ബാലരാമപുരത്ത് യുവാവ്​ കുത്തേറ്റ്​ മരിച്ചു; സുഹൃത്തിനായി തിരച്ചിൽ

ബാലരാമപുരം (തിരുവനന്തപുരം): ബാലരാമപുരത്ത് യുവാവിനെ സുഹൃത്ത് കുത്തിക്കൊന്നു. തലയൽ കരിംപ്ലാവിള പുത്തൻവീട്ടിൽ ജി. ബിജുവാണ് (42) കൊല്ലപ്പെട്ടത്. സംഭവത്തിൽ ബിജുവിന്‍റെ സുഹൃത്ത് കുമാറിനായി പൊലീസ് അന്വേഷണം ആരംഭിച്ചു. ഞായറാഴ്ച വൈകീട്ട് ആ​േറാടെയായിരുന്നു സംഭവം. രാവിലെ ബിജുവും സുഹൃത്ത് കുമാറും ഒന്നിച്ചിരുന്നു മദ്യപിച്ചിരുന്നുവത്രെ. തിരികെ വീട്ടിലെത്തിയ ശേഷം ബിജുവിനെ ഫോണിൽ വിളിച്ചു. എന്നാൽ, ബിജു ഫോൺ എടുത്തില്ല.

ആ​േറാടെ വീട്ടിൽനിന്ന്​ പുറത്തേക്കിറങ്ങിയ ബിജുവിനെ തൊട്ടടുത്ത ചാനൽകരയിൽ കാത്ത് നിന്ന കുമാർ ആക്രമിക്കുകയായിരുന്നെന്ന്​ പറയപ്പെടുന്നു. വിളികേട്ട് ഓടിയെത്തിയ ബിജുവിന്‍റെ ഭാര്യയും മരുമകനും ചേർന്ന് ഓട്ടോയിൽ ഉടൻ നെയ്യാറ്റിൻകര ജനറൽ ആശുപത്രിയിൽ എത്തിച്ചെങ്കിലും മരിച്ചു. ഭാര്യ: മഞ്ജു. മക്കൾ: അശ്വതി, അച്ചു. മരുമകൻ: വിഷ്ണു.