്ട​ത്തി​ൽ തോ​ന്നും കു​റേ കെ​ട്ടി​ട​ങ്ങ​ൾ നി​ര​ന്നു നി​ൽ​ക്കു​ന്ന​താ​ണെ​ന്ന്. എ​ന്നാ​ൽ, സൂ​ക്ഷി​ച്ച്​ നോ​ക്കി​യാ​ൽ ഇ​തി​നു​ള്ളി​ൽ ദു​ബൈ​യോ​ടു​ള്ള പ്ര​ണ​യം കാ​ണാം. ഇ​ത് ദു​ബൈ ബി​ൽ​ഡി​ങ്​ സീ​രീ​സ്​ എ​ന്ന പേ​രി​ൽ ചി​ത്ര​ങ്ങ​ളു​ടെ പ​ര​മ്പ​ര​യാ​യി പ്ര​ദ​ർ​ശ​ന​ത്തി​നെ​ത്തി​ച്ചി​ട്ടു​ണ്ട്. ഈ ​സീ​രി​സി​ലെ അ​വ​സാ​ന ചി​ത്ര​ങ്ങ​ളു​ടെ മി​നു​ക്കു പ​ണി​യി​ലാ​ണ്​ സു​രേ​ഷ്. യു.​എ.​ഇ​യു​ടെ ച​രി​ത്ര​ത്തി​ലൂ​ടെ​യും

വാ​സ്തു വി​ദ്യാ വി​സ്മ​യ​ങ്ങ​ളി​ലൂ​ടെ​യു​മു​ള്ള യാ​ത്ര​യാ​ണ്​ ദു​ബൈ ബി​ൽ​ഡി​ങ്​ സീ​രീ​സി​ലെ മൂ​ന്നാ​മ​ത്തെ ചി​ത്ര​മാ​യ​ ‘യു.​എ.​ഇ ഓ​ൺ വീ​ൽ​സ്​’. ഇ​ന്ന​ത്തെ ദു​ബൈ ന​ഗ​ര​ത്തി​ന്‍റെ അം​ബ​ര ചും​ബി​ക​ളാ​യ കെ​ട്ടി​ട ദൃ​ശ്യ​ഭം​ഗി മ​ണ​ലാ​ര​ണ്യ​ത്തി​ൽ തീ​ർ​ത്തെ​ടു​ത്ത യാ​ത്രാ ചി​ഹ്ന​ങ്ങ​ലി​ലൂ​ടെ പ്ര​തി​ഫ​ലി​പ്പി​ക്കാ​ൻ ശ്ര​മി​ക്കു​ക​യാ​ണ് താ​നെ​ന്ന്​ സു​രേ​ഷ്​ പ​റ​യു​ന്നു. ക​ട​ൽ യാ​ത്ര​യ്ക്ക് ഉ​പ​യോ​ഗി​ച്ചി​രു​ന്ന പാ​യ്​​ക​പ്പ​ൽ മു​ത​ൽ മ​രു​ഭൂ​മി​യി​ലെ സ​ഫാ​രി വ​ണ്ടി വ​രെ നീ​ളു​ന്ന ച​രി​ത്ര യാ​ത്ര​യാ​ണ് ഇ​തി​ന്‍റെ ഇ​തി​വൃ​ത്തം.

ഈ ​സീ​രീ​സി​ലെ മ​റ്റൊ​രു ചി​ത്ര​മാ​ണ്​ ‘ഡ്രീം​സ്​ ഓ​ഫ്​ ഫാ​ൽ​ക്ക​ൺ’. യു.​എ.​ഇ​യു​ടെ ദേ​ശീ​യ​ത അ​ട​യാ​ള​പ്പെ​ടു​ത്തു​ന്ന ഫാ​ൽ​ക്ക​ൺ പ​ക്ഷി ദു​ബൈ​യി​ലെ കെ​ട്ടി​ട​ങ്ങ​ളു​ടെ പ​ശ്​​ചാ​ത്ത​ല​ത്തി​ൽ ഇ​രി​ക്കു​ന്ന ചി​ത്ര​മാ​ണി​ത്. ദു​ബൈ​യി​ലെ സു​ന്ദ​ര​മാ​യ കെ​ട്ടി​ട​ങ്ങ​ൾ വ​ർ​ണ മ​നോ​ഹ​ര​ങ്ങ​ളാ​യ വ​ലി​യ വൃ​ക്ഷ​ങ്ങ​ളാ​യി​രു​ന്നെ​ങ്കി​ൽ എ​ന്ന ആ​ശ​യ​മാ​ണ്​ ഫാ​ൽ​ക്ക​ണി​ലൂ​ടെ പ്ര​തി​ഫ​ലി​പ്പി​ക്കു​ന്ന​തെ​ന്ന്​ സു​രേ​ഷ്​ പ​റ​യു​ന്നു.

ദു​ബൈ ഇ​ന്‍റ​ർ​നാ​ഷ​ന​ൽ ഫി​നാ​ൻ​ഷ്യ​ൽ സെ​ന്‍റ​ർ ഗേ​റ്റ് അ​വ​ന്യൂ മാ​ളി​നോ​ട് ചേ​ർ​ന്ന M 2L മാ​ർ​ക്ക​റ്റ് ആ​ർ​ട്ട് ലാ​ബി​ലെ​ത്തി​യാ​ൽ ഈ ​ചി​ത്ര​ങ്ങ​ൾ കാ​ണാം. ztartup.comന്‍റെ സ​ഹാ​യ​ത്തോ​ടെ ന​ട​ക്കു​ന്ന ഈ ​പ്ര​ദ​ർ​ശ​നം ദി​വ​സ​വും വൈ​കു​ന്നേ​രം നാ​ല്​ മു​ത​ൽ രാ​ത്രി എ​ട്ട്​ വ​രെ​യു​ണ്ടാ​കും. ചി​ത്ര​ങ്ങ​ളും ശി​ല്പ​ങ്ങ​ളും അ​ട​ക്കം പ​ത്തോ​ളം സൃ​ഷ്ടി​ക​ൾ ഇ​വി​ടെ പ്ര​ദ​ർ​ശ​ന​ത്തി​നു​ണ്ട്. ഈ ​ആ​ർ​ട്ട് ഗാ​ല​റി ര​ണ്ട് മാ​സം വ​രെ ഇ​വി​ടെ​യു​ണ്ടാ​കും. ഇ​വി​ടെ​യി​രു​ന്നാ​ണ്​ സു​രേ​ഷ്​ പു​തി​യ ചി​ത്ര​ങ്ങ​ൾ വ​ര​ച്ച്​ തീ​ർ​ക്കു​ന്ന​ത്.

ദു​ബൈ​വ​യി​ൽ വി​വി​ധ ഇ​ൻ​സ്റ്റ​ലേ​ഷ​ൻ വ​ർ​ക്കു​ക​ൾ ചെ​യ്യ​ണ​മെ​ന്നാ​ണ്​ സു​രേ​ഷി​ന്‍റെ ആ​ഗ്ര​ഹം. ലോ​ക​ക​പ്പി​ന്‍റെ സ​മ​യ​ത്ത്​ ല​യ​ണ​ൽ മെ​സ്സി​യു​ടെ കാ​രി​ക്കേ​ച്ച​ർ പ്ര​തി​മ നി​ർ​മി​ച്ചി​രു​ന്നു. ഫൈ​ന​ലി​ന്​ ര​ണ്ട്​ ദി​വ​സം മു​ൻ​പ്​ ത​ന്നെ ലോ​ക​ക​പ്പി​ന്‍റെ രൂ​പ​ത്തി​ൽ മെ​സ്സി​യെ സൃ​ഷ്ടി​ച്ചെ​ടു​ത്തി​രു​ന്നു. ര​ണ്ട്​ അ​ടി വ​ലി​പ്പ​ത്തി​ൽ തെ​ർ​മോ​കോ​ളി​ൽ സൃ​ഷ്ടി​ച്ച മെ​സ്സി​യു​ടെ താ​ഴ്​​ഭാ​ഗം ലോ​ക​ക​പ്പി​ന്‍റെ സ്റ്റാ​ൻ​ഡാ​ണ്. യു.​എ.​ഇ​യി​ലെ മെ​സ്സി ഫാ​ൻ​സി​ന്​ വേ​ണ്ടി​യാ​ണ്​ ഇ​ത്​ ഒ​രു​ക്കി​യ​ത്. ദു​ബൈ​യി​ലെ പ്ര​ശ​സ്ത​മാ​യ വേ​ൾ​ഡ്​ ആ​ർ​ട്ടി​ലെ സ്ഥി​രം സാ​ന്നി​ധ്യം കൂ​ടി​യാ​ണ്​ സു​രേ​ഷ്. ഫു​ജൈ​റ​യി​ൽ 14 രാ​ജ്യ​ങ്ങ​ളി​ൽ നി​ന്നും കൊ​ണ്ടു​വ​ന്ന മാ​ർ​ബി​ൾ ഉ​പ​യോ​ഗി​ച്ച് ഫു​ജൈ​റ ഭ​ര​ണാ​ധി​കാ​രി​യു​ടെ രൂ​പം തീ​ർ​ത്തി​രു​ന്നു.