പട്ടാപ്പകൽ തുണിക്കടയിൽ മോഷണം

പോത്തൻകോട് : തിരുവനന്തപുരത്ത്​ പട്ടാപ്പകൽ തുണിക്കടയിൽ മോഷണം. വെഞ്ഞാറമൂട് റോഡിലാണ്​ തുണിക്കടയിലാണ്​ സംഭവം. വിലപിടിപ്പുള്ള നിരവധി വാച്ചുകളും ഷർട്ടുകളും കണ്ണടകളും കവർന്നു. വെള്ളിയാഴ്ച ഉച്ചയ്ക്ക് 1 .30 ന് മാൻ ഫാക്ടറി ജെന്‍റസ് തുണിക്കടയിലായിരുന്നു സംഭവം.

ബൈക്കിലെത്തിയ രണ്ടംഗ സംഘം ഹെൽമറ്റ് ധരിച്ച് തന്നെ കടയ്ക്കുള്ളിൽ കയറി ഒരാൾ ഷർട്ടുകൾ നോക്കി സെയിൽസ്മാനോട് വില ചോദിക്കുന്നതിനിടയിൽ രണ്ടാമനാണ് സാധനങ്ങൾ മോഷ്ടിച്ച് ഓവർകോട്ടിനുള്ളിൽ ഒളിപ്പിച്ചത്​. കടയിലെ സുരക്ഷാ കാമറയിൽ ഇതിന്‍റെ ദൃശ്യങ്ങൾ പതിഞ്ഞിട്ടുണ്ട്​.

രാത്രിയിൽ സെയിലും സ്റ്റോക്കും പരിശോധിച്ചപ്പോഴാണ് ക്യാഷിൽ വൻ കുറവ് അനുഭവപ്പെട്ടത്. തുടർന്ന് കടയിലെ സ്റ്റോക്ക് ഉൾപ്പെടെ പരിശോധിച്ച് കുറവ് ബോധ്യപ്പെട്ട കടയുടമ സി.സി.ടി.വി. ദൃശ്യങ്ങൾ പരിശോധിച്ചപ്പോഴാണ് യുവാക്കളുടെ മോഷണം വ്യക്തമായത്. തുടർന്ന്​ കടയുടമ പൊലീസിൽ പരാതി നൽകി.