ഹഷീഷ് ഓയിലുമായി യുവാക്കൾ പിടിയിൽ

പുൽപള്ളി: മയക്കുമരുന്നുമായി മൂന്ന് യുവാക്കളെ പൊലീസ് പിടികൂടി. താമരശ്ശേരി കളപ്പുരക്കൽ വിവേക് (26), പുൽപള്ളി വേലിയമ്പം വെർക്ലാസിൽ ലിബിൻ രാജൻ (26), വേലിയമ്പം കൊട്ടമുരട്ട് അഖിൽ (26) എന്നിവരെയാണ് പിടികൂടിയത്.

ഇവരിൽ നിന്നും 2.2 ഗ്രാം ഹഷീഷ് ഓയിൽ പിടികൂടി. ഇവർ സഞ്ചരിച്ച കാറും കസ്റ്റഡിയിലെടുത്തു. സുൽത്താൻ ബത്തേരി ഡിവൈ.എസ്.പി അബ്ദുൾ ഷെരീഫിന്റെ നിർദേശാനുസരണം പുൽപള്ളി സബ് ഇൻസ്പെക്ടർ സി.ആർ. മനോജും സംഘവും പുൽപള്ളി ടൗണിൽ നടത്തിയ വാഹന പരിശോധനയിലാണ് കാറിൽ മയക്കുമരുന്നുമായി സഞ്ചരിച്ച യുവാക്കളെ പിടികൂടിയത്.

ജൂനിയർ എസ്.ഐ നിഖിൽ, സീനിയർ സിവിൽ പൊലീസ് ഓഫിസർ അബ്ദുൽ നാസർ, പ്രജീഷ് ഉൾപ്പെടെയുള്ള സംഘമാണ് ഇവരെ പിടികൂടിയത്.