വീട് കുത്തിത്തുറന്ന് നാല്​ പവനും പണവും കവർന്നു; കള്ളന്‍റെ കണ്ണിലുടക്കാതെ 25 പവൻ ബാക്കിയായി

തൃപ്രയാർ: അടച്ചിട്ട വീട്ടിൽ നിന്ന്​ നാലുപവൻ സ്വർണവും 40,000 രൂപയും കവർന്നു. എടമുട്ടം തവളക്കുളത്തിന് തെക്ക് അമ്പലത്ത് വീട്ടിൽ ഷിഹാബുദ്ദീ​െൻറ ഇരുനില വീട്ടിലാണ് മോഷണം നടന്നത്.

മുകൾ നിലയിലെ അലമാരയിൽ സൂക്ഷിച്ചിരുന്ന നാല്​ പവ​െൻറ ആഭരണങ്ങളും 40,000 രൂപയുമാണ് കവർന്നത്. രണ്ടുദിവസം മുമ്പ്​ പിതാവ് ചേക്കുവി​െൻറ ചികിത്സയുമായി ബന്ധപ്പെട്ട് കുടുംബാംഗങ്ങളെല്ലാവരും കോയമ്പത്തൂരിലേക്ക് പോയിരിക്കുകയായിരുന്നു. തിങ്കളാഴ്ച വൈകീട്ടോടെ തിരിച്ചെത്തിയപ്പോഴാണ് മോഷണം നടന്നതായി അറിയുന്നത്.

ഇരുനില വീടിന്‍റെ പിറകുവശത്തെ വാതിൽ പൊളിച്ചാണ് മോഷ്​ടാവ് അകത്ത് കയറിയത്. കിടപ്പുമുറികളിലെ എല്ലാ അലമാരകളും കുത്തിത്തുറന്ന നിലയിലാണ്. മറ്റൊരിടത്ത് 25 പവനോളം വരുന്ന ആഭരണങ്ങൾ ശ്രദ്ധയിൽപെടാത്ത വിധത്തിൽ സൂക്ഷിച്ചിരുന്നതിനാൽ നഷ്​ടമായില്ല. വലപ്പാട് പൊലീസ് സ്ഥലത്തെത്തി കേസെടുത്ത് അന്വേഷണം ആരംഭിച്ചു. ഡോഗ് സ്ക്വാഡും വിരലടയാള വിദഗ്​ധരും സ്ഥലത്തെത്തി തെളിവുകൾ ശേഖരിച്ചു.