യുവാവിന്‍റെ മരണം വാഹനാപകടമല്ല, ഹെൽമറ്റ് കൊണ്ട് തലക്കടിച്ചു കൊന്നു; സഹോദരനും സുഹൃത്തും പിടിയിൽ

തൃശൂർ: ചേറ്റുപുഴയിലെ യുവാവിന്‍റെ മരണം കൊലപാതകമാണെന്ന് തെളിഞ്ഞു. അരിമ്പൂർ സ്വദേശി ഷൈനിനെ (28) ഹെൽമറ്റ് കൊണ്ട് തലക്കടിച്ച് കൊന്നതാണെന്ന് പോസ്റ്റ്‌മോർട്ടത്തിൽ കണ്ടെത്തി. യുവാവിന്‍റെ സഹോദരനെയും സുഹൃത്തിനെയും പൊലീസ് കസ്റ്റഡിയിലെടുത്തു.

സഹോദരൻ ഷെറിൻ (24) , സുഹൃത്ത് അരുൺ എന്നിവരാണ് കസ്റ്റഡിയിലുള്ളത്. ഒന്നിച്ച് പോകുമ്പോൾ ബൈക്കിൽനിന്ന് വീണതാണെന്നാണ് സഹോദരനും സുഹൃത്തും പറഞ്ഞിരുന്നത്. വണ്ടിയിൽ പെട്രോൾ തീർന്നതിനെ ചൊല്ലിയുള്ള തർക്കമാണ് കൊലപാതകത്തിന് കാരണം. ഹെൽമറ്റ് കൊണ്ട് തലക്കടിച്ച ശേഷം സഹോദരനും കൂട്ടുകാരനുമാണ് ആംബുലൻസ് വിളിച്ച് ഷൈനിനെ ആശുപത്രിയിലെത്തിച്ചത്.