അഘോരിയുടെ ആത്മാവിനെ ഒഴിപ്പിക്കാമെന്ന്​ വിശ്വസിപ്പിച്ച്​​ 37കാരിക്ക്​ പീഡനം; ക്ഷേത്ര പുരോഹിതൻ അറസ്റ്റിൽ

രാജ്​കോട്ട്​: 37കാരിയെ ബലാത്സംഗത്തിനിരയാക്കിയ കേസിൽ 27കാരനായ ക്ഷേത്ര പുരോഹിതൻ അറസ്റ്റിൽ. രാജ്​കോട്ട്​ സ്വദേശിയായ മഹന്ദ്​ ഗൗതംഗിരി ഗോസായ്​ ആണ്​ പിടിയിലായത്​. അഘോരിയുടെ ആത്മാവിന്‍റെ പിടിയിൽ നിന്ന്​ മോചിപ്പിക്കാമെന്ന്​ പറഞ്ഞ്​ യുവതിയെ പീഡനത്തിനിരയാക്കിയ കേസിൽ സ്വയം പ്രഖ്യാപിത ആൾദൈവങ്ങളായ രണ്ടുപേർ പിടിയിലായിരുന്നു. മുംബൈ സ്വദേശികളായ സ്വാമി പ്രണവാനന്ദ്​ ശുക്ലയും ഹേമന്ദ്​ ജോഷിയുമായിരുന്നു ആഗസ്റ്റ്​ ഒമ്പതിന്​ അറസ്റ്റിലായത്​.

സ്ത്രീയുടെ ശരീരത്തിൽ അഘോരി ആത്മാവ് ഉണ്ടെന്നും രക്ഷപ്പെടാൻ തങ്ങൾക്ക്​ വഴങ്ങിക്കൊടുക്കണമെന്നും വിശ്വസിപ്പിച്ചായിരുന്നു പീഡനമെന്ന്​ പൊലീസ് പറഞ്ഞു. 2002ൽ വിവാഹിതയായ യുവതി 2003ൽ വേർപിരിഞ്ഞു. 2009ൽ വീണ്ടും വിവാഹിതയായി. എന്നാൽ ഭർത്താവുമായി നിരന്തരം വഴക്കായതോടെയാണ് 2011ൽ​ സ്വയം പ്രഖ്യാപിത ആൾദൈവമായ സ്വാമി പ്രണവാനന്ദ്​ ശുക്ലയെ സമീപിച്ചത്​.

ശരീരത്തിൽ അഘോരി ആത്മാവ് ഉണ്ടെന്നും രക്ഷപ്പെടാൻ താനുമായി ലൈംഗിക ബന്ധത്തിൽ ഏ​ർപ്പെടണമെന്നും ശുക്ല യുവതിയോട്​ ആവശ്യപ്പെട്ടു. ഇതിന്​ ശേഷം ശുക്ല യുവതിയെ നിരന്തരം പീഡനത്തിനിരയാക്കിയതായി പൊലീസ്​ പറഞ്ഞു. 2015ലാണ്​ ശുക്ല ഇവരെ ജോഷിക്ക്​ പരിചയപ്പടുത്തിക്കൊടുത്തത്​.

'ജോഷിയും അവരെ പീഡിപ്പിച്ചതായി യുവതി പരാതിപ്പെട്ടിട്ടുണ്ട്​. ശുക്ലയും ജോഷിയും പറഞ്ഞത്​ അനുസരിച്ച്​ ഇവർ എല്ലാ മാസവും രാജ്​കോട്ട്​ സന്ദർശിക്കുമായിരുന്നു. സഹായിക്കാമെന്ന്​ പറഞ്ഞ്​ ക്ഷേത്ര പൂജാരിയായ മഹന്ദ്​ ഗൗതംഗിരി ഗോസായ്​യും അവരെ ലൈംഗികമായി ചൂഷണം ചെയ്​തു' -പൊലീസ്​ ഓഫിസർ പറഞ്ഞു.

ദുരാത്മാവിന്‍റെ ഉപദ്രവത്തിൽ നിന്ന്​ രക്ഷപ്പെടാൻ വേശ്യാവൃത്തി ചെയ്യാനും ഇവരെ നിർബന്ധിപ്പിച്ചാതായി പൊലീസ്​ പറഞ്ഞു. 'ശുക്ല അവളെ ചിന്ത്രൻഷ് ചിങ്കി എന്ന വ്യക്തിയെ പരിചയപ്പെടുത്തി. അയാൾ അവളെ വേശ്യാവൃത്തിക്കായി രാജ്യത്തിന്‍റെ വിവിധ ഭാഗങ്ങളിലേക്ക് അയക്കും. ലഭിക്കുന്ന പണം മുഴുവൻ ശുക്ലക്ക്​ കൈമാറാനും പറഞ്ഞു'- പൊലീസ്​ ഉദ്യോഗസ്​ഥൻ പറഞ്ഞു.

യുവതിയുടെ കഥ​ കേട്ട ശേഷം ഒരു ബിസിനസുകാരൻ അവളെ സഹായിക്കാമെന്ന് വാഗ്ദാനം ചെയ്യുകയും 35 ലക്ഷം രൂപ നൽകുകയും ചെയ്തു, എന്നാൽ ആ പണവും ശുക്ല തട്ടിയെടുത്തു. ഏകദേശം 10 വർഷമായി പീഡനം സഹിച്ചിട്ടും തന്‍റെ പ്രശ്നങ്ങൾ ഇനിയും പരിഹരിക്കപ്പെട്ടിട്ടില്ലെന്ന് സ്ത്രീ തിരിച്ചറിഞ്ഞതിന്​ പിന്നാലെയാണ്​ യുവതി ആഗസ്റ്റിൽ പരാതി നൽകിയത്​.