കൊലക്കേസ് പ്രതിയുടേത് വാഹനാപകടമല്ല, കൊലപാതകമെന്ന് പൊലീസ്; ബൈക്കിൽ പോകവെ ടിപ്പ‍ർ ലോറി ഇടിപ്പിക്കുകയായിരുന്നു

തിരുവനന്തപുരം: പെരുങ്കടവിളയില്‍ കൊലക്കേസ് പ്രതിയെ ടിപ്പർ ലോറി ​ഇടിപ്പിച്ച് കൊല്ലുകയായിരുന്നുവെന്ന് പൊലീസ്. മാരായമുട്ടം ജോസ് വധക്കേസിലെ പ്രതി രഞ്ജിത്ത് ( 35 ) ആണ് കൊല്ലപ്പെട്ടത്. ഇന്നലെ വാഹനാപകടത്തിലാണ് മരണപ്പെട്ടതെന്നാണ് കരുതിയത്. സംഭവസ്ഥലത്ത് നിന്നും ടിപ്പർ ലോറി ഡ്രൈവർ ഓടി രക്ഷപ്പെടുകയായിരുന്നു. എന്നാലിത്, കൊലപാതകമാണെന്ന് തെളിഞ്ഞതായി പൊലീസ് അറിയിച്ചു.

പ്രതി കോടതിയിൽ കീഴടങ്ങി. അപകടമരണം കൊലപാതകമാണെന്ന പ്രാഥമിക അ​ന്വേഷണത്തിൽ തന്നെ പൊലീസ് വിലയിരുത്തിയിരുന്നു. കൊലപാതകത്തിലെ കണ്ണികളിലേക്ക് അന്വേഷണം നീങ്ങവെയാണ് പ്രതി കോടതിയിൽ കീഴടങ്ങിയത്.

കീഴാറൂർ മരുതംകോട് സ്വദേശി ശരത് ആണ് നെയ്യാറ്റിൻകര കോടതിയിൽ കീഴടങ്ങിയത്. ഇരുവരും തമ്മിലുള്ള മുൻ വൈരാഗ്യമാണ് കൊലപാതകത്തിന്‍റെ കാരണം. പ്രതിയെ കോടതി റിമാൻഡ് ചെയ്തു.