നെടുമങ്ങാട്​ സ്വദേശിയുടെ കൊല: നാവായിക്കുളം സ്വദേശി അറസ്​റ്റിൽ

കാസര്‍കോട്: തളങ്കര നുസ്രത്ത് റോഡിലെ വാടക ക്വാര്‍ട്ടേഴ്‌സില്‍ താമസിച്ചിരുന്ന തിരുവനന്തപുരം നെടുമങ്ങാട് പാങ്ങോത്ത് സ്വദേശി ബി. സജിത്തിനെ കൊലപ്പെടുത്തിയ കേസില്‍ യുവാവ് അറസ്​റ്റില്‍. കോൺക്രീറ്റ് തൊഴിലാളി തിരുവനന്തപുരം നാവായിക്കുളം ഷംന മന്‍സിലിൽ എസ്. നസീറാണ്​ (38) അറസ്​റ്റിലായത്. ബുധനാഴ്​ച രാവിലെ പത്തരയോടെ ടൗൺ സി.ഐ പി. അജിത് കുമാറി​‍െൻറ നേതൃത്വത്തിലാണ് അറസ്​റ്റ്​. വയറിനേറ്റ ആഴത്തിലുള്ള കുത്താണ് മരണകാരണമെന്നാണ്​ പോസ്​റ്റുമോര്‍ട്ടം റിപ്പോര്‍ട്ട്​. നവംബർ ഒന്നിന് രാവിലെയാണ് സജിത്തി​‍െൻറ മൃതദേഹം കണ്ടെത്തിയത്.

അസ്വാഭാവിക മരണത്തിനായിരുന്നു പൊലീസ്​ കേസെടുത്തത്​. പോസ്​റ്റുമോര്‍ട്ടം റിപ്പോര്‍ട്ട് വന്നതോടെ കൊലപാതകത്തിന് കേസെടുക്കുകയായിരുന്നു. സജിത്തും നസീറും തമ്മില്‍ തര്‍ക്കമുണ്ടായിരുന്നു. രണ്ടുപേരും തമ്മില്‍ വഴക്കുകൂടിയതിന്​ സാക്ഷിയുണ്ടായിരുന്നു. ബാങ്കോട്ടെ ക്വാര്‍ട്ടേഴ്‌സിൽ താമസിച്ചിരുന്ന നസീർ 31ന് രാത്രി സജിത്തി​‍െൻറ ക്വാര്‍ട്ടേഴ്‌സിലെത്തി. ഇരുവരും വാക്കുതർക്കമുണ്ടായി. അത്​ കത്തിക്കുത്തിലെത്തി. കുത്തേറ്റ്​ ഓടിയ സജിത്ത് ഗ്രൗണ്ടിനുസമീപം വീണ്​ രക്​തം വാര്‍ന്ന് മരിച്ചു. സംഭവത്തിനുശേഷം നസീര്‍ മംഗളൂരുവിലേക്ക് കടന്നു. മരണവുമായി ബന്ധപ്പെട്ട് പരിസരവാസികളും സഹതൊഴിലാളികളുമടക്കം പലരില്‍നിന്നും പൊലീസ് മൊഴിയെടുത്തിരുന്നു.

എസ്.ഐമാരായ വിഷ്ണുപ്രസാദ്, എ.എം. രഞ്ജിത് കുമാര്‍, വേണു, എ.എസ്.ഐമാരായ കെ. വിജയന്‍, മോഹനന്‍, സിവില്‍ പൊലീസ് ഓഫിസര്‍മാരായ പി. അബ്​ദുല്‍ഷുക്കൂര്‍, രാജേഷ്, സിജിത്, വിജയന്‍ എന്നിവരും അന്വേഷണ സംഘത്തിലുണ്ടായിരുന്നു.