മറ്റ്​ ആൺകുട്ടികളോട്​ സംസാരിച്ചതിന്​ കൗമാരക്കാരൻ 15കാരിയെ കൊല്ലാൻ ശ്രമിച്ചു

ബംഗളൂരു: തന്നെ അവഗണിച്ച്​ മറ്റ്​ ആൺകുട്ടികളോട്​ സംസാരിച്ചതിന്​ കൗമാരക്കാരൻ 15കാരിയെ കൊലപ്പെടുത്താൻ ശ്രമിച്ചു. കർണാടകയിലെ ബംഗളൂരുവിലാണ്​ സംഭവം. ജയനഗർ സ്വദേശിനിയായ പെൺകുട്ടിയും കൗമാരക്കാരനും സഹപാഠികളും അടുത്ത സുഹൃത്തുക്കളുമായിരുന്നു.

തിങ്കളാഴ്ച ഓൺലൈൻ ക്ലാസിൽ പ​​ങ്കെടുത്തു കൊണ്ടിരിക്കേ പ്രതി പെൺകുട്ടിയുടെ വീട്ടിലെത്തി. അ​പ്പോൾ വീട്ടിൽ പെൺകുട്ടി മാത്രമാണ്​ ഉണ്ടായിരുന്നത്​. എ​ന്തുകൊണ്ടാണ്​ തന്നെ അവഗണിക്കുന്നതെന്നും മറ്റ്​ ആൺകുട്ടികളോട്​ സംസാരിക്കരുതെന്നും പ്രതി കുട്ടിയോട്​ ചോദിച്ചു. താൻ പറയുന്നത്​ അനുസരിച്ചില്ലെങ്കിൽ കൊന്നുകളയുമെന്ന്​ ഭീഷണിയും മുഴക്കി.

ശേഷം തന്‍റെ ശരീരത്തിൽ മുറിവേൽപിച്ച പ്രതി പെൺകുട്ടിയുടെ കഴുത്തിൽ കത്തികൊണ്ട്​ ആക്രമിച്ചു. ശേഷം ടോയ്​ലറ്റ്​ ക്ലീനർ കുടിക്കാൻ ശ്രമിച്ച കൗമാരക്കാരൻ പെൺകുട്ടിയെ ബലമായി കുടിപ്പിക്കാനും ശ്രമിച്ചു.

എന്നാൽ അൽപ സമയത്തിന്​ ശേഷം പരിഭ്രാന്തനായ പ്രതി തന്‍റെ അമ്മാവനെ സംഭവ സ്​ഥലത്തേക്ക്​ വിളിച്ചുവരുത്തി. അമ്മാവനെത്തി ഇരുവരെയും ആശുപത്രിയിൽ പ്രവേശിപ്പിക്കുകയായിരുന്നു.

ആശുപത്രി അധികൃതരാണ്​ വിവരം പൊലീസിൽ അറിയിച്ചതാണ്​. ഇരുവരും അപകടനില തരണം ചെയ്​തു. ഐ.പി.സിയിലെ വിവിധ വകുപ്പുകളും പോക്​സോ നിയമത്തിലെ വകുപ്പുകളും ചേർത്ത്​ പ്രതിക്കെതിരെ പൊലീസ്​ കേസ്​ രജിസ്റ്റർ്​ ചെയ്​തു.